1) Ay aggur-inna,

Taḥbult n weẓref,

Amwanes iminig,

Afzim γef ssqef.

 

2) Ay aggur-inna,

A lfeḥm n yirij,

Ṭṭef nnuba,

Ma yeγli yiṭij.

 

3) Ay aggur-inna,

Bu ukerz n lmeṛjan,

Taftilt n igenni,

Agellid n wuḍan.

 

4) Keččini i izedγen,

Akkin i wsigna,

Tamurt akk d ayla-k,

Idurar l-luḍa.

 

5) S waylu-k dhen,

Tiγaltin t-tizza,

Lemwaji n yillel,

D waman n tliwa.

 

6) Ssken iberdan,

I wid yunagen,

Di teẓgwa n ṭṭlam,

Ammer ad εeṛqen.

 

7) Ssken iberdan,

I unegmar n iselman,

Ddu d ibeḥriyen,

Err-iten-id s axxam.

 

8) Ay aggur-inna,

Sennig leḥwaṛi,

Yis-ek yecbeḥ yiḍ,

S tureγt n tziri.

 

9) Ay aggur-inna,

Agennaw n tegnewt,

Agellid n yetran,

Gma-s n tafukt.

 

10) Ina-γ-id melmi,

A nserγ aquṛan,

A nefres lexlawi,

A nmeggel igran.

 

11) Ina-γ-id melmi,

A nezreε irden,

A neẓẓu imγan,

A nleqqem ifassen. 

 

12) Ina-γ-id melmi,

A nekrez akal,

Melmi ara nemger,

A nesizdeg annar.