Atriyus d Tiyestes d akniwen, arraw n Pilups akkd d Hippudami, yelli-s n Iristyus. Ttidiren di tčiṭa n Mikini, di tmurt n Waṛgus.

Mi immut Pilups, baba-tsen, kkren wakniwen-nni, Atriyus d Tiyestes, nnuɣen ɣef utṛun, i yeṭṭef Atriyus, imi d netta i d ameqqran. Tagelda n Mikini teqqen ɣer tallist n wureɣ. Tallist-agi n wureɣ tekka-d seg yiwen ikerri i s-ifka Hiṛmes i Pilups.

Tiyestes deg wasmi iṭṭef gma-s atṛun, ur ithenna ara. Ibɣa a t-yeɣḍel, akken ad iṭṭef amkan-is. Netta illa d amri n Iṛup, tmeṭṭut n Atriyus. Iṛup-agi, deg wakken i s-issuli ccan-is Tiyestes, yuzen-itt tukker-as-d i wergaz-is tallist-nni n wureɣ swayes igelled.

 

 

 

Akken kan i-s-tewwi Iṛup tallist-nni, Tiyestes iwwi-tt, yerwel di Mikini. Atriyus yerfa fell-as, imi s-ikkes i tgelda-nni-ines azal. *

 

Yezri acḥal d aseggas, yuɣal Atriyus isawel i Tiyestes, yuɣal-ed ɣer Mikini.  Isawel-as akken ad frun.

Asmi d-yuɣal Tiyestes, Atriyus iga tameɣra tameqṛant. Tameddit-nni inecd-it s axxam-is, anda s-ihegga imensi. Maca imi yuẓa ɣer ṭabla ad yečč, isers-as-d gma-s aksum. Yečča Tiyestes almi yeṛwa, dɣa yekker gma-s Atriyus yewwi-yas-d iḍarren d ifassen n sin iggurdan. Dɣa Tiyestes yefhem d akken yečča arraw-is. D arraw-is i s-d-yezzla. Temečč tasa-s. Yerra-d akk afwad-is.  Yečča arraw-is ! Yehbel !

Azekka-nni kan, Tiyestes yunag ar Dilfi, anda s-d-yenna uṛaklum : «Ma yella turweḍ-d aqcic d yelli-k Pilupya, d netta ara yenɣen Atriyus. »

Tiyestes, imi yesla akken, yerwi uqerruy-is. Yeɛweq amek ara yexdem. Maca deg wakken yerfa ɣef gma-s, yekker, iṛuḥ deg yiḍ, ikcem-as ar texxamt i yelli-s. Maca deg wakken iffer udem-is ur t-tɛeqil-ara. Tyestes igen d yelli-s Pilupya s ddraɛ. Mi ikker ad iṛuḥ iğğa deffir-es afruy.

Ur tmul ara, Pilupya, turrew-d aqcic i wumi qarren Igisṭus.

Maca deg wasmi t-id-turrew, deg wakken testeḥa, dɣa teǧǧa-t di lexla, anda tufan imeksawen. Ssyen sakkin, wwin-t ar wexxam n ugellid Atriyus, anda t-id yessker am mmi-s.

Netta, Atriyus, tuɣ-it tegnitt ɣur-es yakkan sin warrac : Agamimnun d Minilaṣ.

 

Igisṭus, asmi muqqer, yesla d acu akk i iḍṛan. Iṛuḥ ɣer yemma-s Pilupya, tefka-yas-d afruy-nni i s-yeğğa Tyestes, tenna-yas «Afruy-agi n baba-k.» Inuda ɣef bab n wefruy, armi t-id-yufa baba-s. Issfhem-as Tyestes d akken ilaq a d-yerr tamgert ɣef watmaten-is. Dɣa yekker yenɣa agellid Atriyus,  issuli baba-s ɣef wetṛun.

 

Agamimnun d Minilaṣ, yeɣli kan babat-sen, dɣa nejlan. Rewlen ɣer tmurt n Spaṛṭa, anda ddurin tacḍaṭ n ugellid Tindaṛyus. Asmi muqṛit, yekker Tindaṛyus yefka-yasen yess-is. Yefka-yas i Agamimnun Klimistṛa, ma d Minilaṣ yefka-yas Hilina. Minilaṣ, dɣa d netta i yuɣalen d agellid n Spaṛṭa asmi yemmut ugellid Tindaṛyus.

Minilaṣ, akken kan yeṭṭef amkan n uḍeggal-is, Tindaṛyus, yezzi-d netta d Agamimnun ɣer Mikini, ɣeḍlen Tiyestes, dɣa yuɣal deg wemkan-is Agamimnun.

Agamimnun yenɣa agellid Tiyestes, ma yella d Igisṭus, yeǧǧa-t.

 

Tkemmel akkenni armi d asmi yuker Paṛis, ugeldun n Yilyus,  Hilina, tameṭṭut n Minilaṣ, dɣa yekker Agamimnun, igerw-ed Igrikkiyen akken ad ṛuḥen ɣer tčiṭa n Yilyus, ad d-awin Hilina.  Usan-d akk Yegrikkiyen.

 

Usan-d, fernen Agamimnun d ccaf fell-asen.

Agamimnun igerw-ed tafluṭ tagrikkit di lpuṛ n Ullis. Ttṛaǧǧun dinna ad d-yekker waḍu akken ad ṛuḥen. Ulac. Ṛǧan acḥal d asseggas, ulac aḍu. Akken uysen, bdan Yegrikkiyen ttnaɣen gar-asen, dɣa Agamimnun yuzen wwin-d Kalxaṣ, yiwen wemkacef akkenni, yusa-d akken ad sen-d-yini acimi yegguma ad d-iṣuḍ waḍu ara ten-yawin ɣer tčiṭa n Yilyus.

Imi d-yewweḍ Kalxaṣ, yerra ɣer uqiḍun n Agamimnun, yenna-yas : « Ur d-yettekkar ara waḍu alama tefkiḍ-as yelli-k Ifijinya d asfel i tgennawt Aṛtimis. Imi ger Yeggrikkyen-agi inek, yiwen gar-asen inɣa taɣezzalt di teẓgi n Aṛtimis.»

 

Agamimnun yeɛweq amek ara yexdem, ad yezlu yelli-s, d tasa-s, ad yeqqim d lɛaṛ.  D tawaɣit !

 

Degmi t-ḥeṛsen ccifan igrikkiyen, Agamimnun yuzen ɣer wexxam-is akken ad d-awin yelli-s Ifijinya.

Iglusen-nni yunagen ɣer Mikini akken a d-awin Ifijinya. Wwḍen ɣer Kliministṛa, tameṭṭut n Agamimnun, nnan-as : « A m-yeqqar ugellid Agamimnun, ilaq-am ad d-taseḍ ɣer Ullis, ad d-tawiḍ yid-em yelli-m Ifijinya, akken ad tt-yaɣ Uxiluṣ. »

Kliministṛa tcebbeḥ i yelli-s, ṛuḥen-t.

Imi wwḍent ɣer din, uznen Ifijinya ɣer uqiḍun n Uxiluṣ, tufa-t yeqqim ɣef tgecrar deffir yiwet n tdeggirt. Akken kan tekcem, iwehha-yas-d dɣa teqqim zdat-es. Dɣa yiwen imilis, yeddem-ed tacaqquṛt, igezm-as aqerruy.

Akken kan s-yegzem aqerruy, kkren-d waḍuyen.

Dɣa tafluṭ n Yegrikkiyen teṭṭef abrid ɣer Yilyus.

 

Kliministṛa tečča times. Terfa ɣef Agamimnun. Akken kan d-tezzi ɣer Mikini, dɣa tezdi d Igisṭus. Ṭṭfen akken atṛun.

 

Asmi sakkin tekfa lgirra, yuɣal-ed Agamimnun ɣer Mikini. Maca Kliministṛa tga iɛessasen beṛṛa i tciṭa akken ad s-d-inin m ara d-yekcem tamurt n Waṛgus. Iɛessasen-nni, akken wallan Agamimnun d imilisen-ines kecmen-d akal n Waṛgus, ssaɣen times.

Kliministṛa, akken kan twala times-nni, dɣa tefhem.

Tekker tmugger argaz-is. Tesnubeg yes-s akken ilaq.

Akken kan yekcem s axxam, yufa thegga-yas aman yeḥman akken ad icucef. Agamimnun, deg wakken yeɛya, iga akka yekkes lqecc-is, yekcem ɣer waman-nni akken ad icucef, dɣa Kliministṛa tḍegger-as acebbak, teṭṭef-it sdaxel. Akken kan yettwaṭṭef Ugamimnun, ikecm-ed Igisṭus s tcaqqurt, dɣa yenɣa-t.

 

Tkemmel akkenni. Kliministṛa tegled nettat d Igisṭus 7 ssnin. Maca Iliktṛa, yelli-s n Ugamimnun d Kliministṛa tegguma ad tettu baba-s. Maca deg wakken tugad ɣef temgeṛṭ n gma-s Uṛistis, dɣa tesnejla-t akken d amecṭuḥ ɣer tgelda n Fukidi, ɣer wexxam n ugellid Stṛufyus d tmeṭṭut-is tagelliṭ Anakibi, weltma-s n Agamimnun, anda d-yekker d mmi-nnsen Puladis.

Asmi yewweḍ Uṛistis d ilemẓi, iṛuḥ netta d wemdakkul-is, unagen ɣer Mikini. Unagen akken ad d-rren ttaṛ n Agamimnun.

 

Wwḍen ar Mikini deg yiḍ, ɛeddan ɣef uẓekka n Agamimnun, anda yegzem amzur-ines Uṛistis, yerra-t ɣef tenṭelt n baba-s. Ssyen sakkin, kemmlen abrid-nnsen. Rran ɣer wexxam n Iliktṛa, weltma-s n Uṛistis. Nettat, tuɣ-itt tegnitt imiren tuɣ yiwen umeɣrus, zedɣen deg yiwet n lfirma, beṛṛa i tčiṭa n Mikini.

Akken wwḍen, tesunbeg yis-sen Iliktṛa, ččan, sswan, ṭṭsen. Azekka-nni sakkin, Iliktṛa tga imensi, tuzen i yemma-s Kliministṛa d wergaz-is akken ad d-asen. Tnecd-iten ɣer imensi n tifrat. Kliministṛa d Igisṭus feṛḥen d ayen kan. Akken kan d-teɣli tmeddit, ṭṭfen abrid ɣer wexxam n Iliktṛa. Maca akken kan kecmen, ufan ttṛaǧǧun-ten Uṛistus d Puladis. Kecmen kan,  nnɣan-ten.

 

Maca deg wesmi yenɣa Uṛistus yemma-s, ur yuffi talwit. Zgant sennig uqerruy-is Tnirya. Ṭṭaffarent-ett am tfuriwin (Furies). Anda yebɣu iṛuḥ, A s-d-smektint idammen n yemma-s. Yehbel. Yettazzal kan. Anda yerra, ad tent-yaff. Ulac d acu ur yexdim ara akken ad s-ttixṛent, ggumant.

 

Ur s-fkint ara talwit, almi d asmi d-tegrew di Atinay tgennawt Atina agraw ɣef Tizi n Ariyuṣ Maggus neɣ Tizi n Aris, agennaw n lgirra. Usan-d ikiwisen n tčiṭa n Atinay, dɣa fran-tt seddaw laɛnaya n Atina, swamek imiren i surfen igennawen i temgerṭ yewwi Uṛistis. Maca tinirya-nni, tefka-yasent tgennawt Atina ades di tčiṭa-ines. Dɣa deg wass-nni, ffkant-as lehna i Uṛistis.

 

_________________

 

*Asmi yuker tallist-nni n wureɣ Tyestes, yerwel yis, Atriyus yufa-d iman-is, ur yuklal ad yegled, imi di tallist-nni i yella wazal n tgelda n Mikini. Ɣef ayagi dɣa, i issawel Tiyestes akken ad d-yuɣal ɣer Mikini.  Maca Tiyestes imi ɣer-s i tella tallist-nni, yuɣal d netta i d agellid.

Maca zwar, mesfahmen d akken ad gellden s nnuba. Tiyestes, deg wasmi iṭṭef atṛun igguma ad s-yebru. Atriyus iwwet iwwet  amek ara yebḍu ṛṛay d gma-s Tiyestes, maca aneggaru-yagi yugi.

Deg wakken Atriyus yeḥṛes gma-s, yiwen wass, yenna-yas  Tiyestes : « Ad k-rreɣ atṛun asmi ara d-yalli yiṭij deg umalu, ad yeɣli deg usammar. »

Yiwen wass, Tiyestes d Atriyus, kkren-d tafrara, ttmuqulen igenni. Cwiṭ akka, wallan iṭij yuli-d, maca deg umalu, iteddu akken ad yeɣli deg usammar. Tiyestes, imi iwalla akkenni, dɣa yeǧǧa-yas atṛun i gma-s Atriyus.

Atriyus, akken kan yeṭṭef Atṛun, dɣa yenfa gma-s. Yiwen wass, agellid Atriyus, issawal-as i gma-s akken a d-yuɣal ɣer Mikini, anda i s-izzla arraw-is d imensi.

 

 

 

**Llan wagad yuran d akken, imi yekker imilis-nni agrikki ad yegzem s ucaqqur aqerru i Ifijinya, tḥewṣ-itt Aṛtimis, terra deg wemkan-is taɣzalt. Ssyen sakkin, Aṛtimis tewwi yid-es Ifijinya ɣer Ṭulidu, anda tt-terra d Tirya (Prêtresse) deg wades-ines (Temple).