Biliṛufun d ageldun n Kurinti, d mmi-s n Glukkus, mmi-s n Sisifus, agellid ibnan Kurinti. Llan diγ wagad i d-iqqaren Biliṛufun d mmi-s n Puzaydun. D netta i inγan gma-s Biliṛus, maca ur iẓra d akken d gma-s. Γef ayagi i yenfa γer tgelda n Pṛutiyus.

Biliṛufun,  ulac akk acu t-ixuṣṣen. Txuṣ-it kan yiwet n tγawsa: yettargu ad yali yiwwas agmar Pigaẓus, agmar-nni bu wafriwen i d-iffγen seg yedammen n Mdusa, asmi i -tt-inγa Piṛsiyus.

Biliṛufun insa yiwen yiḍ deg ufanum (ades temple) n tgennawt Atina. Imi d-yuki, yufa-d γer tama-s ṛsem n wureγ. 

Untiya, tameṭṭut n Pṛutiyus, agellid n Tirinti, nettat tella tḥemmel Biliṛufun. Netta ireggla-s. Dγa tga akka, tcetka fell-as γer wergaz-is, tenna-yas d akken ibγa ad igen yid-es. Pṛutiyus, akken ad isbεed Biliṛifun γef tmeṭṭut-is, ifka-yas tabratt, inna-yas "Ad tt-tawiḍ i ugellid Lukyis." Biliṛufun iwwi-yas-tt. Akken yelli agellid Lukyis tabratt-nni, iγra-tt, yufa d akken isuter-d deg-s ugellid Pṛutiyus, akken ad ineγ Biliṛufun. Agellid Lukyis, si tama-ines, akken ad ineγ Biliṛufun, yuzen-it ad ineγ Ximayṛa (Ximayṛa-agi, d imzizzel, aqqur-is d izem, tafekka-ines d taγaṭ, taṣeṭṭa-ines d azrem. M'ara tettṣuḍu tessufuγ times deg imi-s, yerna diγenna tessett imdanen).

Biliṛufun, yerfed ṛsem-nni n wureγ i s-d-tefka Atina, iteddu. Iteddu, armi d-imugger Pigaẓus, iga akka, yerra-yas ṛsem-nni, yuli-t, ufgen. Bdan ttnadin γef Ximayṛa, armi tt-ufan. Biliṛufun ijelb-d γef Pigaẓus, ibda imenγi d Ximayṛa. Maca deg mi akken iẓra mačči d ayen i wumi izmer s ufus, neγ s yifru. Iga akka iddem-d takurt n weldun, igr-itt γer daxel n yimi-s. Ximayṛa, imi teεdda a tt-id-ssusef, teffeγ-d seg imi-s tmes, aldun-nni yefsi, dγa tkuffer.

Biliṛufun yiwen wass, yuli Pigaẓus, ibγa ad yali γer yixef n udrar n Ulampus. Dγa Dzus, yuzen-as-id aggen, iqqes Pigaẓus, dγa iγḍel-d Biliṛufun γer lqaεa, immut.