Asmi tuγ Titis, tdiyust n yilel, Piliyuṣ, agellid n tegzirt n Aygina, usan-d akk idiyusen γer tmeγra-nnsen. Imi uẓan akken ad ččen, tekker tdiyust Ayris, terfa imi ulac win i tt-id-inecden. Teddem-d taḍafut n wureγ, tsers-itt γef ṭabla, tenna-yas : "Taḍafut-agi n wureγ, ad tt-tawi tdiyust yiffen akk tidiyusin." - Dγa tekker gar tdiyusin-nni akk yellan dinna. Nuγent. Nuγent almi d-ggrant tlata : Hiṛa, tdiyust n tsulya; Atina, tdiyust n lgirra d ṣufya;  d Afriditti, tdiyust n tayri.

 

 

 

Akken tegguma ad tefru, dγa tidiyusin-agi, rrant ṛṛay γer Dzus, agellid n yediyusen. Nnant-as d akken issefk-as ad tt-yefru gar-asent. Dzus yugad ad yefren gar-asent. Yuγal isawel-as i mmi-s Yeṛmec, agellid n tmesεṛaq, yenna-yas d akken isefk-as ad iṣubb γer lqaεa, ad d-yawi yid-es amdan akken ad yefren gar tdiyusin-agi. Yeṛmec yeṭṭef abrid, yebda la yettnadi, almi yufa yiwen umeksa akkenni, deg yiwen lexla, ikess lmal, dγa yeḥbes γur-s. - Ameksa-yagi, isem-is Paris,  d mmi-s n Priyamuṣ, agellid n tmurt n Yilyun. - Yeṛmec yewwi yid-s Paris γer tmeγra. Akken wwḍen, yefka-yas taḍafut-nni n wureγ, yesken-as tlata tdiyusin-nni, yenna-yas : "Issefk-ak ad s-tefkeḍ taḍafut-agi n wureγ i tin di tlata-yagi ten-yiffen akk ccbaḥa."

 

Tidiyusin-nni zzint-as i Paris.  Hiṛa tenna-yas i Paris : "Ma tefkiḍ-iyi taḍafut-agi, ad k-rreγ d ameṛkanti." - Atina tenna-yas : "Nek ma tefkiḍ-iyi taḍafut-agi, d k-rreγ d aqerru n taṛma n tmurt-ik." - Ma yella d Afriditti, nettat tenna-yas : "Ma tefkiḍ-iyi taḍafut-agi, ad ttaγeḍ tameṭṭut i-yiffen akk tilawin ccbaḥa."

 

Paris imeyyez imeyyez, yuγal yefka taḍafut-nni n wureγ i Afriditti, tdiyust n ccbaḥa.

 

Zrin kra n iseggwasen, dγa ageldun Paris inecd-it s axxam-is Minilaṣ, wergaz n Hilina, ugellid n tmurt n Spaṛṭa. Akken kan mwalan Paris d Hilina, tameṭṭut n Minilaṣ, dγa tesker deg-sen times n tayri Afriditti. Dγa yekker Paris, yuker Hilina, yewwi-tt γer tmurt-is, γer tmurt n Yilyun.

 

Igrikkiyen imi slan, kkren, begsen, ṛuḥen gan lgirra d Yilyunen. Swamek imiren i d-tuγal Hilina γer wergaz-is Minilaṣ, agellid n Spaṛṭa.

 

Nuṭa :  1) Taḍafut n wureγ : Pomme d'or. 2) Titis d Piliyaṣ : Imawlan  n Uxilus.