Igyus, mmi-s n ugellid n Watinay, yunag akken ad yissin ddunit, ur d-yezzi ara. Yerğa-t baba-s acḥal iseggasen, ulac. Yiwen ur yeẓri anida yella. Maca asmi d-tewweḍ lgirra γer tmurt n Watinay, yekker ugellid-ines yuzen ineglusen^[1] akken ad nadin  γef ugeldun Yigyus.

        

         Ineglusen-nni ṭṭfen abrid, bdan ttnadin γef Yigyus. Nudan nudan almi d asmi t-ufan. Ufan-t yettidir deg yiwet n tmurt, ufan-t yuγ yelli-s n ugellid n tmurt-nni, yerna yela yid-es aqcic  iwumi  i  isemma Tiziyus.

 

         Ageldun Yiglus yesunebg s ineglusen-nni i s-yuzen baba-s. Iga-yasen tameγra, ččan, swan, syen sakkin, isteqsa-ten ayγer d-usan ad t-wallin.

 

         Inṭeq-d yiwen deg ineglusen-nni, yenna-yas : "Ay ageldun Yigyus, Atinay, tamurt-ik, attan di yir tagnitt. Baba-k, am akken teẓriḍ, tura wesser, ur yezmir ara ad yennaγ.  Γef wayagi i γ-d-yuzen γur-ek. Yessaram ad tkecmeḍ γer tmurt-ik, akken ad tennaγeḍ fell-as."

 

         Ageldun Yigyus, imi yesla akken, yexsef wudem-is. Maca issefk-as ad yekcem γer tmurt n baba-s. Isawel-as udasem^[2].  Maca zwar ad yeṭṭef aγerabu ara t-yawin γer tmurt-is,  yerfed di teftist yiwen wedγaγ annect-ilat, yeffer seddaw-as afruy d tṣandayin, yerra fell-asen adγaγ-nni, dγa yenna-yas i tmeṭṭut-is : "Ur ẓriγ ara acḥal ara tekk lgirra. Maca m ur d-zziγ ara,  asmi ara yawweḍ mm-i Tiziyus d ilemẓi, awwi-t-id γer teftist-agi, inna-s ad yeqleb adγaγ-agi, ad d-yeddem ayen freγ seddaw-as, tineḍ-as ad n-iṛuḥ γur-i γer Watinay."

 

         Ageldun Yigyus yesuden tameṭṭut-is, yulli γef uγerabu bu wamat amellal, yeṭṭef abris γer tmurt n baba-s.

 

         Yezri acḥal d aseggas d Yigyus ur d-yezzi ara. Ma d mmi-s-nni, Tiziyus, winna akkenni yeğğa d lufan, yewweḍ d ilemẓi.

 

         Yiwen wass,  tewwi-t yemma-s γer teftist-nni anda yeṭṭef wergaz-is Yigyus aγerabu i t-yewwin γer lgirra,  tesken-as  yiwen wedγaγ annect-ilat, tenna-yas : "A mm-i, ma yella tzemreḍ ad tqelbeḍ adγaγ-agi,  ad feṛḥeγ yis-ek aṭas. Ad feṛḥeγ yis-ek, imi d ayen, tewḍeḍ d argaz, tzemreḍ ad tinigeḍ."

 

         Tiziyus yekker-as i wedγaγ-nni, yeddeggir-it, yeddeggir-it, almi t-yeqleb, dγa yufa seddaw-as afruy d tṣandayin. yeddem-iten-id, yeqqen tiṣandayin-nni, yebges s wefruy-nni, dγa yuγal-d s axxam, netta, akkd yemma-s akken ad iheggi inig-ines, win ara t-yawin γer tmurt n Watinay.

 

         Tiziyus yekker ad yinig γef udaṛ, tetṭef deg-s yemma-s akken ad yeṭṭef aγerabu, imi iberdan n uḍar ččuṛen d tixeftin : imakaren, lewḥuc... win k-izeglen, ad k-yeṭṭef wayeḍ. Maca Tiziyus yugi, yenna-yas i yemma-s : "D acu ara s-yini baba asmi ara isel s mmi-s yefrenabrid isehlen."

 

         Dγa yekker iṛuḥ γef uḍar. Iteddu yettargu. Yettargu ad yeg ayen iga Hiṛakles.

 

***

 

         Abrid yeṭṭef Tiziyus yezger i yedurar, ifran d teẓgwa. Iteddu, iteddu almi yewweḍ γer tebburt n yiwet n teẓgi, anda yella yiwen umakar. Amakar-agi yeffer sufella n ttejṛa, yettṛağğu-t s udebbuz n wiran^[3]. Akken kan yewweḍ Tiziyus γer ddaw ttejṛa-nni, dγa amakar-nni ijelb-ed γur-es,  yebγa ad t-yezwi.

        

         Ixeẓr-it Tiziyus, yenna-yas : "Teγliḍ-d swaswa kan. Ad iḥwiğğeγ adebbuz-nni-inek akken ad snegreγ yes-s imkeṛḍen d lewḥuc yexlan iberdan."

 

         Amakar-nni iweseε s udebbuz-nni-ines akken ad t-iwwet dγa Tiziyus yekna-yas, ijebd-d afruy-ines, dγa yenγa-t. Yewwi adebbuz n umakar-nni, dγa ikemmel abrid-is.

 

         Deg webrid, Tiziyus yemlal-d aṭas n imakaren, maca yesneger-iten. Mi yeεya wefruy, am Hiṛakles, ad yerfed adebbuz-nni n wiran. Ulac akk win i selken deg wefus-is. Imesbriden d imanagen feṛḥen akk s wayen iga. Nnan-as akka tura nezmer ad ninig di talwit.

 

         Maca Tiziyus ur yeẓri ara d acu i t-yeggunin, imi zwar ad yawweḍ γer tčiṭa n Watinay, yezwer-as-d ucacfal Pṛukustes. Pṛukustes, netta, ur d-yezwaray ara i iminigen d imesbriden s wefruy deg wefus,  maca yettmaggar-iten s wezmumeg, innecd-iten γer wexxam-is.

 

         Akken kan iwala Tiziyus, yezmumeg-as, inecd-it s axxam akken ad yesgunfu ciṭuḥ. Yesγim-it, yefka yečča, yeswa, yuγal yenna-yas : "Ara ttwalliγ deg-k tserdeḍ, ma tuγeḍ-iyi d awal, ad teqqim kan ad tenseḍ iḍ-agi γur-i, azekka sakkin, ad tkemmleḍ abrid-ik. Qqim, γur-i sin  inammuyen^[4]."

 

         S tidett, Pṛukustes γur-es sin inammuyen, yiwen d amecṭuḥ, wayeḍ d ameqran. Maca yettak-asen i inebgawen-is inammuyen ur sen-nlaqen ara. Amdan amecṭuḥ yettak-as anammu ameqran; amdan ameqran, yettak-as anammu amecṭuḥ. Syen sakkin, ad yerfed acaqqur, akken ad yegzem ayen izaden i wemdan-nni ameqran akken ad d-yezg i unammu-nni amecṭuḥ;  neγad yejbed amdan amecṭuḥ, akken ad d-yezg i unammu-nni ameqran. S kra n iminig yensan γer Pṛukustes, ur t-id-yufi ara wass.

 

         Pṛukustes, imi iwala Tiziyus d amdan ameqran, dγa iga akka yefka-yas anammu-nni amecṭuḥ. Maca Tiziyus akken kan iwalla akkenni,  yuki. Yenna-yas i Pṛukustes :  "xaṭi". Yenna-yas : "D keččini ara yegnen deg unammu-yagi amecṭuḥ. Pṛukustes yerra iman-is yeqbel. Akken kan yezdew γef unammu-nni amecṭuḥ, dγa Tiziyus yesnesr-ed deg wammas-is afruy,  dγa yesafeg-as aqerru.

 

         Tiziyus ikemmel abrid γer tčiṭa n Watinay. Deg imiren ulac akk d acu i d-yemlal deg webrid. Itezzi deg izenqan n Watinay, yettawi yettara, yettwali ixxamen... lγaci d-yettemlil ttxezziṛen-t kan.  Netta yella tafekka-ines meṛṛa tulli-tt takka, temγi-t-id tamart, rnu amzur-ines yegma almi s-idel tuyat. Imi wallan adebbuz-nni d-yewwi yid-es, wehmen. Ma d Tiziyus, netta, iteddu kan. Iteddu iteddu almi yewweḍ γer wades n Apullun, anda yuffa imeṣwaten xeddmen.  Imeṣwaten-nni,  akken kan t-wallan, bdan ttkelixen fell-as, ma d netta, ur sen-yerri ara akk awal. Yuẓa γer-sen, yuffa sin yezgaren, ttwaqnen  γer deffir yiwet n tcaṛit annect-ila-tt.  Iga akka yebra i izgaren-nni, yerfed tacaṛit-nni, dγa yewwet imaṣwaten-nni yes-s. Lγaci-nni yellan dinna, imi t-wallan akkenni, wehmen, maca ugaden-t.  Sersen kan iqurray-nsen, ṭṭfen imawen-nsen.

 

         Tiziyus, imi yewweḍ γer ufali^[5] n ugellid n Watinay, yufa mgaggin, zdat n tebburt, aṭas n lγaci. Yufa-ten ttmeslayen γef baba-s, agellid Yigyus. Lγaci-nni rfan γef ugellid-nnsen d ayen kan. Imi ass-nni d ass i deg yessunefk i imezdaγ n tčiṭa n Watinay ad aznen 7 yelmeẓyen d 7 telmeẓyen i Minuṭur^[6], atiras^[7] n Hiṛakliyun. D tagi i d tatalast neγ ṭṭlaba i deg tettwalas tčiṭa n Watinay. Imi yal mara d-zzin 9 iseggasen,   ad kkren Itinayen ad as-aznen i utiras n Hiṛaklyun ilmeẓyen d telmeẓyin akken ad ten-yečč. 

 

         Atiras Minuṭur annect-ilat. Γur-es tafekka, deg yidmaren d asawen d azger, deg yidmaren d akessar d amdan.

 

 

***

 

         Yiwen wass, Minuṣ, agellid n Hiṛaklyun, yuzen mmi-s γer wuraren n Watinay. Deg uraren-nni, mmi-s n ugellid Minuṣ yugar akk ilmeẓyen n Watinay, yessaweḍ maḍi almi yecqarew ageldun Yigyus, mmi-s n ugellid n Watinay. Maca yenγa-t uneggaru-yagi. Dγa tekker lgirra ger tgelda n Watinay d tin n Hiṛaklyun. Minuṣ yuzen taflut^[8]-ines γer Watinay. Ur tmul ara imilisen n Hiṛaklyun ṭṭfen tamurt n Watinay. Dγa deg imiren, ṭṭfen deg-sen, yal 9 iseggasen,  issefk i Yitaniyen ad zznen 7 yelmeẓyen d 7 telmeẓyin γer Hiṛaklyun, akken ad ten-yečč utiras Minuṭur.

 

         Minuṭur, yettwaḥbes deg yiwen ulbrun^[9], seddaw tmurt. 

 

         Degmi i yufa Tiziyus, zdat n tebburt n Ufali n baba-s, agdud yerfa. Yerfa γef ugellid Yigyus imi yeqbel ad yazen ilmeẓyen d telmeẓyin itinayen i utiras n Hiṛaklyun. Tiziyus yufa ger wegdud-nni, yufa inimiken n baba, ttmeslayen i wegdud,  ttuγun, qqaren-as : "Ayγer akka ? Ayγer ara yazen arraw-nneγ γer lmut ? Teqqur tasa-ines. Ur s-d-tecqiara di tesfi-nneγ, nekni, imi netta ur yeli ara dderya."

 

         Maca γas akkenni lγaci-nni d-yusan rfan, ddmen-d ad gen tasγart, akken ad wallin anwi ara aznen i utiras n Hiṛaklyun. Wid tezgel tesγart kecmen s ixxamen-nsen, ma d wid tḥuzza, widak ara iṛuḥen d asfel, qqimen dinna, ggunin zdat n tebburt n ufali n ugellid Yigyus.

 

         Tiziyus iεedda ger lγaci-nni, yesla-yasen d acu i ttmeslayen.  Ssyen sakkin, yekcem γer wexxam n baba-s, yerra iman-is d iminig, yesuter akken ad iwali agellid  Yigyus, maca ur s-yenna d mmi-s.

 

         Agellid Yigyus, imi t-iwala, ur t-yeεqil ara. Maca yenna-yas : "Terziḍ-d fell-aγ deg wass amcum, ay abeṛṛani.  Γef akka ttwalliγ yegmeḍ wansi d-tusiḍ. Ur teẓriḍ tadyant i daγ-yuγen. Ammer teẓriḍ, ur umineγ ara d akken ad d-taseḍ γer Watinay."

 

         Yenna-yas Tiziyus : "S tidett, yegmeḍ wansi d-ussiγ. Maca ssneγ tadyant ken-yuγen. Ussiγ-d akken ad k-εiwneγ. Anef-iyi, ay agellid, ad dduγ d wid ara tazneḍ d asfel γer ulbrun n Minuṭur. Anef-iyi, ttxil-ek, ad dduγ yid-sen !" 

 

         Agellid Yigyus imuqel ilemẓi-nni, yewhem : "S tidett-ik, triḍ akken ad tṛuḥeḍ γer ulbrun n Minuṭur ? Tεemdeḍ ad tefkeḍ d asfel tudert-ik ?"

 

         Tiziyus yenna-yas : "Ma yella tunfeḍ-iyi ad dduγ, ad k-iniγ, ay agellid, d Miniṭur ara yemmten, mačči d nekkini. In-iyi-d kan ma yella ad iyi-tanfeḍ ad dduγ d yiseflen-agi ara s-taznem, ssyen sakkin, ad k-d-iniγ anwa nekkini."

 

         Agellid Yigyus yesenhez aqerruy-is. Yenna-yas : "Ih." - Akken s-d-yenna ih, Tiziyus yuẓa γer-s, yesken-as i tiṣandayin-ines d wefruy-ines, dγa allen n ugellid Yigyus ččuṛent-d d imeṭṭawen, akkenni yeẓẓel γer-s iγallen-is : "Mazal d-ufiγ mmi, atan diγen ad iyi-ṛuḥ."

 

         Maca ur yezmir ara ad yuγal deg wawal-is.

 

         Di tčiṭa n Watinay yeffeγ wawal. Akken ma llan Itinayen, ḥaca γef wannect-agi i ttmeslayen : yusa-d mmi-s n ugellid, yusa-d akken ad ineγ Minuṭur."

 

         Imi refden yiseflen-nni akken ad inigen γer Hiṛaklyun, ddan yid-sen lγaci γer lpuṛ. Tilawin ssudunent afruy n Tiziyus, irgazen ttcekkiṛen-t, ma d agellid Yigyus, tezza tasa-ines γef mmi-s. Maca imi t-yesuden, yenna-yas : "Nek ara tettwalliḍ deg-i d awessur. Ad geγ γef yiwen  wamat n uγeṛabu ara ken-yawin yiwen ubilum^[10] d amellal, ma d wayeḍ d aberkan. Im ara t-inigem, ad terrem i waḍu aberkan, maca m ara d-tezzim, ma yella tenγiḍ Minuṭur, err-as-d i waḍu abilum amellal. Akken mara k-in-walliγ s lebεid,  ad ẓreγ d akken tenγiḍ Minuṭur."

 

         Ssyen sakkin, yunf-as yulli d yemdukkal-is γef uγeṛabu.

 

         Akken kan yeqlaε uγeṛabu-nni, Tiziyus iga i waḍu abilum-nni aberkan, nesren γef waman, dγa lγaci-nni d ugellid-nsen uγalen γer yexxamen-nsen. Maca i tikelt tamezwarut, kecmen γer yexxamen-nsen s usirem.

 

***

 

         Γef rrif n tegzirt n Hiṛaklyun, Minuṣ, lwacul-ines d yemdukkal-nsen ggunin-ten di lpuṛ. Aγeṛabu bu ubilum aberkan yeḥbes, dγa ṣubben-d deg-s Tiziyus d yiseflen-nni.  Minuṣ akken kan iwala ageldun Tiziyus, iwala-t amek i iteddu, iεeql-it.

 

         Tiziyus yuẓa γer ugellid Minuṣ, ibed zdat-es, imuql-it γer wallen, yenna-yas : Ammer anda s-tettγileḍ ussiγ-d akken ad εelfeγ s weksum-iw Minuṭur. Ussiγ-d akken ad t-nγeγ. Ussiγ-d akken ad kkseγ tatalast n tmurt-iw."

 

         Agellid Minuṣ yezmumeg-as, yenna-yas : "Ma yella tgiḍ ayagi d-tenniḍ akka, ad wen-rreγ tilleli-nwen, ad wen-sefḍeγ tatalast-nwen." 

 

         Aṛyana, yelli-s n ugellid Minuṣ, dinna i tella. Tesmuzgut i wayen ttmeslayen baba-s d ilemẓi-nni atinayi. Maca deg wakken s-yeεğeb ilemẓi-nni, tṛesa allen-is deg-s, tegguma ad s-tebru. Imi m-sefṛaqen, tekcem s axxam, tegguma ad tettu udem n ilemẓi-nni atinayi. Iγaḍ-itt d ayen kan. Degmi i tra ad t-tεiwen, imi teẓra d akken ma yella ur t-tεawen ara, ḥaca lmut ara yemmet.

 

         Aṛyana, deg wakken tra ad tefdu tudert i Tiziyus, Teqqim almi d-yeγli yiḍ, tekker deg usu-s, telsa iceṭṭiḍen-is, teffeγ deg ufali, d abrid γer lḥebs, anda ttwaḥebsen yelmeẓyen-nni n Watinay. Ilemẓyen-nni, deg wakken εyan, wwten-tt akk d iḍeṣ, ar Tiziyus, netta yegguma ad yeṭṭes.  Aṛyana telli tabburt n lḥebs-nni s tuffra, tsawel-as i Tiziyus. Tiziyus, netta, yella yettṛağğu  aεiwen γer tgennawt, maca attan tusa-d s wudem n tgeldunt. 

 

         Aṛyana tmuqel Tiziyus, tenna-yas s ucebbecbec : "Ẓriγ triḍ ad tenγeḍ Minuṭur, maca ad k-yaεar akken ad tenγeḍ weḥd-ek. Degmi i k-d-wwiγ takurt n lxiḍ. Akken kan ara tkecmeḍ γer ulbrun n Minuṭur, qqen ixef n lxiḍ-agi γer tgejdit tamezwarut, tjebded-t. Ḍelq-as deg webrid. Yerna diγenna ur tezmireḍ ara ad tenγeḍ Minuṭur s ufruy n menwalla. Atan wefruy amagusi^[11]. Ma yella tessawḍeḍ tenγid-t, syen sakkin, seḍfr-d lxiḍ-nni, akken ad d-tafeḍ abrid n tufγa."

 

         Akken kan s-tenna akken Aṛyana i Tiziyus, dγa tenser akken di ṭṭlam n yiḍ. Ammer ukkan ur s-teğği ara afruy d tkurt n lxiḍ, tilli Tiziyus ad yeskideb allen-is, ad yeggal d akken ar werğin tt-iwalla, neγ ahat maḍi, d targit  i tt-yurga.

 

***

 

         Azekka-nni, akken kan yulli wass, usan-d iεessasen n lḥebs-nni llin-asen tibbura i yelmeẓyen-nni itinayen, wwin-ten γer ulbrun n Minuṭur, akken ad ten-yečč. Ilemẓyen-nni ṣṣubben iqurray-nsen, tilmeẓyin-nni ttrunt, ma d Tiziyus, netta, yezdi lqed-is, iteddu am ugeldun γer lmut. Yeffer seddaw ddil-ines afruy-nni d tkurt n lxiḍ-nni s-tefka Aṛyana, iteddu yettak ifadden i yemdukkal-is, yeqqar-asen : "Ur ttagadut !"

 

         Tiziyus d yelmeẓyen-nni kecmen γer daxel n ulbrun-nni n Miniṭur, bdan tikli. Albrun-nni yeṭṭulem, yerna yezzi am wezrem. Yeččuṛ d ṭurnat d tisga. Akken kan ten-tefka tebburt γer daxel, yekker Tiziyus yenna-yasen i imedukkal-nni-ines : "Ffret dagi rrif n tebburt, ad kecmeγ kan weḥd-i." - Dγa yenser weḥd-es deg imi n ulbrun-nni. Yebda yettnadi γef utiras Minuṭur. Akken s-tenna akken Aṛyana, akken kan yekcem, yeqqen ixef n lxiḍ n tkurt-nni s-tefka akkenni γer yiwet n tgejdit, dγa yebda iberru i lxiḍ.  Albrun-nni yebna-t Didalus. Tiziyus yuffa-d iman-is s daxel n ṭṭlam d tsusmi. Ad s-tiniḍ d aẓekka. Γas akkenni Tiziyus, yessufeγ abrid. Sdaxel n ulbrun-nni llant zeγnenat, imi t-wallant, ugadent, dγa bdan ttuγunt, ttferfirent, kkatent-t s aqerru.  Yezger yiwet n texxamt, leḥyuḍ n texxamt-nni frurin-d akk γer lqaεa; imi taxxamt-nni yettεedday-as ciṭuḥ n yiṭij. Syen sakkin, yeffeγ γer texxamt tis-snat, anda d-ttraḥen umačča d tγamalt. Yiwen n tsusmi. Tiziyus isel ḥaca i kra n iγerdayen, ttawin ttaran ger iḍarren-is, ttuγun, zwar ad tteṭṭfen d tarewla γer daxel n texjiḍin-nsen. Tiziyus iteddu, cwiṭ kan akka ad t-id-iḥaz s udem uzeṭṭa n tissist. Iteddu, iberru i lxiḍ-nni, tidi tettqiṭir deg wenyir-is,  iteddu iteddu almi d-yufa iman-is deg yiwen ukulwaṛ d aγezfan, d usrid, dγa idfeṛ-it. 

 

         Cwiṭ akka, ata iεedda-d yiṭij, dγa iwala γer leḥyuḍ n ukulwaṛ idammen, maca qquren.  Cwiṭ akka diγen, atan issuγ wayen, ad s-tiniḍ d ssiεqa i d-yewten γer daxel n ulbrun-nni. Tiziyus isnesr-d deg wamas-is afruy-nni s-tefka Aṛyana, dγa yuẓa γer wanda akkenni d-yusa usuγu-nni.  Iteddu γer-s, maca ṣṣut-nni yettalli, ad s-tiniḍ d ilel i d-yeqqersen neγ d igenni i d-yeγlin fell-as. Tigejda d leḥyuḍ n ukulwaṛ-nni bdan ttembiwilen, ma d akal, iḥulfa-yas ireggel ger iḍarren-is. D nnger n ddunit !

 

         Tiziyus iteddu s uxatel, iεus iman-is. Maca yeffel kan i yiwet n ṭurna, dγa iwala Minuṭur. Di tfekka-ines d amdan, ma d aqerru-ines d aṭuṛu.  Yerna anect-ilat. Deg wanzar-ines ttefγen-d ijajiḥen, ha d izegzawen, ha d iweṛaγen. Yettefγ-d deg imi-s d tebbura n wanzar-ines nnefs d mseblu. Maca yal tikelt mara d-issuḍ Minuṭur Tiziyus, ad s-yeknu. Ad yerwel γer wanda ur yezmir ara ad t-iḥaz. Yuγal yettak iffasen-is, yeččuṛen d acabuγ, akken ad t-id-yeṭṭef, akken ad yeskerfi,  maca Tiziyus ikennu-yas, atan yuzzel γer deffir-es, atan γer deffir-es, yeqqim Minuṭur itezzi kan, ur yeẓri ara akk anda ara t-yaf. Cwiṭ akka, Tiziyus igubeṛ-it akken iwata, dγa yessenta-yas afruy-nni amagusi deg wul.

 

         Minuṭur, akken kan yečča tiyita,  issuγ, dγa yeγli γer lqaεa. Tiziyus iḥulfa i lqaεa tergagi. Ad s-tiniḍ d znezla i iwwten. Di beṛṛa, yal tamaṭ terra-d ṣṣut, tenna : "Ahu !" : iberdan, tiẓegwa, isaffen, ifran... Ilmeẓyen-nni yeddan d Tiziyus, widak-nni yeğğa γef yimi n tebburt n ulbrun, imi sslan, ur uminen ara imeẓẓaγ-nsen.

 

         Yiwen yenna-yas : "Minuṭur yenγa Tiziyus." - Dγa ikcem-iten uferfur. Bdan targaggit. Ttṛağğun nuba-nsen.

 

         Tiziyus, akken kan yenγa Minuṭur, dγa iḍefr-d lxiḍ-nni n Aṛyana, almi d-yewweḍ γer yemdukkal-is. Uzzlen γer, ssudnen-t akk. Feṛḥen imi t-walan. Feṛḥen am wid d-yettwaksen di lmut.  Maca ur uḥtamen ara, ur ẓrin ma di lqaεa d teffeγ neγ deg igenni i d-teγli, ufan-d iman-nsen zdat tgeldunt Aṛyana, i sen-yennan : "Ḍeffeṛt-iyi-d. Γiwlet. Baba ifaq εewneγ-ken. Yerfa, degmi yettu ayen i wen-iṛeggem. Γiwlet, tazzla γer uγeṛabu zwar ad d-yebru i imilisen-ines fell-awen."

 

         Aṛyana tezwar, Tiziyus d yelmeẓyen-nni n Watinay ḍeffṛen-tt s deffir.  Ffγen-d deg ulbrun-nni n Minuṭur, d tazzla γer yilel.  Mazal yuki ugellid Minuṣ s wayen i iḍerrun, aγeṛabu-nni yella yakkan yeṭṭef abrid γer tmurt n Tziyus.

 

***

 

         Aγeṛabu-nni iteddu iteddu almi d tigzirt n Nakṣus. Dγa Tiziyus, Aṛyana d yelmeẓyen-nni n Watinay rsen-d γer lqaεa akken ad sgunfun. Aṛyana tgen, dγa turga : twalla agennaw Dyuniẓus, yugi-yas ad teğğ tigzirt n Nakṣus. Imi ira ad tt-yaγ. Aṛyana teqbel.

 

         Tiziyus d yemdukkal-is, akken refden ad ṛuḥen, ullin s aγeṛabu akken ad kecmen γer tmurt-nsen, Aṛyana tugi ad teddu.  Tiziyus, degmi yugad ad yesneγni igennawnen, yeğğa tageldunt-nni di tegzirt n Nakṣus. Maca Tiziyus d yemdukkal-is ḥeznen d ayen kan. Ran ad tt-awin yid-sen γer Watinay. Deg wakken nuγnan, ttun ur beddlen ara abilum i uγerabu-nsen.

 

         Agellid Yigyus, netta yettṛağğu melmi ara d-yezzi mmi-s. Yuyes ad t-iwalli. Yerfed, netta d wegdud-ines, ṛuḥen γer lpuṛ n Watinay, ttṛağğun melmi ara d-iḍil uγeṛabu n Tiziyus d yemdukkal-is. Cwiṭ akka, ata iban-d. Yettaẓ-d γer lpuṛ, almi d-banen ibilumen-ines.

 

         Akken kan iwalla ugellid Yigyus abilum-nni aberkan, γef yiwef n wamat n uγeṛabu, yefhem d akken yemmut mmi-s.  Amek ara yexdem ugellid Yigyus, yulli γef yiwen yefri annect-ilat, dγa iḍegger iman-is γer yilel.  Dγa deg wass-nni, ilel n Tegrikt, sseman-as ilel n Yigyus.

 

         Tiziyus yerra ilmeẓyen-nni d-yerra yid-es i yimawlan-nsen. Maca netta, yufa-d baba-s yemmut.

 

         Akken s-d-rrant lemwaji tafekka n baba-s, yekker Tiziyus ineṭṭel-it, yerna deg wass-nni yesnulfa-d uraren i lmend n wayen yeḍran asmi d-yezzi di Hiṛaklyun γer Watinay.

 

         Agdud atinayi yettru aṭas γef ugellid-ines, maca yefṛeḥ aṭas diγen imi iwalla mmi-s Tiziyus yeṭṭef amkan-is, yuγal d a      gellid fell-as. Tasṭurya n Watinay tenna d akken agellid Tiziyus isers-d talwit ger Yegrikkiyen, isfeḍ tamurt deg imakaren d at tmegraḍ, yerna yesnulfa-yasen-d leqwanen yelhan.

 

         Atah wamek d-yekkes Tiziyus tamurt-ines di lqid n Hiṛaklyun. Ssyen sakkin, yessuli, di Atinay, tagelda yebnan γef tmusni d tlelli.