Akṛisyus, agellid n Waṛgus, yunag ar Delfi, akken ad iẓer ma yella ad d-yarew aqcic ara t-iweṛten neɣ ala. Yenna-yas-d Uṛaklum : "Keččini, ur d-tettarweḍ, maca yelli-k, ad d-tarrew aqcic ara k-yenγen yiwwass." Akken kan d-yezzi γer tmurt-is, yekker ugellid Akṛisyus, yerra yelli-s Danayi γer daxel n tmedwaṛt(1), yerra fell-as tawwurt n wuzzal, yerna yesbded-as iqjan zdat-es, ttqaṛaεen fell-as.

Maca γas akkenni, Dzus, agellid n idiyusen, yetti d ageffur n wureγ, ikcem-as i Danayi, yerra-tt s tadist.

 

Danayi turw-ed aqcic i wumi teqqar Piṛsiyus.

 

Asmi yesla ugellid Akṛisyus, ira ad ineγ yell-is Danayi, maca ur yezmir ara. Tugi tasa-s. Yekker amek ara yeg, yeṭṭef yelli-s-nni d mmi-s Piṛsiyus, yerra-ten γer daxel usenduq, iḍeggeṛ-iten γer yilel. Ssyen sakkin wwint lemwaji asenduq-nni almi d tigzirt n Kifṛus, anda ten-yufa unegmar n iselman i wumi qarren Diktus.

Diktus ijebd-ed asenduq-nni, yessuffeγ-it-id γer rrif n yilel; yelli-t, yuffa sdaxel Danayi d mmi-s Piṛsiyus. Yufa-ten d imudduren. Iga akka yewwi-ten s axxam n gma-s Pulidiktis, agellid n tegzirt n Kifṛus.

 

Pulidiktis yesunebg yis-sen. Yesekr-ed Piṛsiyus deg wexxam-is.

 

Zrin kra iseggasen, Piṛsiyus yewweḍ d ilemẓi. Yettban kan akka d mmi-s n ugennaw. Yecbeḥ yerna γur-es tazmert. Yezmer ad yesdari yemma-s Danayi mgal ugellid Pulidiktis. Imi Pulidiktis, deg wasmi d-tewweḍ Danayi s axxam-is ur yetthenn' ara. Yezga yeṭṭafar deg-s akken ad tt-yaγ, maca tugi-t.

Pulidiktis, deg wakken yugad Piṛsiyus, ira ad yesegmeḍ γef tmurt-is. Iga akka yessuffeγ-d izen, zzuna ad yaγ Hippuddami, yelli-s n Pilups.  Maca yesuter deg yemdukkal-is d akken yal yiwen seg-sen ad s-d-yawi agmer.

Piṛsiyus, netta, yenna-yas i Pulidiktis : "Nekkini ur γur-i ara agmer, maca ma  s tidett-ik dɣa ad taγeḍ Hippuddami, atan ad k-d-awiγ ayen i k-yehwan. Ad k-d-awiγ ula d aqerru n Tguṛguṭ (2) Medusa, ma triḍ-t."

Medusa ɣur-es udem yesexlaɛ, amzur-ines d izerman. Win i ɣef rsent wallen-is, ad yuɣal d adɣaɣ.

 

Pulidiktis, akken kan s-d-yenna akkenni Piṛsiyus, yeṭṭef-it deg wawal.

 

Atina, tagennawt n tṣufya, tesla-yasen-d imi ttmeslayen. Degmi teggul ad tečč yiwwas aqerru n Medusa, tga akka thegga-yas-d  i Piṛsiyus afruy i s ara yegzem aqerru i Medusa;  asfis(3) bu lemri;  akaskiḍ n Hades : wagi win t-yeqnen ad yuγal d adergi; tiṣandayin sut tafriwin n Hiṛmes d usaku amagi(4) i deg ara d-yawi aqerru n Medusa. Teǧǧa-yas-ten ɣer nunfat n waman.

 

Ssyen sakkin, Piṛsiyus yewwi-t Hiṛmes ɣer tmurt n Tegratin (5). Tigratin-agi d timγarin, d tayestmatin nutenti tguṛguyin. Tigratin-agi ttidirent di tlata yid-sent deg yiwen yefri, seddaw wedrar n Waṭlas. Timγarin-agi γur-sent yiwet n tiṭ d yiwen wugel, i yetteqnent s nuba. Timγarin-agi, ḥaca nutenti, i yessnen abrid yettawin ɣer wanda tezdeγ tguṛguṭ Medusa.  Maca s kra n win yerzan γer-sen, ččant-ett.

Piṛsiyus, akken kan yewweḍ ɣer yefri-nni-nsent, iseɣfel-itent, dɣa yuker-asent tiṭ-nni d wugel-nni-nnsent, yenna-yasen : "Ma tramt ad ken-t-in rreγ tiṭ-nkent d wugel-nkent, issefk ad iyi-d-inimt anda tezdeγ Medusa."

 

Akken s-d-nnant anda tezdeγ, Piṛsiyus yewwi-t Hiṛmes ɣer tmurt n nunfat n waman akken ad d-yawi ifla-nni(6) s-d-thegga tgennawt Atina.

 

Akken kan yebges s yefla-nni, yeqqen tiṣandayin-nni sut tfarawin, dɣa yerra ɣer tmurt n tguṛguyin : Medusa, Stinu d Uryali. Yufa-tent gnent. Yufa deg urtan-nnsent aṭas n yemdanen d yeẓwan, maca uɣalen d idγaγen. Yuγal yeṭṭef asfis-nni-ines, yettxezziṛ di lemri-ines, almi iwali Medusa. Yekka-yas s deffir, yettxezziṛ-tt di lemri, almi yewweḍ ɣer-s, yerfed afruy, ijelleb fell-as igzem-as aqerru. Medusa, akken kan teɣli, atnad ffγen-d deg dammen-ines imilis Kriẓayuṛ(7) s wefruy n wureγ akk d wegmeṛ Pigasus(8) bu wafriwen.

Piṛsiyus, akken kan yeẓra akken, yerf-ed aqerru-nni n Medusa, yerra-t γer usaku-nni-ines amagi. Stinu d Uryali, ukint-ed. Piṛsiyus yeqqen akaskiḍ-nni n Hades, dɣa yerwel, deg genni s tṣandayin-nni n Hiṛmes.

 

Imi d-yezzi, yerra γer uṭiṭani Aṭlas, maca degmi ur yesunbeg ara yes-s, dγa Piṛsiyus yesken-as aqerru-nni n Medusa, dγa yuγal d adrar.

 

Piṛsiyus ikemmel abrid-is deg genni. Yewweḍ ar tmurt n Yityupya, iwalla yiwet n teqcict tettwaqen ɣer yiwen wecṛuf. Taqcict-nni, isem-is Andṛumidi, yelli-s n ugellid Kifi d tgelliṭ Kasyupi.

Yiwwas, tagelliṭ Kasyupi tenna-yas iffeɣ di cbaḥa nunfat n waman, dɣa nunfat-nni, imi sslant, kkrent cetkant ɣer babat-sent Puẓaydun. Puẓaydun, agennaw n yilel, yerfa, dɣa inɣel-d ilel ɣef tmurt-nni, yerna-yasen-d talafsa, tesenger imdanen d yeẓwan.

Agellid Kifi d tmeṭṭut-is Kasyupi, deg wakken ur ẓrin ara d acu ilaq ad tgen mgal talafsa-nni, uznen yiwen wergaz ɣer wades n Amun, anda i sen-d-yenna uṛaklum d akken ur tferru ara alama ffkan-as i tlafsa-nni tagelliṭ Andṛumidi.

Agellid Kifi yeqqen yelli-s ɣer yiwen wecṛuf, rrif n yilel, maca yenna-yasen i Yetyupyen : « Win yesawḍen ad d-isellek yelli di tlafsa-nni, ad s-tt-fkeɣ ad tt-yaɣ. »

 

Piṛsiyus, imi tt-id-iwala, dɣa iɣems-d deg igenni, yesken-as aqerru n Medusa i tlafsa-nni, dɣa yerra-tt d adɣaɣ.

Agellid Kifi d tgelliṭ Kasyupi gan tameɣra. Maca imi yekker Piṛsiyus ad yaɣ Andṛumidi, yekker-d Fini, xalli-s n Andṛumidi, d yemdukkal-is akken ad nɣen Piṛsiyus. Imi, Fini, d netta i wumi ṛeggmen ugellid Kifi d tgelliṭ Kasyupi Andṛumidi.

Akken tekfa tmeɣra, Piṛsiyus yerf-ed Andṛumidi di tegnaw, yuɣal ɣer tegzirt n Kifṛus. Yewweḍ kan, yerra ɣer ugellid Pulidiktis. Yufa-t iga tameɣra akken ad yaɣ Danayi. Yufa-t akk d yemdukkal-is tetten tessen. Imi yesla ugellid Pulidiktis d akken Piṛsiyus yuɣal-ed, yerna yewwi-d yid-es aqerru n Medusa ; yefṛeḥ d ayen kan. Yeẓra ma ɣur-es aqerru n Medusa, ad yegled i lebda, mačči ɣef tegzirt-nni-nes kan, ɣef ddunit meṛṛa. Maca imi yewweḍ ɣer zdat-es Piṛsiyus, yefsi asaku-nni-ines, ijebd-ed aqerru n Medusa, yesken-as-t, dɣa Pulidiktis d yemdukkal-ines, widak-nni ukud igled akken, uɣalen d idɣaɣen.

 

Piṛsiyus yerra akaskiḍ-nni n Hades, asaku-nni i deg d-yewwi aqerru n Medusa d tṣandayin-nni sut tafriwin i Hiṛmes, ma d aqerru-nni n Medusa yefka-t i tgennawt Atina, terra-t ɣef udem n wesfis-ines.

 

Piṛsiyus, imi yekker ad yuɣal ɣer Warguṣ, yesla ugellid Akriṣyus, yemekt-ad awal-nni n uṛaklum, dɣa yerwel.

Maca yiwen wass, Akṛisyus, iṛuḥ ad iwalli uraren n tfunust(9) di tčiṭa n Laṛisa, anda yettekka mmi-s n yelli-s. Yeqqim ger lɣaci yettwali. Piṛsiyus, imi d-tewweḍ nuba-ines, akken ad yurar, iḍegger deg warya aḍebsi, dɣa yewwi-yas-t-id i yiwen wemɣar di twenza, dɣa yenɣa-t.  Amɣar-nni d Akriṣyus, baba-s n yemma-s Danayi. Iffeɣ wawal n uṛaklum akken i s-isla Akriṣyus.

 

Nuṭat : 1)Tamedwaṛt : Tour, poésie kabyle ancienne. 2) Tagurguṭ : Gorgogne, du grec Gorgónes ou Gorgoĩ, au singulier Gorgố) sont des créatures fantastiques malfaisantes. 3) Asfis : du grec Aspis/Bouclier. 4) Tamagit : du grec Magéia/Magie, (T)amagi(t) : Magique. Asaku amagi : besace magique. 5) Tigṛatin: du grec Graĩai/Vieilles femmes : Dino, Ényo et Pemphrédo. 6) Aflu/Ifla : Arme(s), du grec Oplon/Arme.  Krizayuṛ : Chrysaor, grec ancien Khrysáôr, fils de Poséidon et de Méduse et le frère de Pégase. Il est souvent représenté comme un géant ou un sanglier ailé. 8) Pigasus : du grec Pếgasos, en latin Pegasus : C'est un cheval ailé divin généralement représenté en blanc. Il naît avec son frère Chrysaor du sang de la gorgone Méduse. 9) Tafunust : du latin Funus/Funèbre(s).