Glukkus yella d anegmar n yeselman. Yiwwas, yeṭṭef-d aṭas n yeselman, ifser-iten γef weksa, akken ad ten-yeḥseb. Iselman-nni, akken kan rsen γef weksa-nni, ukin-d, dγa ṭṭfen-tt d tazzla, uγalen γer tlassa. Glukkus, imi iwalla akkenni, yewhem. Yekker ula d netta, yeks-ed ciṭuḥ n weksa, yesfuḥ-it, yečča deg-s, dγa cwiṭ akka, yuγal ucebbub-ines d azegzaw am weksa-nni, dγa yeḍfeṛ iselman-nni-ines γer daxel n waman. Dinna imiren, sdaxel n waman, mugren-t-id Okyanus d Titis, rran-t d adiyus n yilel. Ma d tafekka-ines tetti : deg wammas d asawen yeqqim d amdan, ma deg wammas d agessar, yuγal d aslem.

Yiwwas, Glukkus yufa nunfat cuccufent deg yiwet n teftist. Iwala yiwet gar-asent, tezyen d ayen kan. Tewwi-yas ul-is. Nunfa-yagi qarren-as Skilla. Acḥal n wussan d Glukkus yettḥawat deg-s, tegguma ad s-d-tefk udem.  Netta yeqqar-as :

"Nekkini mačči d lweḥc, d amdan. Ur ttaggad ara." - Ulac. Tugi-t.

Glukkes, akken yuyes, dγa yunag akken ad d-iẓer tamagust Kirki. Ira akken ad s-d-tefk ikururen, swayess ara yeγwi Skilla. Kirki, imi twala Glukkus, yeγli-yas γer tiṭ. Tewwet akk amek ara t-teṭṭef γer-s, yegguma. Netta ira kan Skilla. Dγa Kirki terfa. Amek ara s-texdem ? - Tefka-yas akurur i Glukkus, tenna-yas : "Zuzer-it deg wanda akkenni tecuccuf Skilla, tanfeḍ-as." - Glukkus yewwi akurur-nni, dγa yezzuzer-it anda akkenni i tecuccuf Skilla.

Yiwwas, Skilla tekcem kan akken ad tcuccef, anda akkenni yezzuzzer Glukkus akurur-nni, dγa tetti d taqjunt m 6 iqurray. Deg wass-nni ur d-teffiγ γer teftist. Teffer-iman-is. Tuγal tettidir deg yiwen yefri, i d-yezgan di tmexneqt n Misina, di tegzirt n Sisliya. Tettidir dinna, anda yiwen mačči yezmer ad tt-iwali. S kra n win iqerben γer yefri-nni, tečča-t.