Layuṣ, agellid n Tibi, argaz n Yukast, yerza γer Dilfi akken ad d-iẓuṛ. Ibγa ad iẓer m ara d-yeğğ mmi-s ara t-iγelten neγ ala. Dγa inna-yas-d uṛaklum: "A d-tarweḍ aqcic, maca ad ak-ineγ yerna ad yaγ tameṭṭut-ik!" Dγa Layuṣ, akken kan yerna uqcic γur-es, iccud-it deg uḍar, ifka-t i yiwen deg sseklafen-ines, akken ad t-ineγ. Aseklaf-nni, iwwi aqcic-nni, maca deg wakken t-iγaḍ, ibra-yas deg udrar-nni iğğa-t dinna d amuddir. Ssyen sakkin, yufa-t yiwen umeksa dγa iwwi-t i Kulibus, agellid n Kurinti. Agellid, deg-mi ur isεa ara derrya, isekker-it-id d mmi-s. Isemma-yas Udipus, imi t-iwalla cuffen iḍarren-is.
Asmi meqqur Udipus, degmi i s-qqarent tziwin-is "Ur tsεiḍ ara baba-k" Iga akka ula d netta yerza γer Dilfi, ira ad iẓer anwa i d baba-s. Inna-yas uṛaklum: "Ad tenγeḍ baba-k, yerna ad taγeḍ yemma-k". Udipus, mi yesla akkenni, dγa inejla, imi yugad ad ineγ baba-s, yerna ad yaγ yemma-s. Imi iteddu, imugger-d deg ubrid yiwen unubli d yesseklafen-is. Anubli-nni irkeb-d tacaṛṛiṭ izuγuren igemren, ma d isseklafen-nni, wwin-d ifla, teddun γef uḍar. Anubli akken kan iwalla Udipus, issuγ fell-as: "Wexxeṛ deg ubrid, neγ ad tmetteḍ!" Udipus, imi s-isla akken, yerfa, dγa inγa-ten akk. Ala yiwen i yeselken, yerwel ur iban akk anda yerra.
Udipus ikemmel abrid-is γer Tibi. D acu zwar ad yaweḍ, isla d akken, illa zdat n tewwurt n tčiṭa-yagi Sfinga. Sfinga-yagi, ur tettağğa ara iminigen ad kecmen ar Tibi, ḥacam sefran-d yiwet n tmesεeṛaqt. Win tt-id-yufan, a t-teğğ ad yeεddi, ma d win ur tt-id-nufin ara, ad s-terẓ tizli. Maca deg wasmi d-tewweḍ Sfinga-yagi γer tmurt-nni, werğin yelli win d-yesefran timeseεreqt-nni.
Akken kan i-yewweḍ Udipus γer zdat n tewwurt n Tibi, tḥebs-it Sfinga-nni, tenna-yas: " Di tafrara, iteddu γef 4 iḍarren, deg uzal γef 2, tameddit γef 3, d acu-tt? d acu-tt? "
Udipus, inna-yas: "D amdan. M'ara d-illal, iteddu γef 4 iḍarren, m'ara yimγur iteddu γef 2, m'ara yewsur, iteddu s tεekkazt." Akken kan i s-tesla akken, tekker Sfinga-nni, tḍeggeṛ iman-is γef yifri, temmut.
Imezdaγ n Tibi, imi slan, wwin Udipus rran-t d agellid-nnsen, degmi akken Layuṣ immut, Udipus yerra tameṭṭut-is. Urwen-d akken ssin warrac d akniwen, iwumi qqarren Pulinikis d Ityuklis, rnan-d ssnat n tullas, umi qqarent Untigun d Ismini.
Tkemmel akkenni, almi d asmi d-yeγli waṭṭan n ṭaεun γef tčiṭa n Tibi, dγa Udipus yuzzen yiwen uneglus γer Dilfi, akken ad d-iẓuṛ. Yenna-yas uṛaklum: " Ur ittekkes ara waṭṭan-agi i d-yeγlin fell-awen di Tibi, ḥacama tufam-d anwa i yenγan agellid Layuṣ." Dγa Udipus ibda anadi. Inuda a d-yaf anwa i iḥedren i lmut n ugellid Layuṣ. Xas akkenni yeεgen-as ucellak Tiṛiẓyas, inna-yas: " Ur ttnadi ara fell-as mulac ad ttendemmeḍ!" Maca xas akkenni Udipus, yuzzen wwin-d inigi-nni i iḥedren i lmut n ugellid Layuṣ. Inigi-nni imi d-iwweḍ, iḥka-yasen-id amek immut Layuṣ dγa Udipus, iqḍaε ccek, netta i yenγan agellid Layuṣ. Yerna daγen inigi-nni, d netta i yewwin mmi-s n Layuṣ, asmi illul akken ad t-ineγ. Imi isla akken Udipus, ifhem d akken iffeγ wawal-nni n uṛaklum i s-d-innan: "Ad tenγeḍ baba-k, yerna ad taγeḍ yemma-k". Amek ara ixdem? Ikker isderγel iman-is. Ma d Yukast, nettat, txenq iman-is. Udipus, akken d aderγal, ikker inejla, tedda yed-es yelli-s Untigun, tettaṭṭaf-as afus. Teddun teddun, almi d asmi wwḍen γer Kuluni, ar tama n Atinay, immut dinna.