Uṛfiyus amuziggi d nunfa n weslen Uridis myeḥmalen. Yiwen wass, Uridis yeqes-itt wezrem, dγa temmut. Uṛfiyus yesenger iẓri-s. Degmi ara d-yekker d ccna fell-as. Iru iru almi d yiwwas, yekker yerf-ed llira-ines, dγa iṣubb ar ddaw tmurt, γer tgelda n Waydes, akken ad d-yawwi Uridis.

Imi t-yewwi Xiṛun di teflukt-ines, yesuter deg-s akken ad as-d-iwwet llira deg webrid. Akken yewweḍ γer tewwurt n tgelda n Waydes, yezewra-s-d Kiṛibbus, aqjun-nni bu tlata iqurray. Uṛfiyus, imi iwala akken, yeddem-d llira-nni-ines, yebda yekkat. Yekkat, yekkat almi yesgen aqjun-nni. Akken igen Kiṛibbus, dγa yekcem Uṛfiyus γer inefri, anda yuffa Aydes, agellid n lmut, yegguni-t. Yenna-yas Waydes i Uṛfiyus : "Zṛiγ ar wacu i d-tusiḍ. Tusiḍ-d akken ad tawiḍ Uridis. Attan γer-k awi-tt. Maca anda d-tberneḍ neγ a d-txeẓreḍ γer deffir, ḥacama tewwḍeḍ γer nig tmurt, twalaḍ taḥbult n yiṭij." - Uṛfiyus yeqbel. Yeṭṭef-as afus i Uridis, ṭṭfen abrid γer nig tmurt.

Uṛfiyus, mazal d-yeffiγ deg inefri, iwala-d tafat n yiṭij, degmi yuyes ad iwali Uridis, yebren γer deffir. Uridis, akken kan rsent wallen n Uṛfiyus fell-as, tuγwas, dγa tentel. Deg wass-nni, Uṛfiyus icennu γef Uridis. Ccna-ines yewweḍ yal tamaṭ n Tegrikt, yal tamaṭ n ddunit. Degmi i s-qarren ass-a i Uṛfiyus bab n tmedyazt.