Tazwart

 

Ma nger tamawt ar wamek ttwallin ddunit di tira-nnsen Yegrikkiyen n zik, amek ttwallin wayeḍ (win ur nellin ara d Agrikki), amek ttwallin abeṛṛani, amek ttwallin iman-nnsen..., ad nwalli, si tama-nneɣ, amek i llan di lawan-nni ttwallin Illibiyen. A nwalli amek i ten-ttɣilen, d wamek i ttmeslayen fell-asen.

 

Zwar ad twalliḍ wayeḍ, ad s-tsemmiḍ abeṛṛani, isefk-ak ad d-tesfergeḍ akal-ik. Ad as-tsemmiḍ ayla-k neɣ tamurt-ik. Ad s-tgeḍ tilisa. Ad s-tefkeḍ isem. Ssyen sakkin, tzemreḍ ad tefkeḍ isem ubeṛṛani i wayen akk ur d-ẓerbent ara tlisa-nni-inek.  Akken ad twalliḍ wayeḍ d abeṛṛani, akken ad tinigeḍ ɣer-s, isefk-ak ad t-tmuqleḍ di tmurt-nni-inek. Isefk-ak ad tebduḍ tikli ɣer-s di tmurt-nni-inek. Isefk-ak ad teṭṭfeḍ tamurt-nni-inek am wakken d nettat i d timiṭ n ddunit. Akka igan Yegrikkiyen. Gan tilisa i tmurt-nnsen, sseman-as ddunit tagrikkit. Fkan isem i yemezdaɣ-is, semman-asen Igrikkiyen. Ma d ayen akk yellan beṛṛa i tlisa-nni-nnsen, winna qarren-as ddunit tabeṛṛanit.

 

 

Igrikkiyen rran tikfilin i tmurt-nnsen. Gan-as tilisa, akken ad ẓren ansi d-uɣalen. Akken ad ferẓen d acu i d ayla-nnsen, anwa i d ayla-nnsen, amek izemren ad t-bḍun gar-asen... Ma yella d timura igemḍen, timura idergen i wallen-nnsen, tidak-nni i ɣer ur zmiren ad inigen, tidak-nni werğin ẓrin, tidak-nni ttwallin-tent di tmucuha. Di lawan-nni, ulac Tajugrafit, ulac imusnawen yettinigen akken ad gen lkarta n tmura. Degmi ayen akk ttmeslayen d wayen akk ttarun Yegrikkiyen ɣef tmura tibeṛṛaniyin, tekksen-t-id deg izran neɣ di tmucuha. Ar Yegrikkiyen, llan snat ddunitat : tella ddunit tagrikkit, tella ddunit n wiyaḍ, ddunit wer-tagrikkit, neɣ ma tram ddunit tabeṛṛanit.

 

Humirus, "adaskalus n Yegrikkiyen", xeṛţum akka i s-qarren Yegrikkiyen n zik. D netta i igan tilisa i tmurt n Tegrikt. Deg isefra-ines i ttelmaden iggurdan igrikkiyen ansi tebda d wansi d-tuɣal tmurt n Tegrikt. Humirus icennu ddunit akken tt-ttwallin Yegrikkiyen yellan di lawan-nni-ines. Ilyada tuls-ed ɣef tmurt n Tegrikt d tmurt n Asiya. Udissiya, netta, yuls-ed ɣef yinigen n Udissus, ɣef tmura i ɣef d-ikka zwar ad yaweḍ ɣer tegzirt-ines, Ittakki.

 

Tamusni, di lawan-nni n Humirus, tella deg isefra d wayen d-ttarwen wallaɣen n imedyazen. Ɣas akken Plaṭun ɣur-es tamuɣli nniḍen. Yura-t-id di libri-nni-ines i wumi yeqqar Ion, anda d-yenna d akken ur isefk ara ad s-neg aṭas n wazal i tmusni n tmedyazt. Yerna diɣen ur isefk ara akken tamedyazt ad tuɣal d nettat i d tussna n uselmed iggurdan iggrikkiyen. Ɣas akkenni, Igrikkiyen semman-as i Udissiya n Humirus Lunsiklupidia.  Ttafen deg-s akk tamusni i ran ad affen.  Deg  inigen n Udissus, ladɣa tussna n yinig ɣef waman. Tussna yellan di tmacahutt n Udissus tuɣal d idles atnusi (ethnos), d idles n yal Agrikki. Degmi yal Agrikki yeẓra ur ilaq ara ad yinig s uɣerabu ɣer umalu n Tegrikt, ammer ad teččen Xarubdi d Skulla.

 

Asmi sakkin d tnulfa tjugrafit, bdan ijugrafiyen ttinigen. Gan lkaṛtat n tmura, uran fell-asent  isem n yal tamurt. Uran-d ɣef tmura-yagi d yegduden i tent-izedɣen. Akkagi i gan imusnawen imezwura yebdan ttinigen, am Hikkatayus, Tales,  imusnawen d  ifusiken n Yunya. Wigi uran ɣef tmura ɣer unagen ayen wallan d wayen sen-d-nnan imezdaɣ n tmura-nni. Uran ayen wallant wallen-nnsen. Deg imiren, nezmer ad d-nnini tebda-d tmusni n tidett n ddunit-agi. Imusnawen-agi igrikkiyen ssawḍen tamusni armi wwḍen Iggrikkiyen  sulin tafluṭ-nnsen. Imusnawen-agi nudan anda d-zgant tmura nniḍen akken ad inigen ɣer-sent, akken ad ẓren amek ara inigen ɣer-sent s iɣuraben-nnsen. Ma nger tamawt i lkaṛtat n tmura xedmen, ad anaf ladɣa tṛasin iberdan n yilel yettawin ɣer tmura-nniḍen. Ula deg wakal, ad anaf tṛasin siwa isaffen, iɣeẓran d iberdan n waman. Imi ɣer Yegrikkiyen, ilel d netta i yezdin timura Tegrikt. Imi timura-nnsen, ɣas d tigzirin, ɣas akken msebɛadent, ḥesben-tent Yegrikkiyen d tamurt-nnsen, d tamurt n Tegrikt. Ma d timura ur d-neqqinen ara ɣer-sen, tidak-nni semman-asent timura tibeṛṛaniyin, neɣ timura n ibaṛbaṛen.

 

 

 

Abeṛṛani, abaṛbaṛ d Wugrikki

 

Astatu agenwan ?

 

 

Xénos, di ddunit tagrikkit, ɣur-es azal meqqur. Maca Agrikki ur yell' ara d agzinufubbi*. S tidett win d-yusan ɣer tmurt-is yettban-as-d d abeṛṛani, ur t-yessin ara. Ɣas ma yella abeṛṛani-nni yettban-as-d mačči am netta, asennubget n Wegrikki d atafer (devoir/amawal). Yettagwad ammer ahat d adiyus i d-yerzan ɣer-s. Xénos, anda yerra di tmurt n Tegrikt, yesdarray-it Zeos Xénios (atan seddaw laɛnaya n Dzus.) Abeṛṛani semɣaren-t Yegrikkiyen. Agrikki ara yerẓen tassirit-agi, winna ssufuɣen-t Yegrikkiyen seg udrum-nnsen. gellzen-t, ţɣunzun-t ikiwisen. Rnu-yas diɣen, idiyusen, ur s-kemmun ara.

 

Maca tikwal d anmir akken ad tferzeḍ amgared yellan ɣer Yegrikkiyen ger Xénos d Barbaros, imi qaṛṛen Xénos ula i Wegrikki d-yusan di tčiṭa nniḍen. Ma d Barbaros, wagi qarren-t i win yellan mačči d Agrikki.

 

Yerna diɣenna awal-agi n Xénos yettaf sima*-ines, ala deg usennubget. Ma d Barbaros winna d amgal n Wegrikki. D isem-is i d awal-is. Degmi ur feṛzen ara d acu i yettmeslay, yesbeṛbuṛ kan, dɣa sawalen-as abaṛbaṛ.

 

Tameslayt d nekwa

 

Abaṛbaṛ, semman-as Yegrikkiyen abaṛbaṛ imi ur yettmeslay ara tagrikkit, tameslayt yesdukklen igduden igrikkiyen. Imi ɣer-sen, ɣer Yegrikkiyen, s kra n win yettmeslayen tagrikkit, winna ḥesben-t nnsen : d Agrikki. Ma d win ur nessin ara tagrikkit, winna mači nnsen, winna d abaṛbaṛ. Imi winna, ɣer-sen, ur yettmeslay ara. Akken kan yebda yettlemmim. Dagi i tella tilist gar Wegrikki d ubaṛbaṛ. D tameslayt. Agrikki yettxemmim d akken ur yezmir ara ad yemeslay yid-es, ur yezmir ara ad yemsefham yid-es. Tamuɣli-yagi n Yegrikkiyen teskan-aɣ-d akken yal yiwen yettwali tameslayt-is telha, tameslayt n wayeḍ txus. Yal yiwen seg-nneɣ yettxemmim tameslayt n wayeḍ ur tebbwiḍ ara d tameslayt. Yettwal-itt am' akken d tameslayt n yeẓwan*, ur tesaweḍ ara akken ad msefhamen yes-s yemdanen. Akka i ttwallin yemdanen wid ur nessin ara tameslayt-nnsen. Awal s awal, a k-inin "Nekni". Nekni nela taɣerma, nela tamusni, ma yella d wiyiḍ d uḍlisen, ulac d acu i ssnen. Ttbanen-asen-d i yat-Nekni d isuffağen. Yal agdud yettwali kan timiṭ-is. Yal agdud yettktili wiyaḍ ɣer wayen yessen d wayen yela. Yal amdan yettwali iman-is ḥaca netta i d amdan. S kra n win ur nga ara am netta, winna atan deg wesuki n talsa. Akken ula d Alibbi, ɣer Wegrikki, d abaṛbaṛ.

 

Abaṛbaṛ u ugemmaḍ

 

Atah ihi wamek i ttwallin yemdanen taddukli. Qarren teddukkel tɣawsa, ticki d-tettban ddukklen isegman-ines, neɣ ma tram ayen akk swayes tulli tɣawsa-nni. Akken ula d atnus (ethnos), yettban-d d yiwen, ticki t-tesdukkel tmeslayt, yesdukkel-it yedles. Atnus-agi a t-tferzeḍ, imi tettban ccetla-ines, tettban tmeslayt-ines. Abaṛbaṛ ur yelli ara d abaṛbaṛ armi yemgarad d Wegrikki. Agrikki yela tameslayt. Abaṛbaṛ xaṭi. Agrikki iddukkel yedles-ines, tesdukkel-it tmedyazt n Humiṛus. Sdukklent wuraren n Hillada, anda ttemlilen warraw n Hilini, anda turaren, anda ttemyenfalen, anda ţgen tidukliwin akken ad gen lgirra.

 

Barbaros, awal-agi gan-t Yegrikkiyen i Yfeṛsiyen. Ɣas akken Ifeṛsiyen d aɣref yeddukklen, d acu d agemḍi n wetnus Agrikki, warraw n Hilini. Yerna nezmer a d-nini d Ifersiyen i yedeggren Igrikkiyen akken ad gen tilisa i tmurt-nnsen. Deg wakken ten-id-nebcen acḥal n tikkal, dɣa Igrikkiyen gan tiseɣlit i tmurt-nnsen. Deg imiren ibdan beṭṭun ddunit. D acu i d Agrikki, d acu i d wer-Agrikki; anwa i d Agrikki, anwa i d wer-Agrikki. Ddukklen, gan tiddukla, uɣalen d yiwen weɣref. Uɣalen d yiwen weɣref mgal aɣref afeṛsi, agemḍi-nnsen. Ɣas akkenni tičiṭa n tmurt n Tegrikt ur temsefhament ara, asmi d-ibges ɣer-sen Xsayarsa, ugellid amuqran n Ifeṛsiyen, ddukklent-as tčiṭa-yagi am yiwet. Di tdukli-nni-nnsent, illul-ed wetnus Agrikki. Ssyen sakkin, bḍan ddunit : llan si tama Yegrikkiyen, si tama nniḍen llan Ifeṛsiyen, neɣ Ibaṛbaṛ. Deg imiren, Igrikkiyen sawalen akk i yegduden nniḍen Ibaṛbaṛ, sawalen-asen akken ula i Ilibbiyen.

 

Akka, abaṛbaṛ, ɣer wegrikki, d inimik neɣ d aɛdaw. Abaṛbaṛ, mačči kan d agemḍi n Wegrikki. Abaṛbaṛ yettnadi ad yenkeṛ akk ayen yellan d Agrikki. Dɣa deg imiren awal-agi n ubaṛbaṛ qnen-t Yegrikkiyen i Ifeṛsiyen d yegduden akk i sen-d-yezzin, gar-asen Ikaṛyan, Imedwa...artg.

 

Llan yegduden yettidiren ar tama n Yegrikkiyen, yerna igduden-agi ulac akk d acu i ten-yezdin d Ifeṛsiyen, am ugdud Askutay, yettidirin di tama n ugaffa n tmurt n Tegrikt. Wigi ɣas akkenni mačči d Ifeṛsiyen, ttwallin-ten Yegrikkiyen seddaw talsa. Ttwalin-ten am yeẓwan n teẓgi n tmucuha. Akken i ttwallin Yegrikkiyen ula d Ilibbiyen di tmucuha-nnsen. Akken ttwalin akk igduden-nniḍen. Ulac akk agdud yeččuren tiṭ i Yegrikkiyen.

 

Abaṛbaṛ, ur yettwaṭṭaf ara kan akka. Maca ɣas akkenni, ɣer Yegrikkiyen, akken kan ara t-wallin, ɛeqlen-t. Ɛeqlen-t, imi ɣer-sen, abaṛbaṛ, ur ig' ara am nutni. Ayen akk i yexeddem yezleg. Degmi t-ttwallin ixullef-iten, ixullef imdanen. Imi Igrikkiyen ttwallin ḥaca nutni i d imdanen. Deg wakken ur tessinen ara, dɣa bran i yilesawen-nnsen, ttawin fell-as timucuha. Ttwallin-t akken ran a t-wallin, mačči akken yella.