Fanes 

(poème adapté de "Le Grand Pan est mort" de Georges Brassens)

Asmi ţ-yeṭṭef Fanes,
Asmi ɣef kullec yetṛen.
Ur yeţţak ara afus,
Ur yeţağğa isekṛanen :
D igullafen n igenniwen,
ţţeddun ţţmilen,
Ïṭafaṛen wid i tessen,
Ḥeţben-asen ibbucunen.
Tiqit n ubinum,
Imir ɣer-s azal muqren,
Yekkes-ţ-id Silinus,
Deg ul bb wezger zeggwaɣen.
Tisit tga ssuma
Akw i widak itessen.
Yuɣal d Bakuc,
Uneggaru seg-sen.
Yiwen wass, usan-d,
Usan-d At-Yiwen,
Suffɣen deg Iter,
Tigennawin d igennawen.
Assagi ɣas mazal,
Llan wagad isekṛen,
Maεni ulac deg igenni,
Win i ten-yesdarayen :
Nnan Liber ur d-yeţţakwi,
Ma d Fanes yemmut d ayen.

Argaz d tmeṭṭut,
Akken kan ara mlilen,
D agullaf n igenniwen,
Deffir i ten-iṭṭafaren.
Deg Iger n Ilisi,
Akken kan ara slen,
Acḥal n tsudanin,
Ad d-azlen ad hesben.
Tasudent n tayri,
Imir ɣer-s azal muqren,
D arti n Tfeṛdut
D Wayri bu inecaben.
Tayri tga ssuma
I widak yemseḥmalen,
Yemlal d Fibbus,
Uneggaru seg-sen.
Yiwen wass, usan-d,
Usan-d At-Yiwen.
Suffɣen deg Iter,
Tigennawin d  igennawen.
Ass-a sya ɣer da,
Neţwali imarayen,
Maεni ulac deg igenni,
Win i ten-yesdarayen :
Nnan Wnisa tga axxam,
Ma d Fanes yemmut d ayen.

Nnan zik telha lmut,
I m’ ara d-taweḍ yiwen,
D agullaf n igenniwen,
I gteddun m ara t-refden.
Akken  kan ara slen,
Deg inefri ad siwlen,
I Xarun a d-yas,
S lbabur a t-zegren.
Nnan lmut imiren
D tameɣra  i s-xeddmen,
S llira ay ţṛuḥun,
S ccnawi i ţţinigen,
¨Ɣer tgelda n Waydes,
Akkina i waguyen.
Yiwen wass, usan-d,
Usan-d At-Yiwen,
Suffɣen deg Iter,
Tigennawin d igennawen.
Ass-a ɣas mazal
Imdanen ţmeţţaten,
Maεni ulac deg igenni,
Win i ten-yesdarayen :
Nnan Blutes yuḍen,
Ma d Fanes yemmut d ayen.

Assagi Yiwen-nni,
Fell-anneɣ igelden,
Yiwen wass ad d-isubb,
Di tmes-is aɣ-d-yinni :
"A medden, tekfa ddunit,
Yekfa zzhu d wuraren,
Ugadeɣ asm' ara tenger
Ad texlu s leḥzen !"