I. Ta eph'hémin ta ouk eph'hémin (Ayen icudden ɣer-nneɣ d wayen ur ncudd ara ɣer-nneɣ)

    Di ddunit llant snat tγawsiwin : llant tidak icudden γer-nneγ akd tidak ur ncudden ara γer-nneγ. Tidak icudden γer-nneγ d tamuγli, lebγi, tayri, lkeṛh, tigini meṛṛa cuddent γer yiman-nneγ. Tiγawsiwin ur ncedden ara γer yiman-nneγ, tella tfekka, trikka, iseɣ, timucaεt d tidak akk i γ-d-yettasen si beṛṛa.

    Tiγawsiwin icudden γer yiman-nneγ d tilelliyin, imi ulac win i izemren ad yeskcem iman-is deg-sen, ulac d acu i zemren ad sent-yerr lqid. Tiγawsiwin ur ncedden ara γer yiman-nneγ, tidak-nni ur dusent ara, d tiseklafin (mačči d tilelliyin), d tibeṛaniyin.

    Cfu d akken ma yella tettγileḍ-as d akken d ilelli win yekcem ṭṭmeε n useklaf (akli), ma tettγileḍ-as d akken d ayla-k d ayen k-ibeεden, nek ad k-inniγ atan ad temlileḍ di ddunit-ik ḥaca leḥzen, tanuγni d wurfan. Ad tuγaleḍ ad tettlumuḍ kan γef igennawen d yemdanen.  Maca ma yella tḥesbeḍ kan d ayla-k ayen teliḍ, ayen k-ibeεden d ayla n ubeṛṛani, dinna yiwen mačči yezmer ad yegled fell-ak, ad k-yeṭṭef neγ ad k-yeqqen s kra neγ kra. Ma tgiḍ akka ad tafeḍ iman-ik, ulac win γef ara tlumeḍ, ulac win γef ara tečḥeḍ, ulac d acu ara d-yasen ad k-yesluγ tamduct-ik, imi ur tesεiḍ ara inimiken (iεdawen), imi ulac d acu i izemren ad k-yesufri.

    Keč iran ad tidireḍ tameddurt yelhan, issefk-ak ad tεetbeḍ akken ad tawḍeḍ iswi-ynek.  Issefk-ak ad twexreḍ i waṭas n tγawsiwin, ma d tidak i ilaq ad ten-twedmeḍ, ma teẓriḍ ur tent-waεaḍ ara, ilaq-ak ad sent-tesεeddiḍ (a tent-deggreḍ ar zdat, ar wasmi ara tent-weεiḍ).  Maca ma triḍ ad tkesbeḍ tamusni, trikka d tezmert γef tikkelt, tzemreḍ a d-tafeḍ iman-ik ur tewwiḍeḍ yiwet, imi yal tikkelt m ara tḍefreḍ yiwet, ad k-tṛuḥ tayeḍ. Abrid-agi ad k-yawi s amkan anda ara d-tafeḍ iman-ik d ameḥbus, a d-tafeḍ iman-ik ur tenuleḍ li-d d tilelli li-d d tudert yelhan.

    Yal m ara k-d-tas tikti i weεṛen, in-as akkagi : "Kem d tamagut (tugna), mačči d ayen yellan." - Syen sakkin siff-itt, sεedd-itt deg weγerbal, meyza-s, wezn-itt s leqwanen-inek : anisi d tekka, ma seg-k, ma yella tcudd γer-k, γer yiman-ik, neγ tekka-yak-d s beṛṛa, tusa-d ansi nniḍen ?  Ma tufiḍ d akken tikti-nni ansi nniḍen i k-d-tekka, ur k-tegzi yara, mačči s γer-k i d-tekka, in-as : "Taluft-agi, ur iyi-teεni yara."