(Texte latin)

Iṛus d Psukki

 

 

Amacahu, deg yiwet n turbit¹, llan ugellid d tgelliṭ, γur-sen tlata teqcicin, muqrit, yerna cebḥent aṭas. Snat-nni timenza, γas akkenni lhant i tmuγli, medden akk ttmeslayen γef ccbaḥa-nnsent, maca tmecṭuḥt-nni akk seg-sent, tiff-itent. Yiwen mačči yezmer ad d-yemeslay γef ccbaḥa-ines, imi tameslayt n wumdan d taẓawalit, ur tezmir ara ad aγ-tt-id-tesken amek tga, s tidett. At-tmurt-is, ibeṛaniyen, agad akk d-yettasen ad tt-zuṛen, m ara wwḍen γer zdat-es, itettel yiles-nnsen deg wayen zeṛṛent wallen--nnsen. Ḥaca win kan ara twalliḍ yesxec, iγum s ufus-is imi-s, imi ur izmir ara ad t-yemdel deg wayen yettwali. Imdanen akk mmlen-tt, ttmeslayen fell-as akken ttmeslayen γef Wnisa, tgennawt² n ccbaḥa. Imezdaγ n tmura d-yezzin i turbit-nni deg tella teqcict-nni, ttwallin Wnisa deg udem d tfekka-s, nutni, hedṛen, qqaren-as : "D tagennawt-nni d-yeffγen di tweffa n yilel s timad-is, tinna akkenni d-tesker nnda n tkufta d lemwaji." Llan diγen yemdanen nniḍen qqaren-as : "Taqcict-agi, ula d nettat, deg waman i d-teffeγ : ma mačči deg wid n yilel i d-tulli, deg wid n ugeffur i d-teγli. Maca, ula d nettat, d yell-is n waman igenni. D Wnisa tamaynut. D Wnisa m tindert³."

Yal ass, yettumγur yiseγ n teqcict-nni. Wwḍen yemdanen almi ttamnen yis-s am akken llan ttamnen s tgennawt Wnisa. Dinna di tmurt-is, di tmura s-d-yezzin, di tegzirin, di tudrin, ulac anda ur slin ara yis-s. Yeffeγ fell-as wawal, yewweḍ yal amkan. Uγalen yemdanen ttasen-d γer tmurt-is di yal tama, ttasen-d akken ad tt-zuṛen. Ad zuṛen tagennawt tamaynut. Ugar i d-yettasen γer tmurt n teqcict-nni i ittinigen γer tegzirin, anda tegled tgennawt Wnisa. Adsen⁴ n tgennawt Wnisa, uγalen xlan, ğğan-ten yemdanen, ulac win i ten-yettzuṛun, ulac win i sen-izellun, ulac win yettnusun deg-sen. Usuyen-nnsen n zzhu ttwattun; igelma⁵ n tgennawt cedhan tidla n illili d yefsan; times n lekwanen-nnsen xsin, ḥaca iγed asemmaḍ i d-yegran deg-sen. Imdanen uγalen ttgen turayin⁶ i teqcict-nni kan, ttran ad ten-tefdu deg wayen n dir. Umnen yis-s, ttγilen-as d tagennawt Wnisa i yettin d taqcict-nni. Tafrara, m ara d-teffeγ deg wexxam, am tafukt, izenqan n turbit ad ten-tafeḍ ččuṛen d lγaci. Ttasen-d a s-gen tameγra, ttawin-as-d ijeğğigen, tisfifin, učči d tissit. Yettili di tmeγra n teqcict-nni wayen akk yettilin di tmeγriwin n igennawen. Llan ula d wagad i s-yettgen taḍeggaft. Lγaci, akken kan ara d tejbu deg iderig n tebburt, d timyezwirit γer-s, anwa ara tt-iwallin s leqreb.

Maca annect-agi meṛṛa ur sen-idrig ara i igennawen. Tagennawt Wnisa, asmi i twala akkenni, terfa : amek armi imdanen, widak-nni yellan zzik-nni ttamnen yis-s, uγalen ttun-tt, uγalen ttamnen s yelli-s n wemdan. Deg wakken terfa, tezwi amzur-is, tesenhez aqqeruy-is, tenna-yas :

"Atan tura, ula d nekkini, yemma-s n ddunit, aγbalu n kulci, nekkini yesutḍen tafusi⁷, uγaleγ beṭṭuγ ayla-w d yelli-s n wemdan. Isem-iw yuran deg igenni yumes s wayen iḍerrun di lqaεa. Ur tt-qebbleγ tagi. Ur qebbleγ ad awiγ ayen sselen imezzuγen-iwd wayen ttwalint wallen-iw. Amek tebγam ara ğğeγ yelli-s n wemdan ad teṭṭef amkan-iw ? Amek tebγam ad ğğen yemdanen tagennawt talebdit ad ḍefren Wnisa tamaynut, tinna akkenni ara yemten ? Dγa ihi γas kan ad hduγ i waḍu ayen iga Wubdir, asmi yerra tafrant γer umeksa Paris, winna akkenni iyi-fernen ger tgennawin Yunyu d Atina, di temsizelt n ccbaḥa. Maca taqcict-agi, iran ad teṭṭef amkan-iw, ur s-ttefγent ara i yiri. Ay annect tebγu tekki-t ddunit, ur tettmettat ara alama rriγ-asccbaḥa-ines d aγilif."

 

Tga akka tsawel i mmi-s bu tafriwin, winna akken ur nesεi ara idammen n wudem; ur netteg ara ẓẓerb i tikli-is; yettagsen s tmes; ittṣeggiden ulawen s inecaben; yettawin yettara di lexlawi; yettazalen γer yexxamen, yeskarray tilla ger watmaten, tnuḍin d twaculin. Mmi-s bu tafriwin, mmi-s bu texnanasin, winna akken werğin ngi ayen iwatan. Netta ur nettqil yiwen, ladγa m ara t-tesendeh yemma-s, m ara t-tesenti deg-s s imeslayen-is. Tsawel-as, tuzn-it γer tmurt n Psukki, imi akkaggi i s-qqaren i teqcict-nni, yelli-s-nni n ugellid. Tagennawt Wnisa tulsa-s i mmi-s-nni bu tafriwin tamacahutt n Psukki : amek tra ad teṭṭef amkan-is ger yemdanen. Akken tekfa, tenna-yas s wurfan : "S tayri n tyemmatt d wayen akk γ-yesduklen, s inecaben-ik yessaγayen times n lebγi deg ulawen, m ur teqideḍ tinna akken i iran ad teṭṭef amkan-iw. Issefk-ak a d-terreḍ ttaṛ n yemma-k. Ad terreḍ lecγal s imukan-nnsen. Wwet Psukki s unecab-ik, sureg deg ul-is mseblu n lebγi, akken ad tḥemmel argaz ucmit, argaz uzelig, argaz aneggaru ger yergazen, win i wumi werğin d-teḍsi ddunit, i wumi xeṛbent tirga, yewwt laẓ armi ur yezmir ara ad yekker.

Akken s-tenna awalen-agi, Wnisa tesudel mmi-s, tesuden-it, syen sakkin, tekcem γer yilel, tebda tikli γef waman. Tetteddu γef aman, tettağğa-d γer deffir-es, seddaw iḍarren-is yesellufuyen i tkufta, tiwredtin d tizeggaγin. Akken tedda amecwaṛ, tbedd. Tbedd γef yixef n yiwet n lmuja, tsawel, dγa wwin-as-d akkeṛus-is. Akken kan tulli sufella, dγa zzin-as-d igeniwen⁸ n waman. Usan-d γer-s s tazzla : wa icennu, wa iceṭṭeḥ, wa yeṭṭef-as lemri akken as tt-wali iman-is. D tagi i d tarkeft i yeddan d Wnisa, tgennawt n tayri, imi tekker ad tekcem γer yilel ameqran.

Di lawan-nni, Psukki, γas akkenni tecbeḥ i tmuγli, γas akkenni ttmeslayen akk medden fell-as, γas akkenni ccenun fell-as, maca ulac argaz, neγ agellid, neγ ageldun, ulac ula d ameṛkanti, i d-yusan γer-s, s lebγi di tmuγli, akken a tt-ibeggen. Ttwalin, s tidett, ccbaḥa-s akken ttwallin agelma n tgennawt. Snat yessetma-s-nni timeqranin, ulama akkenni tiff-itent di ccbaḥa, ur cennun ara fell-asent di tmurt akken ccenun fell-as nettat, maca acḥal ayagi tura i deg ddant d tislatin, uγen-tent igelliden imeqranen, yerna nnan gant tisulya yelhan. Psukki, γas akken d tilemẓit, tecbeḥ, maca ur d-tufi ara isli ara tt-id-yeksen di lxiq-nni deg tella. Tezga tettγimi weḥd-es, tettṛağğu. Tra ad tḥemmel, tra ad teddu d tislit am yessetma-s-nni, maca γas akkenni irgazen ḥemmlen akk ccbaḥa-s, ulac deg-sen win i d-yerzan fell-as amnaṛ n wexxam. Deg wakken tuyes, tuγal tekṛeh ccbaḥa-nni-ines. Baba-s yewhem imi ulac win d-yusan ad s-d-yesuter yelli-s, yuγal ikcem-it ccekk, yugad ammer ahat yeserfa igennawen. Xerzen-as-tt. Yiwen wass, yekker, yunag γer Milittus⁹, akken ad yeseteqsi Uṛaklum Apullun. Imi yewweḍ, iεelq-as i ugennaw ameqran n wemkan-nni s wezger, yezla-yas-t, isuter deg-s akken ad as-d-yefk i yelli-s isli, am yessetma-s, ad tesali ula d nettat axxam. Apullun, agennaw n wemkan-nni, si tama-ines, yerra-yas-d awal.

Agellid-nni, netta yellan zik yettnecṛaḥ, iḥemmel ad yeḍs, iḥemmel ad yezhu, atan tura, deg wasmi d-yezzi deg Uṛaklum n Apullun, yexser wudem-is, yeḥzen γef wayen i wumi d-yesla, γef wayen s-d-yenna ugennaw n ccbaḥa. Imi s-yules i tmeṭṭut-is, i tgelliṭ, ayen d-yesla, rran-tt di sin i imeṭṭi. Ttrun, ttlumun, ttcetkin. Maca ussan ttγawalen, Uṛaklum-nni n ugennaw Apullun tewwi-yas-d akken ad yeḍru. Kkren, ugellid d tgelliṭ, bdan la ttheggin taqufett d wayen akk ilaqen i yelli-nnsen i wasmi ara teddu d tisilit, asmi ara s teṭṭef afus tayri γer tsulya n lmut.

Imi d-yewweḍ wass-nni, ula d tafat n isufaḍ tuγal d tawraγt, tettezγuγud kan,tra ad texsi seddaw wabbu aberkan d-yettefγen deg ixefawen-nnsen; lmuzigga n tjewwaqt n tsulya tuγal d ṣṣut n leḥzen; ccna n talwa¹⁰ yuγal d ameğğed, ma d tislit, ad terfed kan s yeẓri, a d-ḍeggrent wallen-is tirgwa. Atah wamek muggren imezdaγ n turbit-nni tawaγit i d-yerzan γer wexxam n ugellid-nnsen : gezmen-tt d awal, sbedden akk lecγal-nnsen, ass-nni n tmeγra, akken ad d-begnen lγiḍ-nnsen γef wayen iḍerrun.

Maca ayen ran igennawen ad yeḍṛu, ad yeḍru : ilaq-asen i imezdaγ n turbit-nni d imawlan-is ad awin Psukki γer tmenjaṛt i tt-yeggunin. Akken thegga tqufett, maca mačči n tsulya, d tinna n at-laxeṛt, fγen iqefafen deg wexxam n ugellid, yefγ-d γer-sen i meṛṛa wegdud, yusa-d ad yeddu d tgeldunt-is. Psukki tettru, imi teẓra mačči γer zzhu n tsulya ara tinig, maca γer lweḥc n lmut. Γas akkenni, tedda d usensu-s, ṭṭfen abrid γer uẓekka-s, s ccna n at-laxeṛt. Zwar ad bdun tikli, baba-s d yemma-s, yellan yid-es, bdan ttlumun, kkaten di lbext-nnsen d wayen yeḍran yid-sen. Kukran ad ṛuḥen, ugaden ad siwḍen yelli-nnsen s amkan. Psukki, imi ten-twala akkenni , tenṭeq γer-sen, tenna-yasen :

"Ayγer ara ternum anezgum i yixef-nnwen ? ayγer ara ternum taderkent imeṭṭawen i tewser yeṭṭfen tifekka-nnwen ? Ayγer ara terrem takurt deg idmarren-nnwen d yedmarren-iw s wannect-agi n nnehtat ? Ayγer ara tkerzem udmawen-nnwen, widak-nni akken ttwalliγ zik-nni am yiṭij, s tregwa n imeṭṭawen ? Ayen ara tenγem deg wallen-nnwen tamuγli-w ? Ayen ara tettqezziεem acebbub-nwen amellal ? Ayen ara tekkatem deg idmarren-nnwen, deg idmarren-nni iyi-d-yessekren ? Attan zdat-wen terzeft n ccbaḥa-w. D tiyita n lmut i d-wwint Tismin. D tinna i wumi tḥulfam. D ayen, tfut tegnitt, teṭerḍeq. Asmi akkenni i d-ttasen ttzuṛun-iyi yegduden, asmi akkenni igan tifrent, sawlen fell-i am yiwen, gan-iyi d "Wnisa tamaynut", ass-nni i wen-yessefk ad tḥeznem, ad tettrum fell-i, imi ass-nni i telfeγ, ass-nni i yawn-ṛuḥeγ. Ẓriγ, wallaγ-t tura, d isem-agi n Wnisa iyi-gan akka. Awwit-iyi, eğğet-iyi γef wecṛuf, get ayen wen-d-yenna Uṛaklum. Ḥareγ ad isineγ tagara n tsulya-agi-inu tucbiḥt. Ḥareγ ad waliγ isli-w, winna akkenni ara yuγalen d argaz-iw, winna iyi-d-tefka twenza-w. Ayγer tettxatalem ? Ayγer iyi-tettefarem γef winna γef yura ad yessenger ddunit-agi ?

Akken sen-tenna imeslayen-agi, tga akka tekcem γer daxel n tqufett-nni, i yekkren ad t-tawi. Taqufett-nni terfed, tera γer wecṛuf d-yezgan γef yiwet n tiγilt. Akken tt-sawḍen iqefafen s amkan, sersen-tt γef yixef n wecṛuf-nni, ğğan-tt-in dinna weḥd-es, uγalen-d. Ğğan-n ar tama-s ḥaca isufaḍ-nni n tsulya, widak-nni wwin yid-sen, maca i sexsin s imeṭṭawen-nnsen. Iqefafen-nni, imi d-uγalen s ixxamen-nnsen, wwin-d iqurray-nnsen ger tuyat-nnsen. Ma d imawlan-nni-ines, agellid d tgelliṭ, deg wakken kkawent tgecrar-nnsen seg εeggu d leḥzen, kemnen γer uxxam, ṭṭfzn tasga n tellis, ggunin ad yezri yiḍ, iḍ i γezzifen akk di tudert-nnsen. Di lawan-nni, Psukki, tbedd γef yixef n wecṛuf, tettergiggi, tettru, tḥulfa i ubeḥri asemmaḍ n Zifirus¹¹, yebda yesluffuy i ddil-is. Yuγal isuḍ aceberber-nni-ines n teslit, icuff-it, yewwi-tt sdaxel-is. Irfed-itt yid-es, sennig wecṛuf-nni, yewwi-tt deg igenni, isers-itt deg tlemmast n yiwen welma, γef weksa.

Psukki tezdew γef weksa-nni alses¹², tefka llwi i tfekka-ines γef wusu n tmusayt¹³ i tessesmeḍ nnda. Degmi i ires acemma wallaγ-is, yekkes-as weγbel-nni tt-yeṭṭfen, tettu iman-is, dγa tewwi-tt tnafa. Imi d-tuki, tuγal-d deg iḍes, yetthedden wul-is, texzeṛ ar zdat-es, twala yiwen n tganba akkenni, γur-es isekluyen meqrit, dlen s waṭas n iferrawen d izegzawen. Twala diγen tala, aman-is ttbanen-as-d am lemri. Di tlemmast n tganba-nni, rrif n ucercuṛ-nni n waman, yefγ-ed yiwet n tmezduγt : ad s-tinniḍ d igennawen i t-yeẓan dinna. Akken kan ara tbeddeḍ γef wemnaṛ-is, ad s-tγellliḍ aql-ak di tmezduγt n ugennaw. Ṛṛef-is yettwaṛeqem s tuya¹⁴ d wubur¹⁵, ibedd γef tgejda n wureγ, ma d isudal¹⁶-is ttwadehnen s weẓref, swayes nejṛen fell-asen iγersiwen n teẓgi. Ad tkecmeḍ kan ad k-id-maggren. Winna yesawḍen ad yefk tudert i iγersiwen-nni, ad yili d amdan ameqran, ger wemdan d ugennaw, neγ d agennaw maḍi. Idγaγen swayes tewwt tγerγart n tmezduγt-nni, yettwanejren d tiḥjuṛin, ttwagan s ugemmas¹⁷. Ay arezg n win yufan tagnitt ad yesers aḍar-is, γas yiwet n tikkelt, γef yedγaγen-nni ! Ma di beṛṛa, deg ufrag, idisan n tmezduγt-nni, ama s tehri amas teγzi, ttwaclelen akk s wureγ ubriz. Isudal-is, deg wakken ttezruṛuqen, d nutni i ittaran tafat i wemkan-nni, deg treṣa tmezduγt-nni, ticki teγli tafukt. Tamezduγt-nni ur teli ssuma ! Ma sdaxel, kifkif, d tafat n wureγ i d-ttarant i tmuγli texxamin d ibelnumen¹⁸-is. Rnu-yas akk i wannect-nni, ayen akk yellan sdaxel, iga s wureγ d weẓref. Yal taγawsa s wazal-is. Yal taγawsa terra tiγri i tmezduγt-nni. Dinna, deg wemkan-nni, i imlal igenni d tmurt, dinna i yettemlil ugennaw t-izdeγen imdanen, deg uxxam-nni agenwi, winna yesuli Wubdir s ufus-is.

Psukki tettwajbed, am wezzal γer ddkir, s sser n wemkan-nni. Deg wakken tuyes ad tẓer ayen yeffer wexxam-nni, tga akka tuẓa. Tezger i umnaṛ, tekcem γer daxel. Allen-is ttazzalent, ulac tasga neγ taγawsa i γef ur risent ara. Tfur akk ayen yellan dinna, ayen d-tḥuzza tmuγli-s. Tettnadi, tufa akkin i texxamin-nni yellan sdaxel, tiḍwiqin, anda ttwafren igerrujen imeqranen. Ulac akk ayen yella di ddunit, ur tuffi ara dinna. Maca, annect-nni akk, mačči d ayen ttwallint wallen-is i tt-yeswehmen, ayen i tt-yeswahmen d amkan-nni, amek armi igerrujen-nni akk yellan deg-s, ur ttwafren ara. Tabburt n tmezduγt tezga telli, ulac ula d iεessasen i ittqaraεen fell-as.

Imi akkenni tettwali igerrujen-nni akk yellan zdat wallen-is, ayen s yezha wul-is, tesla i i ṣṣut n yiwet n taγect wer tafekka, tenna-yas-id : "Ayγer, a Tageldunt, i teggumaḍ ad d-tekkseḍ allen-im γef igerrujen yellan dag-i ? Annect-agi meṛṛa i inem. Ṛuḥ, kcem γer texxamt-im, ḍleq γef usu, akken ad tesgunfuḍ. Ma triḍ ad tcucfeḍ, cucef. Ticki, m ara tekfuḍ acucf, ad tafeḍ heggaγ-am tiremt n ugellid, ad t-tafeḍ tegguni-kem i imensi. Nekkeni i wumi d-tesleḍ, d taqeddact-im, anda twehaḍ aḍaḍ-im, ad t-ḍeferγ. Inni-d kan d acu i tebγiḍ, a kem-id-yaweḍ. "

Psukki tekkes-as tegdi, teẓra qurεen fell-as igennawen, qqurεen γef twenza-is. Tuγ awal i taγect-nni s-d-yemeslayen. Tekker ad tekkes εeggu di tfekka-s, tekcem γer texxamt-is, teḍleq γef usu, dγa tgen. Akken d-tuki, tezri ad tcucef. Imi tella tecucuf, twala γer yiwet n tdekkant, yellan ar tama n ubelnum deg tella, ijeqduṛen n umačča. Tettwali annect-nni meṛṛa i nettat, yettwafk-as-id akken ad tekkes anezgum deg ul-is. Texzer tiremt-nni, dγa tga akka tuẓa γer tdekkant-nni akken ad tečč. Mazal teqqim, yers-ed γer zdat-s ubinu d umačča. Tiram n umačč-nni s-d-yettwarsen di tḍebsiyin, mačči kan meqrit, maca lhant d ayen kan. Annect-nni meṛṛa ulac win sen-ten-yewwin, ad s-tinniḍ d aḍu i ten-d-yewwin ger igenni d tmurt, isers-as-ten-id-zdat-es, γef tdekkant-nni. Ulac anwa i twalla. Tsel kan i imeslayen, wissen anda d-tekken. Yerna tura mačči i yiwet n taγect i wumi tsel, aṭas yid-sent. Yal taγect d taqeddact. Tečča armi teṛwa, ikcem-d yiwen icennu, maca kifkif, ala taγect-is i wumi tsel, ur tezmir ara ad twali tafekka-s. Tesla diγen i wayeḍ yetturar snitra, maca, ula d netta, am winna icennun, ur d-iban ara. Cwiṭ akka, atentan rnant-d tuγac nniḍen, cennunt d tmezwarut-nni. D ṣṣut n waṭas n yemdanen i illan dinna, gan talilt¹⁹ n ccna.

Akken tekfa termelt²⁰-nni n wučči d ccna, tekker Psukki tekcem γer texxamt-is, akken ad tgen. Iḍ yuzzel yakkan imi d-yewweḍ yiwen ṣṣut γer imeẓẓuγen-is. Degmi akken tella weḥd-es, tkecm-itt tegdi. Tugad γef yiseγ-is. Ur teẓri ara d acu i yellan deffir n ṣṣut-nni. Ur teẓri ara d acu i tt-yeggunin. Atan yewwḍ-ed yesli-nni udrig. Yuli γer wusu-s, iga Psukki d tameṭṭut-is. Maca akken kan tefrari tafat, yeffeγ. Akken kan yeffeγ, uγalent-d tuγac-nni i yellan frent dinna di texxamt, beddent γer teslit-nni i wumi teγli tindert. Lhant yid-es akken iwata. Maca di lxiq-nni deg t-tella, ṣṣut n tuγac-nni, uγalent-as d lemwansa.

Di lawan i deg tella Psukki deg tmezduγt-nni n wergaz-is, imawlan-is, nutni, gguman ad εyun deg imeṭṭawen. Degmi ten-yeṭṭef wemnir γef yell-nnsen, yegguma ad sen-yebru. Rnu diγen tewser, si tama-s, ur ten-tqal ara. Teγli-d fell-asen γef tikkelt. Maca degmi yuzzel wawal fell-asen, snat n yess-nnsen-nni timeqranin, tidak-nni i yuγen igelliden, sslant, dγa ğğant ixxamen-nnsen, ula d nutenti, sennig wulawen-nnsent, unagent γer imawlan-nnsent, akken ad ten-wansent, ad kksent fell-asen amnir, γas ammer s wawal.

Iḍ-nni amezwaru, Psukki, γas akken ur twala ara argaz-is, maca teẓra yella γer yidis-is, tḥulfa-yas imi t-tnallen iḍudan-is, tesla-yas imi s-yenna : "A Psukki, Fertuna²¹ terfa, a tameṭṭut-iw tucbiḥt, tqureε-ikem, maca mačči s wayen yelhan. Ugadeγ fell-am, degmi i issefk ad tbeddeḍ γer yiman-im, ad tegreḍ tamawt akk i wayen d-iteddun γur-em. Yessetma-m, ḥulfant i lmut-im. Fγent ad nadint fell-am, ad nadint γef lateṛ n isuraf-im ineggura, ttazzalent γer yefri-nni, anda akkenni i kem-ğğan imawlan-im. Ma yella tesliḍ γer dinna i nnehtat d umeğğed, ur ttar ara awal. Ur ttmuqul ara akk γer tama-nni. Ma yella terriḍ-asent awal neγ tmuqleḍ γer tama-nnsent, atan ad terwi fell-am d fell-aγ. Ad γ-d-tegluḍ s twaγit tameqrant."

Psukki tenna ih, tgezm-itt ad teg ayen kan yefγen γef wergaz-is. Maca akken kan yeffeγ, tuffa-d iman-is weḥd-es, yerza-d γer-s lxiq-nni amcum, dγa terra-tt i imeṭṭi d nnehtat. Kra yekka wass d nettat d acetki, d nettat d asenekti. Tettγil-as s tidett temmut, tettwakbel s daxel n lḥebs n wureγ. Tegmeḍ γef yemdanen, ur tezmir ara ad tazzel akken ad tekkes anezgum i yessetma-s-nni yettrun fell-as, neγ xerttum, ad tent-twalli ula d awali. Rnu degmi d temekta ur gganent ara, ur tettent ara, ur cucufent ara, ur lint ara ula d win ara sent-yekksen γef wulawen-nnsent, dγa tebra i yeẓri-s. Tettru fell-asent. Tettru, armi tt-tewi tnafa.

Ur tmul ara, atan diγen yezzi-d wergaz-is, yeẓẓel γer tama-s, sdaxel n wusu. Yefka iγalen-is, dγa yesudel-itt γer yedmaren-is. Maca nettat tegguma ad tfak imeṭṭi. Yuγal yenna-yas : "Amek, d ayagginni iyi-tṛegmeḍ, a yul-iw ? D acu izemreγ ad t-gganiγ γer-m, a Psukki, nekkini, argaz-im, d acu izemreγ ad t-sirmeγ ? Kra ara yekk wass, kra ara yekk yiḍ, γas ula m ara d-tafeḍ iman-im ger iγallen n wergaz-im, d kemmini d imeṭṭi. Kker, awi-tt akkagi, err γer cafa, tḍeggereḍ iman-im. Mekti-d d acu im-nniγ iḍ yezrin, mekti-t-id asmi ara d-tafeḍ iman-im teṭṭef-ikem tmeddit."

Maca deg wakken tettezzi tetteneḍ, tettru, tesekna argaz-is, iqbel-as akken ad teg lebγi-s : ad twali yessetma-s, ad sen-tekkes anezgum, ad temeslay yid-sen. Γef wannect-agi i iqbel wergaz-nni-ines, yedda-yas di lebγi. Iqebl-as maḍi ad sent-tefk tarzeft n tγawsiwen n wureγ yellan deg wexxam-nni-ines; ad sent-tefk izurar akk i tebγa. Maca zwar ad teg ayen akkenni tt-yeggunin, yesmekta-tt-id ayen i s-yenna akkenni yakkan, yerna diγen yenna-yas ma yella twala yessetma-s, ammer anda sent-ttaγ awal ma nnan-as issefk-as ad twali udem n wergaz-is. Ammer anda lebγi ad tt-yawi γer txessaṛt. Ma tummen-itent, tra ad twalli udem n wergaz-is, atan ad d-tawi nnger i iman-is, ur mazzal ara akk ad tissin lḥamu n ger iγallin-is d talsest²² n yedmarren-is. Maca di talwa-nni deg tt-tella akken, tekkes-as aγbel : "Mmentif ad mmteγ wala ad bḍuγ yid-ek. Ddunit yid-ek kan i itelha. Ttriγ-k, ih, ttriγ-k am tbuhalt. Ay akken tebγuḍ tilliḍ-k, rriγ-k ugar n wakken rriγ ddunit-iw. Zdat wallen-iw, ttwalliγ deg-k d Tayri s timad-is. Maca ttxil-ek, qebl-iyi diγen taγawsa nniḍen : "Inn-as i Zafirus ad d-yawi yessetma γer da, akken iyi-d-yewwi nekkini." Tettmeslay-as, tessudun-it, teqqar-as awallen iẓidanen, teggar-as timeγlal, almi d-yuffa iman-is d ameḥbus ger yedmarren-is. Mačči kan tesluffuy-as, terna tettmeslay-as γer tmeẓẓuγt, teqqar-as : "A tament-iw, ay aragaz-iw, d keč kan i d ddunit n Psukki." Imeslayen-nni meṛṛa s-tenna stuffra γer tmeẓẓuγt, deg wakken lhan, sefsin argaz-nni-ines, iqebl ad yeg akk ayen s-tenna. Akken qrib ad yalli wass, dγa yenser ger yedmarren-is, yeffeγ.

Yessetma-s, akken kan wallant ifri-nni i deg ğğan imawlan-nnsent Psukki, uzzlent. Beddent suffella, bdant imeṭṭi d umeğğed. Snegrent iẓri-nnsent, kkatent deg idmarren-nnsent. Ayen akk yellan dinna, ama d idγaγen, ama d ifran, ttaran-d ahu i umeğğed-nni-nnsent. Ttrunt, sawalent s ṭṭelq n tuγac-nnsent s yisem n weltma-tsent. Ahu-nni n yedγaγen d idurar sawḍen tiγri-nnsent γer tmezduγt n Psukki. Nettat, akken d-tesla, tefγ-ed γer beṛṛa, tettergiggi., teqqar-asent : "D acu i kent-yuγen ? Ayγer tessaεyayemt di tuγac-nnkent s wannect-agi n imeṭṭi d umeğğed ? Ma fell-i i γef tettrumt, aql-i da. Aṛa-yakent asenekti. Sefḍemt imuyag-nnkent, widak-nni i deg iga imeṭṭi tiregwa, imi tura tzemremt ad tesudnemt weltma-tnkent tamecṭuḥt."

Psukki tsawel i Zifirus, yusa-d, imirmir. Iṣuḍ, yewwi-tent-id s ttawil, ur s-ukint ara akk i webrid. Atentad tura mlalent di tlata, myuṭṭafen, msudalent, msudanent : imeṭṭawen-nni-nnsent n llina, winna akkenni yekkawen, di talwa i deg ttellant, uγalen-d s wadda. Tenna-yasen-t Psukki : "Kecment γer wexxam. Kecmemt s ttlewliw γer wexxam-iw. Sfimt tisfi-nnkent deg yedmarren n weltma-tkent Psukki." Imi akken sent-ttmeslay, teskan-asent tiγawsiwin-nni akk n wureγ i tela deg wexxam-is, sslant i tuγac n tqeddacin-nni yellan deg wexxam, tidak-nni i iqeddcen fell-as, wwin-tent cucfent, syen sakkin, sarbin-asent-d akken ad eččent. Ayen akken wallant d wayen ččant, ur yezmir ara akk wemdan ad yili annec-ten, iban kan akka d agennaw i d bab n wexxam-nni, i d bab n trikka-nni akk i sent-id-yezzin. Degmi cucfent, ččant, sswant, dγa yebda igem deg ulawen-nnsent lebγi. Yiwet di yestmas-nni, teṭṭef iman-is, tuγal d ayen, ur tezmir ara ad tesusem, dγa testeqsa Psukki, tra ad ttẓer anwa i d bab n wexxam, anwa i d bab n cci-nni yellan seg-s, imi bab-is, γef wakken tettwali, iban kan akka d agennaw, yerna d argaz-is, degmi i tebγa ad tẓer amek i iga. Maca Psukki ur tettu ara d acu i s-yenna wergaz-is, teffer akk imeslayen-nni-ines deg ul-is. Tekker tesnulfa-yasent-id imirimir tamacahutt, tenna-yasent d yiwen ilemẓi, d azriru, i si tebda kan tamart tettara tilli i imuyag-is, maca degmi ara d-yekker d netta d ṣṣyada deg teẓegwa d idurar. Yerna diγen degmi akken tugad anda s-d-yettensar kra, tugad ad d-tesken lbaḍ-nni-ines teffer deg ul-is, imi akken yettiγzif umeslay, tebda tettcebbiḥ-asent s izurar, tettqen-qsent tixutam d tmengucin n wureγ. Tuγal tsawel-as diγen i Zifirus, tefka-yas-tent ad tent-yerr ansi tent-id-yewwi.

Akken kan d-tfuk awal, dγa yessetma-s-nni ufant-d iman-nnsent deg uxxam n baba-tsent d yemma-tsent. Maca tisiqest-nni n tismin, d ayen, tenta deg uksum-nnsent. Ttbanent-d deg imeslayen-nnsent, d wayen akk heddrent ger-asent γef weltm-tsent-nni tamecṭuḥt. Tagara n umeslay, yiwet deg-sent tenna-yas : "Aqla-kem, a Fertuna taderγalt, am wul igersen ! Amek armi tferqeḍ ger-anteγ, ger tyessetmatin i itḍen yiwet n tebbuct ? Amek armi γ-tefkiḍtiwenziwin timgaradin ? I nekkenti, nekkenti yellan d timezwura, nekkenti i wumi tefka twenza akken ad neqdec γef yergazen ibeṛṛaniyen, nenfa γer tmura n medden, agemmaḍ i tmurt n imawlan-nteγ, n wakal n baba-nteγ, nzerri ddunit-nteγ anda ur nẓer widak-nni γ-d-yurwen, am tmenfiyin; maca tamaẓuẓt, mesfeḍ εeddis, ulac d acu ur teli ara, ula d argaz-is d agennaw. Amek armi d nettat i wumi d-tesiḍ, nettat ur neẓrin ara anda ara terr ayen s-d-tefkiḍ, nettat ur neẓrin ara d acu ara teg s trikka s-d-tefkiḍ ? Twalaḍ, a weltma, acḥal d ssyaγa, yerna d tubrizt-nni, i ittexnunusen deg wexxam-is; twalaḍ iseγma n lkettan-is; udem uṛqim n isudal n wexxam-is; agemmas n tγerγert i d wannect-nni akk n wureγ i γef teddun iḍarren-is ? Dγa ma s tidett zrir wergaz-is, am wakken d-tenna, atan iban akka ulac tameṭṭut di ddunit i wumi tqeεed twenza am nettat. Rnu diγen, ma yella d agennaw i tuγ, tanumi d tayri, iban kan akka tagara ad tt-yerr d tagennawt. Ih, s Hiṛaklis, ar akka ara teffeγ. Di tura i tettwali iman-is d tagennawt. Twallaḍ-tt amek tuγal. Amek i tesuli ccan-is fell-anteγ. Di tura i tebda tettḍeggir tamuγli-is d asawen, ad tḥulfuḍ d tagennawt i yellan zdat-em, m ara tesleḍ i tuγac n yemdanen-nni iqeddcent fell-as, neγ m ara tesendah aḍuyen s timad-nnsen. I nek, nek i wumi tefreγ twenza, nek yuγen amγar yugaren baba, yerna aqerruy-is d aferḍas am texsayt, di teγzi annect n wegrud, yerna iẓerb axxam-is, s tsergal n wezzal."

Akken kan tsusem, tenṭeq tinna nniḍen, tenna-yas : "I nek, i wemγar iyi-d-yefka zzehṛ-iw, isεewj-it akk waṭṭan n yeγsan ? D acu ara ḍemεeγγer win yeknan, bexlaf imeslayen n tayri, i ittawi wul-iw s tmara ? Degmi ara d-kkreγ d nek d ddhin deg iḍudan-is uttilen, yeqquren am yedγaγen, serγayeγ ifassen-inu ileqaqen s tmassadin²³ ifuḥen, s iciffunen yerkan s yeẓmi n isafaren uγemilen. Atan ihi wamkan iyi-d-yefka lbext-iw. Mačči d amkan n teslit, d win n tefremlit yezgan deg iγilifen. I kem, a weltma, wallaγ d acu i yewwin wul-im d wallen-im, - ihi tura a d-inniγ akk ayen yellan deg-i -, amek armi tqebleḍ annect-a ? Nekkini, ur qebleγ ara ayen akka i iḍerrun, ur qbileγ ara ad ttwalliγ taqcict tettidir di trikka ur tuklal. Twallaḍ amek i γ-d-tettmuqul ? Amek i tesmγer iman-is fella-nteγ ? Amek i γ-d-tefser s zzux zdat wallen-nteγ ayen tela ? Twallaḍ-tt amek tettcuffu iman-is ? Twallaḍ amek γ-d-teḍegger tisugar n wureγ d wezref, ayen akken akk ur tebγi ara ad teqqen ? Twallaḍ amek i γ-d-tessufeγ imi teεya deg-nteγ ? Mazal nekcim, taεya deg-nteγ, tessufeγ-aγ-d di tnifift n waḍu, amzun akken mačči d yessetma-s. Am iniγ, aql-i mazal ur d-γliγ ara deg tqacuct n trikka-s. Tura, a weltma, ma yella iqeṛḥ-ikem wayen twallaḍ am nekkini, ilaq-aγ ad s-neddukkel i taluft-agi. Ilaq-aγ a d-naf ttawil amek ara s-nerr γef tengeft. Maca ayen akka d-newwi yid-nteγ, amer yella win ara t-iwallin ! Ad t-neffer ula γef imawlan-nteγ. Ulac win ara t-yeẓren. Amer anda sen-teqqareḍ mazal-itt tedder. Anef, nwalla kan nekenti ayen i wumi nendem imi ten-wala, ulayγer ara nazzal γer imawlan-nteγ d wegdud-nteγ akken ad sen-nnini anda tella. Imi akken qarren : ulac win yezhan di tilli n tmuγli n medden. Issefk ad tegzu taggara nekenti mačči d tiqeddacin-is, nekenti d yessetma-s timeqranin. Maca tura, ilaq-aγ a nezzi γer yergazen-nteγ, a nerzu γef yexxam-nteγ, γas ma d imeγban, maca zedigit. Syen sakkin, a s-nmeyyez i taluft-agi. Issefk-aγ ad d-nezzi s waggus idusen, akken ad neṛz di temcumt tisas."

Snat n tlawin-agi, akken diri ulawen-nnsent i diri-t wayen ttheggint i welmat-sent. Ffrent tirezzaf-nni i d-wwint γer Psukki, rwint imezran-nnsent, yerna deg wakken tt-d-saysent, gant akka xebcent akk udmawen-nnsent, teddunt ttrunt. Akkagi-nni i yuγalent γer yergazen-nsent. S wurfan d timuhbelt swayes i kkrent ad gent tixidist, neγ ma tram taballaγt tameqrant, i weltma-tsent tamecṭuḥt, tinna akkenni ur nuklal.

Maca, argaz-nni-ines, γas akken ur t-tessin ara udem-is, yal iḍ m ara gnen akkenni, ittales-as-d i Psukki awal-nni i s-yenna yakkan. Maca yiwen yiḍ, yenna-yas : "Twalaḍ tura, twalaḍ tawaγit i deg tgerḍ iman-im ? Fertuna attan ssi tebda kan teskan-ed tuγma-is, ma yella ur tεuseḍ ara iman-im, ma yella ur tbeddeḍ ara γer yiman-im, attan ur tettεeṭṭil ara ad t-tesker. Snat n temcumin-nni n yessetma-m rrant ad am-andint taqerract. - taqerract-nnsent tban, rrant ad wallint udem-iw, maca akken m-d-nniγ yakkan, ur tettwalliḍ ara udem-iw n tidett, ma yella twallaḍ win n wass-agi. Atan a d-assent i snat tterkat γer dagi-nni, - ad begsent γer nnger n uqerruy-im, - ad d-asent, ẓriγ - ammer anda tettmeslayeḍ yid-sent. Ma yella ul-im yelhan d tasa-m n tegmatt ur am-fkin ara afud akken ur tent-gedleḍ ara, m ara m-d-meslayent γef wergaz-im, ur sen-tesmuzgut ara, ur sent-ttara ara awal, imi, tura, ur nettεeṭṭil ara ad nesnerni tawacult-nneγ, imi taεbbuṭ-agi-inem, tagi d-yettbanen am tin n teqcict tamecṭuḥt, iḍ-agi ad terfed agrud, eg-it d tasraft i lbaḍna-nneγ, imi ma yella ur tusefγeḍ ara tufiγt, mim-m ad d-yeffeγ d agennaw; maca ma yella win i wumi t-tenniḍ, ad d-yeffeγ d amdan."

Ayen s-d-yenna akkenni yeččur d talwa ul n Psukki. Tezha s wayen tesla. Di tura i tettwali mmi-s d agennaw, tettawali iseγ agenwi γef twenza-s, tettwali iman-is ger tgennawin, d tayemmatt tegenwit. Ussan zzerin, agguren ṭaffaren-ten, tḥetteb, γas akkenni ikcem-itt unezgum, tewhem, teqqar-as amek armi tisegnit n wergaz-is teqs-itt kan akka acemma, yeṭṭef uεebbuḍ-is. Maca snat n Tfiγrin-nni n yessetma-s, ttsuḍunt mseblu am tzermatin, ṭṭfent yakkan illel. Ma d argaz-is, winna akkenni tuγ akken kan di kra n tegnatin n yiḍ, ihulfa-yasent, dγa yezzi γer tmeṭṭut-is akken ad s-yinni tikelt nniḍen : "D waggi i d ass aneggaru, d waggi i d ass n tidett ! Win i kem-ikerhen, winna akken ukud tecerkeḍ idammen, atan ibegs-d γer-m. Atant-aya s wefruy deg ufus, rrant ad m-t-tesunten-t di tgerjumt. A tawaγit, ah ay ayen d-iteddun γer-nneγ, a Psukki, a yul-iw ! Γur-em γef yiman-im d nekkeni, ṭṭef iman-im, segmeḍ nnger γef wexxam-agi, γef wergaz-im, γef yexf-im, γef mmi-nneγ. Ma yella d tilawin-agi, sut-tmegraḍ, tidak-nni i wumi ur zmireγ ad γreγ yessetma-m, imi m-buddent lmut, rekḍent aḥrir-nni n idammen kent-izdin. Ur tent-ttmuqul ara; eg ccmeε i imeẓẓuγen-im, ur sent-smuzgut ara m ara bdunt ttmeslayent-am-d am Tsirinatin, m ara m-d-beddent γef iceṛfan, m ara bdunt γeṭlent-d idurar s ṣṣut-nnsent ineqqen, s ṣṣut-nnsent izzerεen lmut.

Psukki, taγect-is, degmi d-neflen fell-as imeṭṭawen, tuγal ur tesefrah ara imeslayen, maca tenna-yas : "Aṭas ayagi tura, aql-i nniγ-ak, degmi i k-d-beggneγ tayri-w, tzemreḍ ass-agi ad tettekleḍ fell-i. In'as kan i Zifurus-nneγ akken ad yeg cceγl-is, imi iyi-tekkseḍ ula deg udem-ik agenwi, ur triḍ ara ad t-walliγ, eğğ-iyi xerttum ad walliγ wid n yessetma. Σennaγ-ak s tengaḍ-nni yezzin i twenza-k, s imuyag-ik fessugen am widak-w, s yedmarren-ik yerγan ur ẓriγ anta times i yuγen seg-sen, s tidett, akken rriγ ad iyi-d-tesekneḍ udem-ik, rriγ ad walliγ ulama deg wudem n luffan-agi yellan deg uεebbuḍ-iw, m ur tsudleḍ s idmarren-ik yessetma m ara d-kecment. I wudem n Psukki, i yettamnen ḥaca yis-ek, i ittidiren ḥeca i keč, di tudert yelhan. ma tgiḍ-tt, atan nniγ-ak ur mazal ara akk a k-d-sutreγ ad walliγ udem-ik. Ttwalliγ yis-s m ara d-yeγli yiḍ, aṛa-yi ! D keččini i d tiziri-w, d keččîni i d iṭij-iw."

Tettmesla-yas, tessudun-it. Yeskeṛ s simeslayen-nni d-yettefγen ger tcenfirin-is, tidak-nni i s-tesrussuy γef weksum-is. Iga akka, yeṭṭef amzur-nni n Psukki ger ifassen-is, isefḍ-as yis-s imeṭṭawen-is, yerna iṛegm-as ad yeg akk ayen tebγa. Akken kan s yenna akken, tulli-d tafrara, dγa yeffeγ zwar ad t-id-taf tafat dinna.

Snat n yessetma-s-nni n Psukki, degmi t-tefrant γef uqerru n weltma-tsent tamecṭuḥt, uysent ad zzint γer-s. Deg wakken uysent, ttunt ur dlint ara γef imawlan-nnsent. Akken kan d-ṣubbent deg uγerabu-nni ten-yewwin, uzzlent ullint γef wecṛuf-nni n Psukki, wwḍent kan ar taqacuct, bran i iman-nnsent deg yilem, maca Zafirus, γas akkenni sennig wul-is, ur yezmir ara ad yeṛz awal n ugellid-is, iεus fell-asent. Iṭṭef-itent-id ger igenni d tmurt, yewwi-tent, isers-itent s ttawil zadat wexxam n weltma-tnsent. Nutenti, akken kan rsent, wwḍen iḍarren-nnsent lqaεa, rran metwal tabburt n wexxam, kecment. Kecment kan, mγent γef weltma-tsent-nni, sudelent-ett γer wulawen-nnsent, bdant la tt-ssudunent. Rrant iman-nnsent ferḥent imi tt-walant. Ulac akk d acu i d-yettbanen γef wudmawen-nnsent. Frent turart-nnsent, akken ad siγent deg-s laman. Yenṭeq yiwet deg-sent γer-s, tenna-yas : "A Psukki, aql-akem mačči am tikkelt-nni yezrin, asmi telliḍ d taqcict tamectiṭuḥt, qrib tura ad tuγaleḍ d tayemmatt ! Tagi d tidett d tarzeft yelhan i s-γ-d-temuggreḍ ! Qrib ad yezhu wexxam-agi s-yis-em d winna akken yellan deg weεebbuḍ-im ! Mmi-m, aql-aγ dagi, d nekenti ara t-id-yesekren, mmi-m bu twenza n wureγ ! Ad nbedd γer-s akken iwata ! Ccbaḥa-s terra ahu i tinna n imawlan-is, d agennaw s timad-is ara d-illalen."

Kemmlent akkenni, s wawal aẓidan, tessunt-as leḥrir γef usennan cwiṭ cwiṭ almi ssaγent deg-s laman. Γwint-as allaγ-is, dγa nettat, di talwa-nni deg tt-tella, imi tent-twalla, tga akka tekkes fell-asent εeggu. Tuzen-itent cucfent s waman yaḥman, syen sakkin, tsersa-sent-id ad ččent. Ulac tiremt taẓidant ur ufint ara γef ṭabla. Akken ččant, tendeh Psukki γer snitra, tenna-yas : "Urar a snitra", dγa snitra tebda turart. Γas akkenni allen-nnsent ur wallant ara win yekkaten snitra-nni, maca ṣṣut n tmawayin²⁴-nni i wumi d-berrun lexyuḍ-is, yettawi di targit, itekkes iγeblan d εeggu. Maca γas akkenni, lmuzigga-nni d-yettefγen deg snitra-nni, ulama ẓẓidet am tamment, ur tessaweḍ ara akken ad teserḍeb ulawen n yessetmas-nni n Psukki. D idγaγen i yelant deg idmarren-nnsent. Kmant fell-as. Rannt iman-nnsent smuzgutent, maca ttxemmimnt amek ara s-tt-xerzent. Lmuzigga-nni tekkat, nutenti ttmeslayent-as. Ṛuḥent-as kan s ttawil, steqsayent-ett kan akka, am akken d awal kan i d-yettawin isteqsayen-nni nnsent. Steqsayent-ett ladγa γef wergaz-is, amek i iga ? Anda i illul ? ansi i d-yuγ aẓar ? Psukki, s nniya-ines, tettara-yasent γef isteqsiyen-nni-nnsent, degmi tettu d acu i sent-tenna yakkan, tikkelt tamezwarut imi ten-twalla, dγa tesnulfa-d iririyen nniḍen. Tenna-yasent d akken argaz-is yekka-d di yiwet n tmurt tuqribt; d ametjaṛ, γur-es aṭas n lecγal. Tenna-yasent d akken yeffeγ di temẓi, yewweḍ d argaz, ula d aqerruy-is yebda yesemγay-d anẓaden imellalen. Tettmeslay-asent, tettakk-asent, am tikkelt-nni tamezwarut mi d-usant, tiγawsiwin n wureγ. Syen sakkin, tefka-tent i Zifirus, yerra-ten γer wansi d-kkant.

Imi akkenni tent-yerfeḍ waḍu azuzan n Zifurus, isers-itent γer wanda tent-id-yerfed, zwar ad zzint s ixxamen-nnsent, tenna-yas yiwet i tayeḍ : "Twallaḍ, a weltma, lekdeb n tungift annect-it ? Iḍelli kan tenna-k d ilemẓi, akken kan bdan wanẓaden meqqin-d deg udem-is, tura yuγal d argaz, mγin-d γef userruy-is wanẓaden imellalen. D acu-t wergaz-agi, deg ullay ar uγelluy, teγli-d fell-as tewser. Nek ttwalliγ, a weltma,snat n temsal deg wayen akka γ-d-tenna : sal d timucuha i γ-d-tesawal, sal werğin ur teẓri argaz tt-yuγen. Anda tella tidett ? Issefk ad tt-nenadi di trikka-ines. Tura, ma yella ur tessin ara udem n wergaz-is, iban kan akka d agennaw i tuγ, yerna diγen d agennaw winna akkenni yellan deg uεebbuḍ-is. Tezṛid, a wer tt-id-yaf wass-n, - issefk-aγ ad neg aweγzi akken ur d-iḍerru ara, - imi ammer ad tuγal yiwen wass d tayemmatt n ugennaw, nek ad xenqeγ iman-iw, aql-i nniγ-am !

"Ssisbedda, di sya ar azekka, kker ad nuγal γer imawlan-nteγ, dinna a nkemmel ameslay-nneγ. Syen imiren, a s-neqqim i taluft-agi akken iwata, a s-d-naf tifrat-is.

Deg wakken ttwaceγben wallaγen-nnsent s taluft-nni n weltma-tsent, unzent s ubellez γef iquuray n imawlan-nnsent. Rnu degmi diγen ur ginent ara deg yiḍ-nni, azekka-nni, akken kan tefrari tafat, ṭṭfent abrid γer wecṛuf-nni n weltma-tsent, beddent dinna, bdant ttrunt, rrant iman-nnsent ttwaγent, qqarent-as i weltm-tsent : "Ay arezg-im, kemmini tezhiḍ, ulama ur teẓriḍ ara d acu i kem-yettṛağğun. Yethenna yexf-im. Maca nekkenti, nettqaraε fell-am. Aqla-γ ikecm-aγ weγbel-im, ur neggan ara uḍan. Nesla - yerna d tidett, nekkenti yettḥulfun s isegli²⁵-m, ur nezmir ara ad neffer fell-am ayen yellan - nesla d azrem annect-ilat, itettel γef wagim n tyersiwin, amgerḍ-is yeččuṛ d mseblu, imi-s d tasraft tuzzirt, d netta i d-yettasen yal iḍ yeggan s tuffra, yeggan γer tamma-m. Mekti-d uṛaklum n Apulun, winna i m-yennan ad taγeḍ lweḥc ucmit. Aṭas n imeγrusen, n inegmaren d imezdaγ n tmurt i t-iwallan tameddit n wass, m ara d-yekcem s axxam, yečča yeṛwa, iεum-d deg wassif-nni d-yezgan ar tama n wanda yezdeγ. Im' ara tmeslayen, qqaren-as ur kem-yesseččay ara akka i lebda s tiram yilhan, yesseččay-ikem akken ad yumγur mmi-m-nni yellan deg uεebbuḍ-im, asmi ara yemed, syen sakkin, a kem-yesgumeḍ. Ihi, tura, ṛṛay atan ger ifassen-im, d kem i iwallan, ma tumneḍ yesetma-m, i m-yuḍnen aγbel, triḍ ad tselkeḍ di lmut, γas kan rwel, zzi-d ad tidireḍ yid-nteγ; ma yella ur γ-tumineḍ ara, atan ad tettwantleḍ deg iẓerman n wezrem ur nettqilin. Ma yella tettwazdγeḍ s tuγac-nni yezdγen axxam-im, s tayri n wer udem, s tudert n tuffra, s lxiq d ddunit wer amwanes, s tsudanin n tqemmuct n wezrem, ḥṣu akka, nekkenti, s yessetma-m i kem-yettrin, nεeggen-am, nenna-yam d acu i illan".

Psukki, deg wakken yelha wul-is, imi sen-tesla akkenni i imemslayen n yesetma-s-nni timeqranin, tkecm-itt tegdi. Yerwi wallaγ-is. Tettu akk ayen s yenna wergaz-is, tettu diγen ayen i s-tṛeggem, degmi tuzzel γer tesraft n twaγit. Tuγal d tawṛaγt, fγen-tt idammen, tkecm-itt targiggit, tekker a ttsuγ, maca taγect-is tekkaw, tettmeslay, maca tekfa deg-s tsuḍutt :

"D kunemti, a yestma ttriγ, tgamt tassefkt²⁶-nnkent, ayen ttgent tyesetmatin yelhan i weltma-tsent. Maca agad i went-yennan annect-agi i wumi sliγ, iban kan akka ur d-giren ara. Imi werğin ẓriγ udem n wergaz-iw, ur ẓriγ ara ansi d-yefruri. Selleγ kan deg yiḍ i taγect-is, maca ur ẓriγ d acu-t. Yerna, tafrara, akken kan ara d-teffeγ tafat, ad yerwel. Annect-agi meṛṛa wwiγ-t, ulac d acu i d-nniγ. Degmi i kunt-umneγ, iban kan akka mačči d amdan. Yessagad-iyi akken ur ttnadiγ ara a t-walliγ, akken ad walliγ udem-is. Tura, aql-i γer-kunt, d kunemti kan i izemren ad iyi-tselkemt, di tballaγt-agi, i deg lliγ. Uḥwağğeγ-kent. D lawan ad d-gremt iman-nkunt, mulli atan ma teğğamt-iyi ger ifassen-is, ma tγeflemt, nnger-inu zekka ad yesfeḍ akk ayen iyi-tgamt yelha iḍelli."

Ihi, degmi sγeflent weltma-tsent-nni tamecṭuḥt, yesetma-s-nni timuqrarnin, temcumin-nni, tenṭeq yiwet γer-s, tenna-yas : "Imi tagmatt-nteγ tga akken ad kem-tefdu, deg wezrem bu tsuqas, γef wakken nmeyyez i taluft-agi, ad m-nesken abrid ara kem-yawin γer tissensert. Ddem-d lamca qeṭṭiεen, effer-itt seddaw wusu-m, γef yidi-s anda tegganeḍ; syen sakkin, refd lamba, ččaṛ-itt d zzit akken ad tefk aṭas n tafat, tγumeḍ-tt s tuggi. Ammer yella win ara kem-iwallan, ha ! Im ara d-yelef γef tεebbuṭ, m ara d-yali γer wusu, eğğ-it alama yeẓẓel, tewwi-t tnafa tamezwarut, mi yekcem di telqayant-nni, - yeshel a s-tfiqeḍ, ad s-tesleḍ yesgunfuy-, imir ṣubb-ed deg usu, ṣubb-ed ḥaffi, s tuffra, γef yixef n tfednin, sufγ-d lamba-nni seddaw tuggi, inn-as i tafat-nni n lamba ad m-d-tesken asulef i ilaqen akken ad tgeḍ ayen im-yessefk ad tgeḍ : lamca m sin yixfawen uqḍiεen deg ufus-im, rfed afus-im ayefus, ur ttkukri ara, tgezmeḍ-as aqerru γef yixef, deg wemkan i deg yemlal d wemgerḍ-is. Nekkwenti a nilli γer tama-m. A kem-nεiwen. Akken kan ara t-tenγeḍ, dayen tselkeḍ aqerruy-im, siwl-aγ-id, nekkenti a kem-inawḍen. Mi yemmut, a d-nerfed akk ayen yellan deg wexxam-im, a t-id-nawi. A nuγal s axxam, ad m-d-naf argaz, ad tεiwdeḍ tisulya.

Akken kan saγent times s imeslayen-nnsent, times deg uksum n weltma-tsent, ğğant-tt, rewlent, ula d nutenti d- iheggan taxessaṛt-nni, ur rint ara ad illint dinna. Rekbent γef wafriwen n Zifirus, irefd-itent, yerra-tent γer wansi tent-id-yewwi, γer wecṛuf-nni n weltma-tsent. Wḍent kan, netlent, ur iban ara anda uγalent, wissen d igenni i tent-irefden neγ d lqaεa i tent-yesbelεen.

Psukki tuffa-d iman-is weḥd-es. Yuli-d wemnir γef wul-is. tḥulfa i iman-is tettwarfed, am wakken γef lmuja n yillel n ccina (Chagrin). Maca tgezm-itt d ṛṛay-is : ad teg ayen s-d-nnant yestma-s-nni. Γas akkennni, skud yettaẓ-d lweqt-nni, amek akken, ikecm-itt ccek. Teεweq amek ara teg. Ur tri ara ad s-taγ awal i twaγit-nni deg wayeg d-tufa iman-is. Attan tekker, attan teqqim, lid-is ad tezḥel, lid-is ad talway, tettergiggi, tugad ad teg ayen s-d-nnant akken yesetma-s-nni. Degmi akken teεweq, tuγal terfa. Terfa, imi γas ma tra ad tneγ azrem-nni, maca diγen d argaz-is, ulac d acu i s-yexdem. Tameddit-nni, akken kan d-tewwi iḍ, tga akka dγa thegga akk ayen ilaqen i wakken ad teg taxxesart-nni γef tt-weṣant yesetma-s. Yewweḍ-d yiḍ, yewweḍ yid-es wergaz-is. Uraren akken acemma, dγa ẓẓlen akken ad gnen. Si yemdel kan allen-is wergaz-nni-ines, dγa yekcem di tnafa tuzzirt, ad s-tinniḍ yemmut. Psukki, γas akken ulwayit iffadden-is d wallaγ-is, maca tufa-d afud swayes tekker, tekks-ed lamba-nni seddaw tuggi, tesaγ-itt, tjebd-ed lamca seddaw wusu, tewwt argaz-nni-ines.

Maca, akken teḍwa tafat usu-nni-nnsen, twalla Psukki, deg lewḥuc akk tessen, werğin teẓri am winna yellan igen γer tama-s. Tmuql-it, twala-t : d amdan azriru, d agruraz, d ageldun n yergazen, d agennaw n ccbaḥa, d Iṛus s timad-is. Akken kan t-twala lamba-nni, ula d nettat, tzad tafat-nni-ines, teqqim teftilt-is akka i tceṭṭeḥ di talwa zdat wudem n wergaz-nni. Ula d lamca-nni i teṭṭef Psukki deg ufus-is tettban-as-d tendem i wayen tekker ad teg. Psukki, imi d-tuki di yir targit-nni-ines, tewwt γef wallaγ-is, ur tuffi-ara. Tuγal d tawraγt, teqqaṭṭer, fγen-tt idammen, tettergiggi am asaflaw. Teγli γef tgecrar, tra ad tesentu lamca-nni-ines deg idmarren-is nettat. Tra ad tenγ iman-is, mačči d akellex, ammer ukkan s-tuγ awal lamca-nni. D acu imi tεedda ad tt-tesentu deg idmarren-is, lamca-nni tugad ad tneγ tamgerṭ. Teγli-yas deg ufus, trewl-as. Psukki taεya, kfan-as ifadden zdat wudem n wergaz-nni-ines. Teqqur zdat ccbaḥa n wudem-ines agenwi. Tuγal tekker, tunez γef uqerru n wureγ, tesself-as i umzur-is. Amzur-is yettwadhen s umebruz²⁷, tamgerṭ-is d tamellalt am yizir uyefki; timuyag-is d tizeggaγin, ssubbent-ed fell-as tengaḍ n wemzur-is n wureγ, llant kra mallent γer zdat, tiyaḍ γer deffir, ttiṛiqent, rnant tafat i lamba-nni. Γef tuyat-is, twalla snat n tafriwin, akk d wanciwen d iγuzfanen, d imellalen am yefsan, gnen γef uzagur-is. Rric n wanciwen-nni-ines d ilegγanen, d ifessasen, ttembiwilen, guman akk ad rekden. Ad s-tinniḍ yetthuzzuten waḍu. Ma d tafekka-s, temed d ayen kan, taglimt-is d leḥrir, ma nniγ-awen tezmer ad tzux tgennawt Wnisa t-id-yurwen, tezmer. Γer uḍar n wusu, γer tama-s, tres teγlaft n inecaben d uγafa : timseggaf²⁸ n ugennaw uzmir.

Psukki teṭṭef aγafa-nni d inecaben-nni n wergaz-is deg ufus-is, tettmuqul-iten, teddawaṛ-iten, tuγal tekks-ed di teγlaft-nni n inecaben yiwen, teself i tqamumt-is, tezri-t γef uḍaḍ-is, tga akka tettekka-yas, dγa ixef unecb-nni yekcem deg uglim-is, dγa aḍad-is yebda yettergeggi, imirmir bdant teffγent-d deg-s tmiqwa n idammen d tizeggaγin. Psukki tḥulfa i tawla n tayri tuγ akk tafekka-is, dγa yebda wul-is yekkat γef Iṛus. Tekker tmes deg-s, tebγa argaz-nni-ines mačči d kra. Skud tessikid-it, skud yettumγur lebγi deg ul-is. Tuγal teddem-d lamba, tekna γer-s, tebda tesuden-it s lemγawla, maca s uxatel, imi tugad ad t-id-tesaki deg iḍes. Deg wakken tebγa argaz-nni-ines, tebra i iman-is, tebra i wul-is, tettu iman-is, wissen d yir zzheṛ, wissen ahat d lebγi ad tawi tamgerṭ, wissen ma yella imi tennul tafekka tucbiḥt n udiyus-nni, neγ ahat di talwa-nni i deg ttetela akkenni, ur teẓri ara d acu i txeddem, imi afus-nni-ines yeṭṭfen lamba imal, dγa yeγli tiqqit n zzit, akken trekkem, γef tayett tayeffust n ugennaw-nni. Ah ! a lamba uxessar, a tin wer nettkakri, a yir taqeddact n tayri, teqdeḍ agennaw, teskenfeḍ aglim-is - Imi d nettat i d tamezwarut i yesknen s tafat-is i tinna yettrin, tinna yebγan ad tfares, deg yiḍ, winna akken d-yesakin lebγi-s. Degmi akken yerγa, agennaw yuki-d. Imi iwala akkenni, tinna i wumi yefka laman ur teṭṭif ara deg wawal-is, dγa iga akka yeffeγ deg uxxam, awal ur t-id-yuli ara, γas akkenni Psukki nettat tettejguggul deg-s, tesudun-it, akken ad yeqqim. Agennaw-nni, netta, yekka deg derig n tebbur, yefferfer deg igenni.

Psukki, imi akken yuffeg deg igenni, teṭṭef deg uḍar-is ayeffus, tedda yid-es. Tedda yid-es, tulli yid-es di tegnawt. Tḍefr-it almi wwḍen s asigna, taεya, tebra-yas, dγa teγli-d ar lqaεa. Maca agennaw-nni, ur tt-yeğği ara, akken tewweḍ kan ar lqaεa, iṣub-ed, ibed γef tqacuct n yiwen useklu ukuṛfus²⁹, winna iqerben γer tizi, degmi d-yeqlalaleḥ wul-is, yenna-yas : "Ttuγ ayen iyi-tenna yemma Wnisa, tra a kem-twali d tameḥbust deg urγu n tayri γef wergaz ucmit, winna ara m-yeskeṛan ddunit-im. Ferneγ s tayri akken ad d-afgeγ alama d γur-em. Imi d-ufgeγ, lliγ fessuseγ, maca agennaw bu uγafa yesblisi iman-is s yiman-is s unecab-is, wwḍeγ armi kem-rriγ d tameṭṭut-iw. Tagara, tettwaliḍ deg-i lweḥc, triḍ ad iyi-tekkseḍ aqerruy, winna akken yettawin allen yeččuren d tayri, tidak ur nettwali acemma, bexlaf kemmini. Atah γef wacu im-d-εelmeγ, d annect-agi i yugadeγ a d-yeḍru yiwen wass. Maca yesetmam-nni, tidak-nni yettrayen fell-am, ur ttεeṭṭilent ara ad selkent tifidi iyi-d-wwin yilsawen-nnsent. Ma d kemmini, ulac d acu ara m-geγ, tewwi-yi-d kan ad kem-eğğeγ." - Akken kan yekfa ameslay-is, iwwet s yiffer, dγa iγewwes deg tegnaw.

Psukki, tefser di lqaεa, teḍfer s wallen-is argaz-is imi yulli deg igenni, tettwali deg-s almi d ayen ur tezmir ad teḍfer tmuγmi-s. Skud yettali, skud yettali-d wagu γef ul-is. Maca degmi iγab deg tegnewt, yekksas-t lebεed γef tiṭ-is, dγa tuzzel γer yiwen wasif, yellan ar tama n tizi-nni i deg tella, tjeleb ar daxel. Maca asif-nni, winna akken deg yesared ugennaw tifidi-is s-yesreγ zzit, i wudem-is, irefd-itt, yerra-tt γer daxel tnifift, yewwi-tt s lemḥadra, isers-itt γer rrif, deg yiwen wemkan, yessan s weksa d ijeğğigen.

Fanes, agennaw n lexlawi, tuγ-it tegnitt dinna, γef yiri n wasif, yeṭṭef Iku³⁰ ger iγallen-is, yesselmad-as ccnawi. Ar tama-nnsen, kessent tγeṭṭen-is. Kessent isekla d-yemγin ar tama n wasif, ttjelibent, i tent-yettawin deg wemkan γer wayeḍ. Fanes, agennaw n lexlawi, akken iwala akkenni Psukki, tesmuγben, yerwi wemzur-is d wudem-is, degmi yeẓra d acu i tt-yuγen, isawel-as s tuffra, iεreḍ akken ad s-yekkes γef ul amnir s wawal aẓidan : "A taqcict tucbiḥt, nek d ameksa, d axelwi, maca d awesur, aṭas i yeddreγ, ssneγ-tent akk. Γef wakken ttwalliγ - di tegnitin nniḍen llan wagad yeqqaren nettkacaf - nnehtat-agi-inem, tewreγ-agi d-yullin γef wudem-im, aḍar-im iteddun s ukukru, rnu-yas allen-im yekkawen deg imeṭṭi, iban kan akka yejreḥ wul-im, iban kan akka d tifidi n tayri. Ssel-iyi-d, a yell-i, ur ttnadi ara γef lmut, ekkes amnir deg ul-im, suter di Iṛus, agennaw amuqran, err-as tajmilt yuklal i ilemẓi iḥemmlen tayri, zzhu d tiẓeṭ n tudert."

Imi yettmeslay ugennaw-nni n imeksawen i Psukki, nettat ur s-tenni wara, tesmuzgut-as kan, tefṛeḥ s wayen s-yenna. Akken yekfa ameslay, dγa tkemmel abrid-is. Tedda amcwaṛ, ur teẓri ara s anda t-tawin iḍarren-is, i yellan yakkan kawen. Maca tegguma ad tbedd. Tetteddu tetteddu, almi yeγli yiṭij, tufa-d iman-is deg yiwet n turbit, anda yegled yiwen deg yergazen-nni n yiwet di yesetma-s. Akken kan tewweḍ, dγa terra ur wexxam n ugellid-nni, tesuter weltma-s-nni, dγa ğğan-tt tekcem. Tesunef yis-s weltma-s-nni akken iwata, msudant-nnent, syen sakkin testeqsa-tt weltma-s γef yeswi n trezzaf-is, dγa tenṭeq Psukki γer-s, tenna-yas : "Tecfiḍ γef wawal iyi-tenamt : rfed lamca, enγ lweḥc-nni, winna d-yettasan yeggan γer tama-m, winna i yettaran iman-is d- argaz-im, zwar ad iyi-sgumeḍ netta, ad iyi-ger deg tesraft n yimi- s ? Ihi uγaγ-akent awal, kkreγ ad t-nγeγ, maca imi wallaγ udem-is s tafat n lamba, wallaγ ayen ur uminent ara wallan, wallaγ udem n ugennaw s timad-is. Wallaγ Iṛus, mmi-s n tgennawt Wnisa, yeṭṭes ar yidi-s-iw, allen-ines medlent. Degmi i yekker lhewl deg-i deg wayen ttwalliγ, zdat wannect-nni n ccbaḥa, εewqeγ anda ara tesudneγ. Bdiγ ssuduneγ-t akken yeṭṭes, maca ur ẓriγ d acu i yeḍran, immal ufus-iw, teγli tiqqit n zzit di lamba-nni, akken teṛγa, teqed-it di tayett, dγa yuki-d. Akken kan d-yelli allen-is, iwala-yi-d s lamca d lamba, yenna-yi-d : "Kemmini, γef wakken iyi-d-tettbaneḍ tzemreḍ ad tenγeḍ tamgerṭ, γiwel, effeγ deg usu-w, tuγaleḍ γer imawlan-im. Ma d nekkini d weltma-m - dγa ibedr-d isem-im - d nettat ara aγeγ. Akken iyi-d-yenna awal-agi, dγa isawel i Zifirus, yenna-yas ad iyi-yawi agemmaḍ n wanda yettilli, ad iyi-sebεed fell-as."

Mazal ur d-tfuk ara ameslay-is Psukki, tewwt tsiqest n lebγi d tismin, tidak i izemren ad nγent tamgerṭ, deg ul n weltma-s-nni. Tesleb. Imimir tufa-d timsensert, tṛuḥ ar wergaz-is, tenna-yas tesla mmuten imawlen-is. Syen sakkin, tekker teṭṭef abrid metwal acṛuf-nni n weltma-s, maca ass-nni d aḍu nniḍen i d-iṣuḍen, mačči d zifirus, deg wakken tt-yesderγel usirem, tmeğğed, tenna-yas : "Aql-iyi-n d abrid γur-ek, a Iṛus, d nek kan i tuklaleḍ d tameṭṭut. Ma d kečč, a zifirus, d acu i tettṛağğuḍ, awi-yi γer-s." - Dγa tga akka, tesewseε, tḍegger iman-is deg ilem, dγa tezwer s uqerruy. Teγli γef iceṛfan, iγsan-is ṛzen akk, ma d aglim-is icerreg akk, iṛuḥ akk d tifawtin - tečča tiyita-nni akken tuklal - temmut dinna, gan-tt d tiremt-nnsen yefṛax d lewḥuc.

Weltma-s-nni tis-snat, kifkif, ula d nettat, ur tmul ara teḍfer tamezwarut-nni. Imi Psukki, akken kan temmut weltma-s-nni tamezwarut, teṭṭef abrid γer weltma-s-nni nniḍen. Imi tewweḍ, terra metwal γer wexxam-is, tenna-yas ayen akken akk s-tenna i tmezwarut-nni. Dγa ula d nettat, akken kan tesla i weltma-s-nni, tuzzel γer wecṛuf-nni, tra ad tesulli d Iṛus, dγa tegra-d anda d-tegra weltma-s-nni tamezwarut, deg uεebbuḍ n yefṛax d lewḥuc.

Syen sakkin, Psukki teffeγ, tebda anadi γef Iṛus. Ur teğği tamurt. Ma d netta.

Iṛus, imi akken teṛγa tayett-is, tekker lγawya, tetbirt-nni tamellalt n yemma-s, thuz afriwen-is, tuzzel s lemγawla, teγmes deg yillel, tṛuḥ, γer wanda tella Wnisa, tgennawt n tayri, tecuccuf. Akken kan tt-iwala wefṛux-nni, ires ar tama-s, yenna-s mmi-s yeṛγa, yettumert, wissen ad yidir neγ ad yemmet. Yenna-yas igduden akken ma llan ḥaca γef wayagi ittmeslayen, qqaren-as netta yentel imi yeḍfer tameṭṭut γer wedrar, ma yella d kemmini, terriḍ-tt ala i wcuccef deg yillel - γef wayagi ur d-teqqim li-d d ccbaḥa, li-d d tagrurezt, li-d d tiẓet n tudert. Imdanen uγalen d lewḥuc, ur ssinen ara ad idiren, ttgen ḥaca ayen ur nlaqen ara, ulac win yessuliyen, tekfa tfilya deg wulawen, imawlan nekṛen arraw-nnsen, tarwa tenkeṛ imawlan-is; d ayen ur d-yegri wara, kulci yefs-ed, kulci yerwi, s kra n wayen yelhan yezdin imdanen yeṛz.

Atah d acu i s-yenna wefṛux-nni ačewčaw i Wnisa, tgennawt n tayri d ccbaḥa. Wnisa, akken kan tesla i wayen s-d-yenna wefṛux-nni, terfa, dγa tsuγ, tenna-yas : "Ddreγ i wass i deg tameṭṭut tuγal d tamestart γef mmi ? Keččini, ay afṛux, a win yellan s idis-iw di yal tagnitt, ama telha ama diri-tt, ini-yi-d anta i s-yewwin ul-is, anta i yessufγen mmi aleqaq, mmi bu nniya, i webrid, ini-yi-d anta : ama tcetl-ed deg ugdud n Nunfat neγ Tmuṛiyin³¹, neγ deg talilt n Tmuzatin³², neγ ahat di terbaεt n Tegrurazin³³, tiqeddacin-iw."

Afṛux ačečaw γezzif yiles-is, yenna-yas : "Ur ẓriγ ara anta, maca γef wayen sliγ, ma yella ur t-tuγ ara, d yiwet n teqcict i wumi γarren Psukki, nnan yeṛγa fell-as." - Wnisa tečča times, imi tesla i yisem n Psukki, tuγwas ugar n tikkelt-nni tamezwarut, tenna-yas : "Tinna akkenni i yettakken anzi γur-i ? Takniwt-iw ? D netta i γef yerγa mmi ? Amer ahat mmi yettγil d nekkini i s-tt-yeseknen, d nekkini i t-iwelhen γer-s akken ad tt-iḥemmel ?"

Akken mazal-itt tettuγu, tefγ-d deg waman, tekcem γer texxamt-is n wureγ. Tufa dinna, akken wen-t-id-nenna yakkan, mmi-s d amuḍin. Ssi telli kan tawwurt, tsuγ : "Almi d tura i tgerrez ! Yerra-d fell-aγ wayen tgiḍ ! Tura tgerrez s tidett imi trekḍeḍ γef wawal n yemma-k ! Iwakken ad ttreγ d nettat fell-ak, tagara d keččini i deg tekker tmes n lebγi. Keččini yuzlen γer wusu-s, tegneḍ yid-es, yerna tesarmeḍ akken nekkini ad qebleγ taεdawt-iw ad tuγal d tislit-iw ! Tinna akken yugi wul-iw, yugi lxaṭer-iw ! D acu i tettγileḍ, ay ameslub, ay ulac, tettγileḍ-as ḥaca keččini, yellan γef tizi n temẓi, i izemren ad d-tarweḍ, tettγileḍ nekkini d tawsurt, ur zmireγ ara ad d-arweγ ? Ḥsu ihi akka deg wass-a d asawen, zemreγ ad d-eğğeγ aqcic nniḍen, win ara k-yiffen, win ara iyi-ttaγen awal ! Neγ ahat ur ttarweγ ara, akken ad d-erreγ ttaṛ-iw, ad d-sekreγ yiwen deg iqeddacen-iw, a s-geγ tafriwin-ik, times-ik d inecaben-ik. Ad s-efkeγ akk ayen k-efkiγ akken ad tgeldeḍ γef tayri. Ad ten-efkeγ i win yessnen amek ara ten-yesexdem, imi keččini ur tesseleḍ ara i yemma-k ! Ad k-kkseγ ayen k-efkiγ, imi ayen akk teliḍ, inu, ulac d acu i yettal-as baba-k ! Maca akka deg wasmi meẓẓiyeḍ, ur tettagadeḍ yiwen, ulac win tqaleḍ, ulac win teğğiḍ, am atmaten-ik imeqranen, am yemma-k, tenγiḍ baba-k, nekkini acḥal n tikkelt iyi-tεeraḍ! Acḥal n tikkelt iyi-tewteḍ ! Teḥqeṛḍ-iyi, am akken d tamengurt ! Ula d argaz-iw ur tettagadeḍ ara, bab n lgirra, ula d netta tegliḍ yis-s. Acimi ara tagadeḍ ? Acḥal n tikkelt i tjerḥeḍ ul-iw s tlawin s-d-tettawiḍ ! Maca ad tendemmeḍ i wayen txedmeḍ, a sent-teddemeḍ i turarin-agi-inek, tisulya-k ad k-tt-rreγ d qeḍran d meruyet ! Imi triḍ ad tkelxeḍ fell-i, ad twalliḍ ! D acu aεni i tenwiḍ ad k-txedmeγ ? Anida ara rreγ ? D acu i ilaqen akken a s-kkseγ tisiqest i wezrem d-urweγ ? I wumi ara cetkiγ ? I Tmudest³⁴ ? Nettat i γef tekkseḍsser acḥal n tikkelt s wayen txedmeḍ ! Isem kan n tagi k-yewwin ul-ik, aṛa, akken ad neγniγ, akken a d-iluγ yilel-iw ! Xuḍi, yella ttaṛ, yegra fell-i ! Ad tqebleγ ansi yebγu yekk-d ! D nettat, fell-as ara ṛuḥeγ ad nadiγ, a tt-id-awiγ akken a k-tmerret ! Akken ad iyi-d-taγ llza ! D nettat ara s-yekksen ineccaben-is, ara sen-yeseḥfun tiqumam-nnsen, ara s-yeselwin amrar n uγafa-s, ara s-yexsin taftilt-is, ara t-iεettben, ara s-ikemlen i tmeṛγiwt-is s isafaren ur neseḥlayen ara. Ur surufeγ ara ḥacama tgezm-as amzur-is, winna akkenni i wumi εyiγ slufuyeγ. Amzur -is n wureγ, winna akkenni iṛeqqen ger iḍudan-iw. Ur telzeγ ara ḥacama tkebl-as afriwen-is, widak-nni akkenni zgiγ dehneγ s nextaṛ³⁵γef irebbi-w !"

Akken s-ten-tfuk, teffeγ-d deg wexxam akken s wurfan, takurt tettṣubbu tettalli deg idmaren-is. Tetteddu, attan tmugr-d Kirez d Yunyu. Imi wallant akken udem-is yerwi, steqsant-tt γef ssebba iγef teffer s wurfan cbaḥa n wallen-is. Dγa tenna-yasent : "Tusamt-d swaswa kan, akken ad tefkemt i wul-iw deg tekker tmes ayen yebγa. Ttxilkent, gemt akk ayen yellan deg-kent akken ad iyi-d-tafemt tinna akken iselben mmi, taqeddact yenfan di tmurt-is. Wissen anda teferfer ? Imi teslamt ayen yiḍran deg uxxam-iw, d wayen iga winna akken ass-a γunzaγ ad siwleγ mmi."

S tidett, nutenti, slant s kulci, ẓrant d acu i yeḍran. Bdant a s-ttmeslayent akken ad sexsint times n wurfan-nni yekkren deg ul-is. Nnant-as : "D acu akka n leεğeb-agi iga mmi-m imi akka triḍ ad s-tcewqeḍ ayen yebγa wul-is, imi akka tebγiḍ ad tenγeḍ tinna γef yekkat wul-is ?" D acu i ixdem ? Ayγar akka terfiḍ fell-as ? Imi yeḍfeṛ taqcict yebγa wul-is ? Aεni tettuḍ, mmim-m atan γef tizi n temẓi, yecbeḥ fell-as ad inadi γef teqcicin ? Neγ ahat ur tebγiḍ ara ad twalliḍ yerra fell-as yezha wul-is ? Yecbeḥ am temẓi-s ? Amek, aεni tettuḍ d kem i t-id-yurwen, kem t-yeṭṭafaren akken ad teẓreḍ d acu i ixeddem; anta i γef yettezzi, ur teẓriḍ ara annect-agi meṛṛa γer-m i t-id-yewwi, deg-m i t-id-cettel ? Amek armi tessaγayeḍ times-im deg ulawen n medden, maca imi tekker deg uxxam-im, triḍ ad tt-tesexsiḍ ? Tettakeḍ tawla n lebγi i meṛṛa medden, maca tekkseḍ-tt i mmi-m, tugiḍ tayri deg wexxam-im, am akken γer-m d ayen n dir-i ?"

Tiggennawin-nni, Kirez d Yunyu, degmi ttagadent inecaben n lebγi n Iṛus, rrant ad s-εeğbent, kkatent fell-as, ttmeslayen ayen yelhan fell-as i yemma-s. Γas akken ulac-it dinna. Wnisa, ur s-hwin ara imeslayen-nni s-nnant tgennawin-nni n teγrest d tsulya; tezzi-yasent azagur, teṭṭef abrid γer yillel.

Psukki, nettat, tuffa-d iman-is tetteddu ur teẓri sani. Tetteddu iḍ d wass, tettnadi argaz-is. Tuyes akken ad twali, ad s-tekkes urfan s weslufu neγ d imeṭṭi. Yiwen wass, twala yiwen wades γef yixef n yiwen wedrar d aεlayan, tenna-yas : "Wi ẓran, ammer ahat dihin i izdeγ wergaz-iw ?" dγa tulli yiwen webrid γer wemkan-nni, γas akkenni abrid-nni yezzi, yesawen, εeggu yessefcel ifadden-is, maca asirem d lebγi ttdeggiren-tt γer zdat, γer yixef n wedrar-nni. Akken tewweḍ s amkan, tekcem γer wades-nni, anda yetṛen ugennaw-nni. Twala sufella n wetṛun-nni n ugennaw tigedrin n yirden ẓdant am tsukraf n wemzur, ttwadewrent am twenziwin n igeliden. Γer tama n tgedrin-nni, llant tgedrin n temẓin. Llan diγen imegran d dduzan nniḍen n tmegra, rsen wa γef wa, deg tγerγert. Psukki teddem dduzan-nni, tqeεd-iten, tesrs yal yiwen deg wemkan-is, tebrez axxam-nni n ugennaw akken iwata, terra-t akken ilaq ad yilli wexxam n ugennaw. Tga akk ayen ilaqen akken ad d-teserḍeb igennawen d tgennawin, ammer ahat ur ttakken ara afus deg-s.

Imi tella tqeddec, tberrez ades-nni, tufa-tt-id Kirez, tgennawt n teγrest. Akken kan t-twala, tuγwas, tenna-yas : "D kemmini, a Psukki ? Wnisa, tagennawt n tayri, tettnadi fell-am, ur teğği amkan. Tettnadi lateṛ-im iḍ d wass, yegna wul-is fell-am, tra ad d-terr ttaṛ-is deg-m. Ma d kemmini, tusiḍ-d γer wexxam-iw, telhiḍ yid-es, tettuḍ d acu i kem-yeggunin ?"

Psukki tekna zdat Kirez, tebda tettru. Tetteru tessirid-as iḍarren-is i tgennawt, ma d amzur-is itenḍ-d tiγerγert n wades-nni. Tettru, tendeh yis-s, tettḥawat deg-s, teqqar-as : "S ufus-im ayeffus, winna izerεen, s tmegra d wayen i γef tgeldeḍ, s iḍaṛfan n tyerza n wakal n Sisilya, s ukeṛus-nni swayes yesafer Blutes yelli-m Piṛsifunya, s uṣubbu-ines γer ddaw inefri n ddaw tmurt, s tsulya-s d ugennaw n lmut, s tsusmi yedlen udrigen³⁶ n Yilusis³⁷, ttxilem, aql-i seddaw uḍar-im, sselk-iyi, sselk Psukki d-yerran γer-m, ar ddaw laεnaya-m. Anef-iyi ad freγ dag-i, deffir tgedrin-agi; anef-iyi ad freγ dag-i ḥacama kksen-as wurfan i Wnisa, tgennawt tameqrant. Anef-iyi ad freγ deg wexxam-im, eğğ-iyi ad sgunfuγ kra n wussan, εyiγ di tikli."

Tenna-yas Kirez : "S tidett kan, imeṭṭawen-im gezmen tasa-w, maca ur bγiγ ara ad ṛzeg ageṭṭum deg ufus n tgennawt iyi-ttilin, tinna ukud iyi-tezdi tfilya, tagennawt ittri wul-iw. Γiwel, effeγ deg wexxam-agi, tereḍ-iyi tajmilt imi ur kem-ṭṭifeγ ara d tameḥbust daginni !"

Psukki, degmi s-tugi Kirez ad teqqim deg wades-is, tḥulfa i ifadden-is kkawen. D timseqeft. Tga akka tṣubb-d adrar-nni, tezger tiẓgi tameddit, almi tewweḍ γer luḍa yellan seddaw wedrar-nni. Dinna, di cwiṭ n tafat-nni d-yeqqimen zwar a d-teγli tellis, yiwen wayru³⁸ d acebḥan, win t-yesulin, ulac akk d acu i ittu. Imi t-twala, yefṛeḥ wul-is, tesarem ad taf deg-s laεnaya, ar ugennaw neγ tgennawt i t-izedγen. Tenna-yas ahat ammer ad tt-isellek neγ ad t-tesellek di taluft-ines. Tuẓa armi tewweḍ γer zdat n tebburt n wades-nnni, twalla, deg urti-nni, εelqen γef ifurkan n waṛburen akk d tebburt n wexxam-nni rrdat, ttwareqmen s wureγ, widak-nni d-ttawin yemdanen i umezdaγ agenwi n wexxam-nni. Rrdat-nni, yura fell-asen yisem n tgennawt i wumi ten-wwin lγaci. Psukki tuγal f tgecrar, tesudel alter³⁹ n wades-nni, akken d asemmaḍ, tesfeḍ imeṭṭawen-is, tenna-yas :

.............................................................................

"A weltma-s d tmeṭṭut n Wubdir, agellid ameqran, anwa i kem-iwallan asmi d-tluleḍ ? Anwa i islan i ṣṣut-inem asmi d-tesusiḍ ar ddunit ? Anwa i kem-yeẓran anta i tetḍeḍ asmi d-telliḍ allen-im ?

Illi-kem ar yidis-iw, sdar-iyi deg wayen iyi-ggunin, a Yunyu Taseṭart, nekkini i wumi kkawen ifadden di tikli d trewla, kkes-iyi-d di tesraft deg lliγ. Aεni mačči d kemmini i yettεawanen tilawin yellan s tadist ? Aεni mačči d kemmini i ittmaggaren timenifriyin ?"

Degmi s-tecetka i tgennawt tameqrant Yunyu, ur tḥulf' ara, attan tbedd-ed γur-s. Tagennawt tefγ-ed di tafat am tgelliḍt, teḍwa akk ayen s-d-yezzin, tenna-yas : "Riγ am efkeγ ayen iyi-d-tesutreḍ, maca ur bγiγ ad snuγnuγ Wnisa, tislit-iw ittriγ am yell-i. Ulac d acu i wumi zemreγ, a yell-i, mgal tagennawt Wnisa. Ur zmireγ ara ad snubgeγ s win d-yusan γur-i ma yella igennawen nniḍen ur bγin ara. D lqanun, ur iyi-d-tewwi ara ad sdariγ asklaf irewlen i bab-is."

Psukki tkeffel-itt-id tidi tasemaḍt imi tesla i imeslayen n tgennawt Yunyu. Teẓra dayen, ulac d acu ara tesirem deg yinig-nni-ines, ur tettaf ara akk argaz-is bu tafriwin. Dayen, d akeddaṛ, ur tezmir ara ad tettkel γef yiwen, tmeyyez, dγa tefra-tt d ṛṛay-is, tenna-yas : "D acu i mazal-iyi ad tgeγ tura, imi ula d tigennawin, γas rant ad iyi-εiwnent, ur zmirent ara ? Aql-i am win yettwaṭṭfen deg ucebbak, anisi ara efγeγ ? Anida ara erreγ ? La d-iteddu yiḍ, anda ara efreγ, anida ara dergeγ i tiṭ n lbaz n Wnisa, tagennawt tameqrant ? Ay ul-iw, uγal d aẓru, wexeṛ-ik i unadi γef wayen ur tezmireḍ ara ad tafeḍ, wexeṛ-ik i taluft k-ibeεden, rfed ifassen-ik, ṭṭixer i unadi ameslub, ṛṛuḥ, magger tagennawt n tayri, bedd-as γef tebburt, ayen ibγun yeḍru, ammer ahat ad tesḍerbeḍ ul-is, ad s-kksen wurfan ? Ṛuḥ γur-es, ammer ahat dγa dinna, deg wexxam-is, ara tefeḍ mmi-s, winna akkenni tḥemmleḍ, winna akkenni γef tettnadiḍ ?"

Degmi t-tegzem di ṛṛay-is akken ad tṛuḥ ad tmagger ayen tt-yeggunin, ad tmagger tagara-s, taggara i deg ur t-tsellik yiwen, maca γas akken, tebda tettmeyyiz amek ara t-tmagger, d acu ara s-tinni akken ad tefduaqerruy-is.

Wnisa tesbedd anadi-ines s ttawilat n lqaεa, tulli γer igenni. Terfed akkeṛus s-d-ihegga Bulkan, uḥeddad ameqran, winnna akken s-yefka d tarzeft n tayri, zwar teddu d tislit γer wexxam-is. Ger tetbirin akk yettweḍifen γef texxamt n tgennawt, ṛebεa mugrent-tt-id s talwa, dewṛent timegraḍ-nnsent (noirées), uγalent rsent γef (joug) n lmeṛjan, imi tadiyust tella tettali deg tegnewt, bdant cennunt s ṭṭelq n tuγac-nnsent. Di lqaεa kifkif, iẓiwcen d yefṛax nniḍen, slan kan i tetbirin, bdan tturaren, cennun. Yal yiwen anda d-yettuγu, maca llan ger-asen wagad icennun s laεqel, gerwen-d akk akken ad maggren tagennawt n tayri. CCna n yefṛax-nni, timawayin-nnsen d-ttawin, ẓidit am tamemt. Isigna, nutni, ttwexiṛen akken ad tezger yelli-s n iginni, akken ula d igudar d yesγan, win i tt-iwalan kan ad yuγal di rrif akken ad ttεeddi. Ma d titbirin n tgennawt, nutenti tturarent di tegnawt, ceṭṭḥent, ulac akk d acu ara agadent.

Wnisa terra metwal tamezduγt n Wubdir, agellid n igennawen, testeqsa γef Merkur, agennaw n inminigen, akken ad tt-iεiwen deg unadi γef Psukki, imi netta γur-es taγect tettawi. Ubdir ur ur s-d-yenni ara uhu. Imirmir, tewwi-d yid-es Merkur, dγa ṣṣuben-d γer lqaεa, maca deg wakken tuyes, tenna-yas : "A gma n Aṛkadiya, yak teẓriḍ weltma-k Wnisa werğin tga kra ma ulac gma-s Merkur, yerna diγen γur-ek azen, ttnadiγ acḥal aya tura γef yiwen n tqeddact-iw, trewl-iyi, ur ẓriγ ara anda tella. Degmi k-id-wwiγ, ttekleγ fell-ak, γur-ek taγect tdus, issefk-ak ad tegreḍ tiγri, a k-d-slen di yal amkan, ad sen-tiiniḍ i imdanen d acu ara s-efkeγ i win ara d-yinin anda teffer. Γiwel ger tiγri, siwḍ-asen azen, inn-asen amek tga akken ad tt-εeqlen, akken diγen ma yella win yeskadben, winna azekka ur ilaq ara ad d-yinni ur ẓriγ ara." - Akken kan s-tenna akka, Merkur yeṭṭef abrid, ma d nettat tekcem γer wexxam-is.

Merkur iteddu γef tmura yettberriḥ akken ad yesiweḍ awal n Wnisa i imdanen : "S kra n win iwallan neγ yeslan anda teffer yiwet n tqeddact n tgennawt Wnisa, i s-irewlen, yiwen ur yeẓri anda tella. Taqddact-agi d yelli-s n yiwen ugellid, γaren-as Psukki, win yeẓran anda tella, issefk-as ad yazzel ad s-yinni i Merkur, aneglus n igennawen, ad t-yaf akin tlisa n Muṛkiya. anda ara d-yawi tarzeft γer tgennawt n Wnisa stimad-is : win d-yezenzen anda teffer Psukki, ad tesuden 7 tikal s tcenfirin-is, d tikelt s yixef n yiles-is, tasudent i wumi qqaren tasudent n tament."

Imdanen akken kan slan s wazen-agi, ikcem-iten akk uferfur, ran akk ad ten-tesuden tgennawt Wnisa. Psukki, imi tesla ula d nettat s wazen-nni n Merkur, dγa kksent-as akk lemkakrat. Imi tesla s wannect-agi, tella yakkan tewweḍ γer zdat wexxam n Wnisa, anda d-tmugger dγa yiwet di tqaddacin-nni n tgennawt., tinna i wumi γaren Tanumi. Akken kan tt-id-twala, dγa tsuγ, tenna-yas : "Ah ! Almi ttura ! Aεni temektaḍ-d γur-m tamastirt ? Ad teṛwuḍ ṛṛay-im, yir ṛṛay kem-yesufγen i webrid, ur teẓriḍ ara aεni acḥal-ayagi d nekweni d anadi fell-am ? Maca tura mi-d-teγliḍ ger ifassen-iw, ulac anda ara terreḍ, aql-akem ger ifassen n Waydes, ad txelseḍ ayen ur teččiḍ !" Syen teṭṭef-itt deg ucebbub, tezzuγer-itt γer wexxam, ma d Psukki tefka-yas llwi, ulac akk d acu i d-tenna. Tḍefer-itt s tsusmi. Wnisa, akken t-twala akkenni zdat-es, tettwarez, teṭerḍeq d taḍsa, maca d taḍsa-nni n wurfan, tuγal tesenhez aqerruy-is, tger yiwen uḍad deg umeẓuγ-is ayeffus, tenna-yas : "Ccwi, atan tusiḍ-d xerttum ad tanzeḍ γef uqerru n temγart-im ! Neγ ahat mačči γer wannect-agi i d-tusiḍ, tusiḍ-d akken ad twalliḍ argaz-im, ma teḥla neγ ala tfidi-nni s-tesekker tmes-im deg idmarren ? Maca kkes aγbel, ad sunebgeγ yis-em akken tesnubgay temγart s teslit-is." -Tuγal texzeṛ akka d wakka, tsuγ, tenna-yas : "Anda llant tqeddacin-iw Taγbelt d Tuḥzint ?" - Tiqqedacin-nni yellan dinna uzlent akken ad sent-siwlent.

Akken d-kecment, dγa Wnisa tefka-yasent Psukki akken ad t-tmertent. Taγbelt d Tuḥzint refdent Psukki, wwint-t, γlint fell-as s ujelkiḍ. Kkatent-t almi εyant, rrant-t-id akken ad t-twali Wnisa. Wnisa akken t-twala, teneqneq d taḍsa, tenna-yas : "Walimt-t kan, tettγil ad iyi-tγiḍ imi s tadist i tella. Tettγil ahat ad s-feṛḥeγ, ad d-yiḥnin wul-iw, ad iyi-tesfṛeḥ imi tettawi deg wadis-is mmi-s n mmi. Dayen iyi-d-yeqqimen, ad yezhu wul-iw m ara s-sleγ yessawal-iyi-d Yaya γef tizi n temẓi-w, yerna d mmi-s n tqeddact, yerna ad s-sawalen mmi-s n mmi-s n Wnisa. Ula d nekkini, ttmeslayeγ γef dderya, d tsulya wer telli, imi mmi d tqeddact-is sullin deg lexla, ur sεin ara inigi, degmi llufan-agi yella deg udis-is d aḥḍiḍ ara d-illal, ma yella ğğiγ-kem ad t-id-tarweḍ."

Ur tekkis ara urfan s rregmat, tuzzel γur-es, tcerg-as lqec-is, teγli fell-as d tiγrit. Akken tekfa, tesendeh tiqeddacin-nni-ines wwint-as-id irden, timẓin, llεes, aseṛγu, lḥemẓ, ibawen, tesdukkliten d tirect, tenna-yas : Tura, ad ẓreγ d acu i tessneḍ ad tgeḍ. Ad rferneḍ tirect-agi aεeqa aεeqa, yal sekka ad tgerweḍ weḥd-es, tameddit a d-zziγ ad walliγ, ilaq ad kem-d-affeγ tfukeḍ tanuyt-nnsen."

Akken kan s-tefka d acu ara texdem, Wnisa tekker, teffeγ, tṛuḥ ad d-tečč deg yiwet n tmeγra n tsulya. Psukki teεweq anisi ara tebdu, teqqim kan tettmuqul, teggugem zdat tirect-nni, tḥulfa i tkurt n wurfan tettṣubbu tettali deg idmarren-is. Cwiṭ akka, atta tεedda-d yiwet n tweṭṭuft d tamecṭuḥt, imi twala akkenni Psukki, tameṭṭut n ugennaw ameqran, kfan-as ifadden zdat cγel-nni tt-yeggunin, tγaḍ-itt, tγaḍ-itt ugar i tugad urfan n Wnisa, dγa tga akka tsawel i tweḍfin yellan deg leğwayeh-nni, usant-d, tenna-yasent : "Ahamt, a yess-is n wakal, a tayemmatt n ddunit, eğğemt akk lecγal-nkemt, kkeremt ad tselkemt tameṭṭut n ugennaw Iṛus, taqcict tucbiḥt attan di tizi l-lγila ! ' - Dγa tiweḍfin-nni γlint am lmuja γef tirect-nni, yal yiwet deg-sent γur-es 6 tqejiṛin, bdant tanuyt, ur d-teγli ara tmeddit kfant, feṛqent yal aεeqqa weḥd-es, yal tirect s uεeqqa-ines, syen sakkin, netlent, ur iban akk ansi kkant.

Wnisa, akken d-yeγli yiḍ, attan tezzi-d di tmeγra. Tewwi-d yid-es tiwredtin, s lebεid ittraḥent. Tewweḍ-d kan, terra γer tslit-is, akken ad tẓer ma tga ayen s-tenna neγ ala. Imi tewweḍ, twala akkenni yal tirect tunna akken iwata, tenna-yas : "Mačči d kemmini. Mačči d kem i igan ceγl-agi s ifassen-im. Wagi d cγel n weqcic-nni akken i kem-iḥemmlen. Maca ur awen-ttefγent ara i yiri !" - Akken s-tenna akka, tḍegger-as tiḥdert n weγrum aberkan, dγa teffeγ, tṛuḥ ad tgen.

Iṛus, netta mazal-it di texxamt-is, i yellan deg yixef n wexxam, yettwaḥbes. Ttεasant fell-as tqeddacin-nni n yemma-s, ugadent ammer ad yekker, ad yemendaf : a d-yesfi tifidi-nni-ines, neγ ahat ammer ad yazzel, ad yekcem γer tinna akken yebγa. Akkagi i izrin yir iḍ Iṛus d Psukki, ddaw yiwen ṛṛef, maca γas akkenni, ran ad meẓren, ur zmiren ara.

Tafrara, akken kan tulli γef ukkeṛus-ines, Wnisa tekker-d, tsawel-as i Psukki, tenna-yas : "Twallaḍ tiẓgi-inna yeṭṭfen di rrif n wasif, i izegren tamda γer ugemmaḍ-inna, twallaḍ isekla-inna iγumen, dihina i tekfa, isekla-inna, nutni, γumen yiwet n tala ? Dihinna llant wuli kessent mebla ameksa, taḍut-nnsen tettiwriγ s tuṛeγt n tidett, azzel, awi-yi-d tazelt n taḍt-nnsent. Eg ayen im-yehwan, nek uḥwağeγ-tt tura kan !"

Psukki, akken kan d-tekfa awal temγart-is, tuzzel metwal tiẓgi-nni akken ad s-d-tawi taduṭ. Maca akken diγen ad tesgunfu akk deg wayen tt-yeggunin, tebda tettmeyiz ad ttḍegger iman-is γer wasif-nni. Maca akken tewweḍ γer wasif, atan yefγ-d deg-s uγanim d azegzaw, yewwi-d yid-es ccna yelha. Di lmuzigga d iseffeṛ waḍu deg weγanim, Psukki tesla i taγect, d taγect tagenwit, i s-d-yeqqren : "A Psukki, a tinna ṛzan iγeblan, ur sluγuy ara aman-iw, ammer ha anda tettmettat deg-sen, yerna diγenna, ammer ha anda tettnaleḍ ulli di lawan-agi n wass : skud iṭij iceṛq-ed fell-asent, skud iseḥmay taḍut-nnsent, a tent-tafeḍ tekker deg-sent tmes, s wenyir-nnsent yeqquren am adγaγ, s wacciwen-nnsen i imesdan am ijenwiyen, neγ tuγmas-nnsent yesmarrayen mseblu deg idammen, m ara rfunt, neqqent imdanen. Maca m ara yeṛez yiṭij, m ara qeglent rrif n wasif, m ara d-yekker waḍu asemmaḍ n uzizwu, imiren tzemreḍ ad teddariḍ tasaft-nni, wihina i d-ijebden aman deg wasif anda ten-id-jebdeγ. Syen sakkin, m ara twalliḍ ulli-nni qqiment ad sgunfunt, thennant, kemmini εeddi ger tbucicin, huz ifarrawen-nnsent, a d-teγli akk taduṭ-nni sent-teṭfent deg wass imi kessent. Ad t-tafeḍ teṭṭeε γer isennan d tidra n isekla."

Atah wamek i s-d-yenna uγanim-nni, atah d acu i s-d-yenna i Psukki akken ad tsellek tamgeṛṭ-is. Nettat, imi tesla i taγect-nni s-d-yettmeslayen, tesmuzget-as akken iwata, yerna texdem akk ayen s-d-tenna. Ulac akk d acu itettu. Teğğa ulli-nni armi qqment ad sgunfunt, tameddit, rrif n wasif, tezri ger tbucicin n teẓgi-nni, teččuṛ-d ijufaṛ n ddil-is d taḍuṭ n wureγ, tezzi-d γer Wnisa. Akken d-tewweḍ, txezṛ-itt tgennawt, maca tettban-d ur tumin ara d nettat i isawḍen tekksed taduṭ-nni γef uzagur n wuli-nni. Tečča-tt s wallen, tezmumeg d taḍsa, tenna-yas : "Ammer s-teqqareḍ d nniya, ẓriγ anwa i kem-iεawnen di taluft-agi. Maca tura, ad ẓreγ dγa ma yella tḥeṛceḍ s tidett, ma yella ulac taqcict nniḍen i yellan sennig-m. Twallaḍ ixef n wecṛuf-inna, tizi n wedrar-inna i wsawen ? Ttefγen-d dihinna waman d iberkanen deg yiwet n tala, aman-is ttṣubbun γer izuγaṛ, kečmen deg yimi n wasif n Stiks, winna yettawin γer tgelda n Waydes. Azzel, tura kan, agum-iyi-d di tala-inna d-yezgan sennig wedrar aman iberkanen, isemmaḍen, ad ten-tafeḍ di lqaε n tala, uḥwağgêγ aman-is tura kan. Azzel ččaṛ-iyi-d tafyult⁴⁰." Akken s-tenna akka, tefka-yas tafyult n krisṭal d tamecṭuḥt, tesugra-yas, tenna-yas, m ur-tt-id-teččuṛ ara, terwi fell-as !"

Psukki teṭtef abrid γer wedrar-nni. Kifkif, am tikkelt-nni tamezwarut, tettṛağğu ad taweḍ γer yixef n wedrar-nni, syen sakkin, a d-tḍegger iman-is, ad temmet, ad thenni di yir tameddut-nni-ines. Maca akken tuẓẓa γer tizi-nni, anda akkenni tella tala-nni, tbed, tmuqqel abrid tt-yeggunin, twala ulac akk anisi ara s-tekk i tala-nni. Tmuqel acṛuf-nni, mačči d ayen ara talli. Twalla-t sennig-s, annect-ilat, qeṭṭiεit weglan-is : idγaγen-is tecegen, ulac win izemren ad yeskurec fell-asen. Ma d tala-nni, tesxlaε : tefγen-d deg-s waman s tdusi, ggan aceṛceṛ d ameqran, ttṣubbun γef yedγaγen-nni, γzen-ten almi gan iγzeṛ i ittṣubbun γer uzaγar yellan seddaw wedrar-nni, syen sakkin kecmen seddaw tmurt. Γef tama tazelmaṭ d tama tayeffust n wecṛuf-nni, atna teddun-d γer Psukki iquṛṛa n tlafsiwin, teddunt-d γer-s γef uεebbuḍ, zegrent-d icelaḍen-nni n waman, imegraḍ-nnsent d iγezfanen, ma d allen-nnsent, zgant caεlent, ur qqemcent ara. Ttεasant. Kulci γef tiṭ-nnsent. Ma d aman-nni d-itefγen di tala-nni, ula d nutni ttmeslayen. Akken kan d-wallan Psukki, bdan ttuγun, qqaren-as : "Rwel ! ", "D acu i d-tusiḍ a d-tgeḍ dagi ?", "Σas iman-im !", "D acu i tebγiḍ ?", "Γur-m !", "Rwel !", "A ttemteḍ !" Maca Psukki tegguma a tembiwel, teqqur, tuγal d aẓru. Γas ma tafekka-s mazal-itt tebdeḍ, maca allaγ-is yegres zdat wannect-nni ttwallint wallen-is. Tikelt-agi teẓra dayen, ur d-tettuγal ara di tala-nni d tamuddirt. Deg wakken tegzem layas, ulac, ula d imeṭṭawen qquren deg wallen-is. Ulac anisi ara d-fγen. Yeqqur weγbalu n yeẓri-s. Maca Ubdir ur s-yettṛuḥu wara, degmi d-twala taqcict-nni akken, tbedd zadat n lmut, tγaḍ-it, dγa yuzna-s-id afṛux. D igider n Wubdir, i twala itezzi sennig uqerruy-is, yemekt-ad ayen iga yakkan s lameṛ n Iṛus, asmi iṛuḥ γer tmurt n Frigya, yewwi-d yid-es, ger wafriwen-is, ilemẓi ucbiḥ Ganimidi i umastir-ines Ubdir. Imekta-d Iṛus, dγa yuzzel-d deg igenni akken ad yefdu tameṭṭut-is zdat tlafsiwin-nni iteddun γer-s ad tt-sbelεent. Yufeg sennig-s, iself-as s yiffer-is, yenna-yas : "A tin yeğğa wallaγ, d acu i d-tusiḍ ad tgeḍ dag-i ? Tenwiḍ-as dγa ad tagummeḍ aman n tala-yagi kan akka ? Ur tezmireḍ ad tagumeḍ, ur tezmireḍ ad t-tawḍeḍ ! Ula d igennawnen s timad-nnsent, ula d Ubdir, agellid-nnsen, ttagaden aman n tala-yagi. S wacu i tettgalam s yemdanen ? S wacu ittgallan igennawen, ula d Ubdir, agellid-nnsen, s waman n Styks i ittgalla ! Awi-d tura tafyult-im. " - Mazal d-yekfi awal, yekksas-tt s waccaren-is ger ifassen-is, dγa yewwi-tt. Iteddu γer waman-nni, yezri ger tuγmas d yilsawen n tlafsiwin-nni, yal iles γur-es 3 tsuqqas, maca igider-nni, isexdem afriwen-is am imeqdafen, ikcem γer iceṛcuṛen-nni n waman, akken ad d-yeččaṛ tafluyt-nni. Aman-nni, nutni, imi t-wallan akkenni, ttuγun-d fell-as, qqaren-as : "Rwel, m ur tebγiḍ ara nnger n yixef-ik !" - Igider-nni yerra-yas, yenna-yas : "D tagennawt n Wnisa iyi-d-yuznen akken ad agmeγ deg-wen." - Aman-nni imi slan kan i isem n Wnisa, dγa rsen ciṭuḥ, ğğan igider-nni yewweḍ γer tala-nni.

Yeččuṛ-d tafluyt-nni, yefka-tt i Psukki. Dγa tesaweḍ-itt imirimir i temγart-is. Maca γas akkenni, Wnisa gguman ad sekksen wurfan. Teṭṭef tafyult-nni n waman, tmuqqel-itt, tezmumeg d taḍsa, tenna-yas : "Ttwalliγ-kem d m ikururren, tesneḍ i kulci, tzemreḍ i kulci, kem i yessawḍen ad tgeḍ akk ayen m-nniγ. Maca atah ccγel aneggaru, i tzemreḍ ad tgeḍ, ṭṭef tabbewaṭ-agi' - dγa tefka-yas yiwet n tbewaṭ -' Ṛuḥ, azzel, ssubb γer inefri, γer wexxam n Waydes, efk-as tabbewaṭ-agi i Piṛsifunya, tinneḍ-as : "D Winsa iyi-d-yuznen γur-m, tefka-yi-d tabbewaṭ-agi akken ad s-teččaṛeḍ s cwiṭ n ccbaḥa-m, xerttum ayen ara-tt-ikfun i yiwen wass. Inn-as ur d-yeqqim wara, imi ccbaḥa-w meṛṛa sxedmeγ-tt d asafar akken ad seḥluγ mmi Iṛus. Inna-as ur d-yegguri wara di ccbaḥa-w. Maca ttγawal. Issefk-am ad iyi-tt-id-tawiḍ tura kan, imi ilaq-iyi ad cebbḥeγ akken ad d-walliγ taceqquft n unezgum di tyatṛ n igennawen."

Psukki kkawen ifadden-is, teẓra, d ayen, yewweḍ-d wass-is. Teẓra teggun-itt lmut, teẓra d tikkelt taneggarut, imi abrid tḍegger-itt γer tesraft i deg ur d-tettuγal ara, imi ur tezmir ara ad tṣubb γer inefri mebla taflukt. Tebra-yas Wnisa akken ad tinig γer Taṛṭarus, tamurt n Waydes, γef aḍaṛ, anda ara terzu γef Imunas⁴¹. Akken d-tfuk awal-is Wnisa, dγa Psukki tebda tikli, teqsed yiwet n tiṭ⁴² akkenni, ad talli sufella-as akken ad d-tezwer iman-is. Tenna-yas akkagi ahat ad erreγ metwal γer inefri n Warkuṣ. Maca akken kan tewweḍ, tneṭq-ed γur-es tiṭ-nni, tenna-yas : "Acimi i triḍ ad tenγeḍ iman-im, a tabuhalt ? Acimi triḍ ad tḍeggreḍ iman-im deg yilem ? Acimi triḍ ad tenγeḍ iman-im, teẓriḍ d taggi i d taγawsa taneggarut i m-d-tessuter tgennawt Wnisa ? Ma tḍeggreḍ iman-im suffella-w, ad bḍun tfekka-inem d yiman-im, s tidett, ad tawḍeḍ tura kan γer Ṭarṭarus, maca ma tewteḍ d lmegget, ur mazal ara akk ad d-tuγaleḍ γer ddunit-agi. Ssel-iyi-d.

Lakidimya, tečiṭa n Akayi, ur tegmiḍ ara aṭas ar dag-i, ar tama-s, ad tafeḍ tiẓgi, sdaxel-is yella wasif, ur d-yettban ara imi iwexxeṛ γaf webrid. Asif-nni isem-is Tinari. Ilaq-am ad t-id-tafeḍ. Dinna i tella tebburt n Bluttes, agennaw n Tmes. Tabburt-is, ad t-tafeḍ telli, ad twaleḍ deg-s yiwen webrid, iwεeṛ aṭas. Maca m ara tkecmeḍ di tebburt-nni, tzegreḍ i umnaṛ, ad tafeḍ tabriṭ d tusridt, ḍefṛ-itt a kem-tessufeγ metwal axxam n Waydes. Maca anda tesgunfuyeḍ kan, issefk-am ad taweḍ yid-m ayen swayes ara tmagreḍ tellis n tebriṭ-nni. Awi deg ifassen-im snat n tgaṭutin yullin s ubinu d wewren n temẓin, ma deg imi-m, glu s snat n tepyasin n yedrimen. M ara tedduḍ amecwaṛ deg webrid n Lmut, a d-temlileḍ aγyul yesrejdil, inehr-it-id yiwen wergaz, di sin ad ten-twalliḍ εebban-d snat n tzedmin n yesγaren. M ara ten-id-mlileḍ, argaz-nni ad m-d-yinni akken ad s-d-tejmεeḍ di lqaεa isγaren iṛeqaqen d-yeγlin di ttεabga-nni d-ibbub weγyul-nni-ines, maca kemmini, ur s-ttaγ ara awal, kkemel abrid-im, ur s-ttar ara ula d awal. Syen sakkin, ad tawḍeḍ γer wasif n lmut, dinna ad tafeḍ Xiṛun, netta ad m-d-yesuter idrimen zwar ad kem-yezger s teflukt-is agemaḍ i wasif-nni. Taflukt-nni tulli s ijerbuben, s yis-s i ittawi agad yemmuten, isεedday-iten deg rrif n wasif γer wayeḍ, anda tella tgelda n Blutes. D lqanun. Xiṛun d ayagi i d cceγl-is. Win yemmuten, ma yella ur yesεi ara idrimen, ur yettaf ara win ara s-yaγen tameqyast n nnefs taneggarut. I uwessur-nni ucmit i wumi ara tefkeḍ yiwet di tepyasin-nni tewwiḍ deg imi-m, akken ad kem-yezger agemmaḍ akkin i wasif-nni. Ur s-ttak ara tapyast-nni s afus-is, issefk d netta s timad-is ara tt-id-yekksen s iḍudan-is deg imi-m. Γur-m diγen ad tettuḍ : m ara teflew teflukt-nni γef waman yegnen n wasif-nni, ad twalliḍ yiwen wemγar yemmut acḥal aya, yettεumu s daxel, m ara kem-id-iwali, ad d-yeẓẓel ifassen-is, deg d-gguran ḥaca iγsan, γur-m, akken ad t-id-tesaliḍ sufella n teflukt-nni, ammer anda m-igezzem tasa-m, wwet εeddi, d agdal. Mi kem-yesres Xiṛun gumaḍ i wasif, ad tafeḍ tarbaεt n twessurin zzeṭent, m ara kem-d-wallin, am-inint εiwn-iten ad qelbent azeṭṭa, ammer anda sen-tettaγeḍ awal. Ur tent-tεawan ara. Ur ttnal ara akk azeṭṭa-nni-nnsent. Mačči kan d annect-agi, aṭas n txeftin i m-tuddi Wnisa, i kem-yeggunin deg webrid. Γur-m anda m-γlint tgaṭṭutin-nni n temẓin yellan deg wefus-im. Ammer anda tettγileḍ ulac deg-s ma yella tṛuḥ-am yiwet seg-sent, ma teγli-yam yiwet, dayen, ur mazal ara akk ad twalliḍ tafat n ddunit. Imi m ara tawḍeḍ γer ufali n Blutes, ad tafeḍ zdat n tebburt aqjun, γur-es tlata iqurray d imeqranen, iqurraε, ur yettağğa yiwen ad yekcem. Aqjun-nni, m ara yeseglaf, ad s-tinniḍ d ṛṛεud, yesseglafula d γef wid yemmuten, γas akkenni ulac d acu i izmer ad sen-yexdem, imi nutni dayen mmuten, ur ttḥulfun s wacemma. Γas akkenni, ur yeggan ara, izga iqquraε zdat wemnaṛ n tmezduγt taberkant n Piṛsifunya d wexxam ilem n Blutes. M ara d-tafeḍ iman-im zdat-es, akken ara d-yeseglef fell-am, efk-as yiwet di tgaṭṭutin-nni tewwiḍ yid-m. Syen sakkin, ad m-yanef ad tkecmeḍ. Mi tεeddaḍ i uqjun-nni, kcem γer Piṛsifunya, ad t-tafeḍ deg wexxam, ad tesnibeg yis-m akken iwata, ad m-kem-d-nced ad teqqimeḍ, syen sakkin ad m-d-tefk ad teččeḍ. Maca kemmini qqim ar lqaεa, tessuterḍ-as taleqimt n weγrum aquran, teččeḍ-tt. Mi teččiḍ ar tekfuḍ, in-as sakkin γef wacu i d-tusiḍ. Eṭṭef-d ayen m-d-tefka, tṛuḥeḍ. M ara d-tefγeḍ, efk-as tagaṭṭutt-nni tis-snat i uqjun-nni, ternuḍ-as i Xiṛun tapyast-nni n yedrimen d-yeqqimen akken ad kem-d-yerr di teflukt-nni-ines, a kem-d-yezger i wasif-nni n Lmut, a kem-d-yesufeγ deg wefwad n lqaεa, ad kem-d-yerr ad twalliḍ iṭij n igenni. Macci γur-m ad tettuḍ : ammer ha anda tettmuquleḍ γer daxel n tbewaṭṭ-nni i m-d-tefka Piṛsifunya, anda s-tettekseḍ tadimt, anda tettmuquleḍ amek iga ugerruj n tgennawt n ccbaḥa i ifren sdaxel-is !"

S imeslayen-agi, tiṭ-nni n tεessast, temeslay-d i Psukki s taγect n Uṛaklum. Psukki, akken kan d-tekfa tiṭ-nni awal-is, tehna, tṛuḥ tḍebbr-d snat n tepyasin n yedrimen akk d tgaṭṭuyin-nni yullin s ubinu d wewren n temẓin. Syen sakkin tṣubb deg imi n Inefri, temlal-d argaz-nni d weγyul-is, ulac d acu i sen-tenna; tefka-yas yiwent n tepyast n yedrimen-nni i Xiṛun bu teflukt izegr-itt i wasif n Lmut; tufa awessur-nni yettεumun, tewt tεedda; tehmel tilawin-nni i tuffa tezeṭṭent izeḍwan, tugi ad tent-tεiwen γas akkenni εyant ttḥellilent deg-s; teddem-d yiwet di tgaṭṭutin-nni tewwi yid-s, tefka-tt i weqjun-nni bu tlata iqurray i igqurεen γef tebburt n ufali n Blutes, dγa igen... Texdem akk ayen s-tenna tiṭ-nni n tεessast, almi tewweḍ tekcem γer wexxam n Piṛsifunya. Imi tekcem, tugi ad teqqim γef ukersi-nni bu taduṭ s-d-tefka tgennawt, mačči kan, tegguma ad tečč ula di tiram-nni yelhan s-d-tesres γer zdat-es. Teqqim γer lqaεa, akken s-tenna tiṭ-nni, tessuter aγrum aquran, syen sakkin, tesaweḍ i tgennawt azen n Wnisa. Pirsifunya tekker, terfed tabbewaṭ-nni s tefka, s tuffra, teččuṛ-as-itt d ccbaḥa, tefka-yas-tt i Psukki, dγa tenna ha. Tefγ-ed deg wexxam n Piṛsifunya, tufa-d aqjun-nnu bu tlata iqurray iggun-itt zdat wemnaṛ, tefka-yas taggaṭutt-nni s-d-yeqqimen, isbed aseglef-is, yunf-as tεedda; ma d tapyast-nni i s-dyeqqimen, tefka-tt i Xiṛun bu teflukt, dγa izger-itt-id i wasif-nni n Lmut, yesufγ-itt-id di Tmes, yerra-tt-id γer nnig tmurt, γer tafat n ddunit. Imi d-tezzi γer nnig tmurt, twalla iṭij, tefṛeḥ d ayen kan, maca temekta-d γer wacu i t-tuzzen temγart-is, dγa teṭtef abrid γur-es. Maca imi tetteddu, tettxemmim, dγa tusa-yas-d yiwet n tekti akkenni, tenna-yas : "I nek d-yewwin tabbewaṭ n ccbaḥa n tgennawt yid-i, ammer ukkan ad tt-lliγ, ad d-kkseγ ciṭuḥ deg-s, ad teḍluγ i wudem-iw, mačči ad s-εeğbeγ aṭas i wergaz-iw !" - Dγa tga akka telli tabbewaṭ-nni, tmuqqel ar daxel, tuffa-tt d tilemt. Tufa ulac deg-s ccbaḥa, tuffa teẓẓel daxel ḥaca Taguni n Lmut, akken kan d-yeffeγ di tbewaṭ-nni, yuγal d agu, idel akk tafekka n Psukki, iγeḍl-itt dinna deg wemkan-nni i deg s-d-tebra, dγa ikerf-tt, ur tezmir ara akk ad ttembiwel. Teḍleq dinna deg webrid, tafekka-s teqqur.

Iṛus, netta, teḥlem kan tfidi-nni-ines, yekker ad inadi γef Psukki. D ayen ur yezmir ad yeqqim ur tt-yettwali ara. Ibedd γef ṭṭaq n texxamt-is, ihuzz tafriwin-is, yeffeγ di lḥebs-nni-ines, yewweḍ γer wanda akkenni teγli Psukki. Iself i Tgunni-nni, yerra-tt γer tbewaṭ-nni-ines, syen sakkin, yessenta yiwen yixef n unecab-is s lemḥadra di tfekka n Psukki, yessaki-tt-d. Akken kan d-telli allen-is, yenna-yas : "Atan diγen, qrib temmuteḍ, d asdudes⁴³ ara kem-yenγen. Ṛuḥ, azzel, awi-yas tabbewaṭ-is i yemma, ara kem tettṛağğu. Ma d nek, ad lhiγ d wayen nniḍen." Akken kan s-yenna akken, yeferfer di tegnaw, ma d nettat tuzzel akken ad s-tawi tarzeft n Piṛsifunya i tgennawt Wnisa.

Iṛus, imi iwala Psukki, tuki-d deg tfekka-s tawla-nni n lebγi, maca degmi yugad yemma-s ad tuγal γer tidak-is, yugad ur tesuruf ara i Psukki, iga akka yulli deg igenni, yulli almi d anda yezdeγ Wubdir, yekcem γer-s, yules-as tamacahutt-nnsen, netta d Psukki. Ubdir yesla i Iṛus almi ifuk, ijebd-it s sin iḍudan deg wemayeg, yesuden-it, yenna-yas : "D keččini akk, a mmi, ulamma ur iyi-terriḍ ara tajmilt gguniγ γur-ek, yerna uklaleγ-tt, γas akken tezgiḍ tessentayeḍ deg ul-iw inecaben-k, ar wanda akken icudd warkad n kusmus; ulama tesawḍeḍ-iyi ttṣubbuγ ar lqaεa, ṭafareγ ula d tilawin; εefseγ akk leqwanen, teggareḍ-iyi di tluffa anda heddren fell-i igennawen d yemdanen ayen ur nlaq ara; anda iyi-tsawḍeḍ akken ad selzeɣlebγi-w, tettiγ ha d azrem, ha d times, ha d lweḥc... ulac lweḥc ur uγulaγ ara akken ad awḍeγ lebγi n tecriḥt. Maca γas akkenni, yal tikkelt, ttsurufeγ-ak. Ihi ula d tikkelt-agi, ad k-εiwneγ, ad k-selkeγ di taluft-agi-inek, maca γur-ek ad tettuḍ lemziya n wass-agi, ma yella twallaḍ ger tlawin, γef lqaεa, tameṭṭut i icebḥen aṭas, γur-ek ad tettuḍ, d nek i d amezwaru."

Akken kan d-yenna awal-agi, dγa Ubdir yuzen Merkur akken ad siwel i yegennawen d tgennawin ad d-asen γer wegraw. Yenna-yas a sen-yinni diγen win ur d-nusin ara, ad ifek leγrama meqran. Igennawen d tgennawin, deg wakken ugaden ad selken leγrama, usan-d akken ma llan. Ččuṛen-d tyatṛ n igennawen. Usan-d akk ad ḥedṛen agraw. Ubdir, yeṛga almi ṭtfen akk imukan-nnsen, yekker, yenna-yasen : "Ay igennawen iwumi yura yisem di teblaḍin n Tmuzatin, aqcic-agi d nekkini i t-id-yesekren. Ass-agi gezmeγ-tt di ṛṛay, issefk ad yeg tilist i umrar n lebγi-s, imi ilac ass ur nesli ara yis-s, ulac ass ur nesli ara iga taluft tamaynut di lecγal n tayri. Ilaq aqcic-agi ad s-neg tilist, ad s-nekkes isulaf t-yettawin yettnadi ḥaca γef zzhu n tecriḥt, akken ad yefk lehna i tlawin n medden, ilaq-as ad s-neg leqyud n tsulya. Yefren yiwet n tlemẓit, yekkes-as ula d tindert-is. Anef-as ad tt-yawi, ad tt-yaγ, ad yidir yid-es, ad yaf zzhu ger yedmaren n Psukki." - Yuγal yezzi γer Wnisa, yenna-yas : "Ma d kemmini, a yell-i, kkes γef ul-im, ur ttwalli ara ayen n ddir di tdukli-yagi n tayri ger mmi-m d tmeṭṭut, γas akkenni axxam-im d axxam n igennawen. Ad geγ akk ayen ilaqen akken tisulya-yagi ger Iṛus d Psukki ad tilli d tisulya n lqanun, ulac akk win i izemren ad tt-yenkeṛ" - Yekfa kan ameslay, yuzen Merkur akken ad d-yawi γer Igenni Psukki. Ssi tekcem kan γer-sen, Ubdir yeččuṛ yiwet n tbuqalt d amebruẓ, yefka-yas-tt, yenna-yas : "Ssew, a yell-i, uγal d tagennawt, deg wass-a d asawen, tezdi-kem tsulya d mmi Iṛus, deg wass-a d asawen, ulac akk d acu i izemren ad ken-yebḍu."

Tendeh tmeγra, wwin-d tiram d tisit, d tisulya n Iṛus d Psukki. Γef wusu n yeslan, yeḍleq Iṛus, yeṭṭef Psukki ger yedmaren-is; deg wusu nniḍen, Ubdir yesudel Yunyu, rnu igennawen d tgennawin nniḍen ẓẓlen akk deg wusu-nnsen. Cwiṭ akka, ata ikecm-ed Ganimadi, ilemẓi-nni d-yuker igider n Wubdir di tmurt n Lidya, yuγal d aqeddac γef ugellid n igennawen, yewwi-d yid-es taqbuct n nextaṛ, abinu n igennawen, yefka-tt i Ubdir. Igennawen d tgennawin nniḍen yesarbi-yasen Liber; ma d Bulkan, netta, yelha d usewwi. Sut-Zzhu wwint-d tiwredtin t-tizeggaγin zerεent-tent, Tigrurazin⁴⁴ ttṛucunt axxam s waman n rriḥa, Timuzatin bdant kkatent lmuzigga, ma d Apullun, netta, yeṭṭafar-itent s llira, yerna diγen iccenu, tikwal akkagi, m ara d-yaweḍ γer tsetna, ad tendeh yid-es tallilt n tmuzitin-nni. Wnisa, yemma-s n yesli, d tamezwarut, tekker tebda ccḍeḥ γef wanya n yiwen wecṭir yekkaten tajewaqt d Fanes. Atah wamek tekfa tmacahutt n Iṛus d Psukki. Asmi tezri tmeγra, turw-ed teslit, terna γer-sen yiwet n teqcict i wumi γarren Taḍfi⁴⁵.