Kadmuṣ d gma-s n Yuṛupi. Mi tt-yuker Dzus, iffeγ akken ad inadi fell-as. Inuda fell-as acḥal d asegass, ur tt-yufi ara. Asmi igzem layas, yunag γer Dilfi, akken ad iẓuṛ. Inna-yas-s Uṛaklum: "Deg inig-inek, a d-tmagreḍ deg ubrid tagemmatt tacebḥant, ḍeffer-itt s deffir, ḥacama d anda ara teṭṭes, tessalliḍ dinna tačita."

Kadmuṣ iṛuḥ, iteddu, iteddu, almi d asmi i d-immuger tagemmatt tacebḥant, iḍeffer-itt s deffir, almi d tamurt n Biyutiya, teṭṭes deg yiwen umkan akkenni, dγa Kadmuṣ, ikker ad issalli dinna tačiṭa n Tibi. D acu, imi iṛuḥ a d-yawi aman, akken ad isers aẓru amezwaru i tčiṭa-nni ibγa ad issalli, yufa dinna talafsa. Inγa-tt. Imi tt-inγa, tluεa-t-id tdeyust Atina, tenna-yas " Ddem tuγmas n tlafsa-yagi ẓẓu-tent. Kadmuṣ, iddem-d tuγmas n tlafsa-nni, iẓẓa-tent. Dγa ffγen deg wakal yergazen s yefluten, ssekren-tt gar-asen. Armi d-ggran 5. 5-yagi uγalen d imeddukal n Kadmuṣ, εewnen-t ssullin yid-es tačiṭa n Tibi.

Asmi i tt-ssullin d ayen, Kadmuṣ yuγal d agellid n Tibi, yuγ Haṛmuniya, yelli-s n Aris d Afṛuditi, urwen-d aṭas igurdan. Gar-asen Inu d Simili.  Nnan-ak Kadmuṣ iselmed i udmus-is tira, tayerza akkd uselqem n wuzzal. Kadmuṣ d Haṛmuniya, asmi immut mmi-s n mmi-tsen Puntiyuṣ (wali-t tadyant n Dyuniẓus), unagen γer tmurt n Illiris, anda ten-rran idiyusen d izerman.