Uriggu n ddunit
Yiwen wass di tefsut, seddaw wedrar n Hilikun, yiwen umeksa... yeksa ulli-s deg welma... ma d neţţa..., yeqqim i tili, ger tala d wasif..., iɛus-itent. Ass-nni ihi... igenni yeṣfa, aman n tala d wasif ţazzalen..., ifṛax sčewčiwen..., ijeğğigen ţraḥen, iferṭeṭa gwemren.... dayen kan i d ddunnit ! Ha kan akka, teqleb tegnewt, din din kan, yekr-ed waḍu, iṣṣubb-ed wagu, tebṛeq, teṛɛed, tenhez ddunit, yeɣli-d ugeffur.... Ameksa-nni meskin... yeţɣil dayen... d nnger-nni n ddunit i d-iḥeḍren. Iqmec allen-is, yeṭṭef aqeṛṛuy-is ger ifassen-is... yeqquṛ ! Cwiṭ akka diɣen, aţan tesmawi.... ires waḍu-nni..., yekkes wagu-nni.... dɣa ameksa-nni... yelli-d allen-is... Yelli-d allen-is, iwala...
Iwala zdat-es... 9 tlawin. 9 tlawin dlent s ddil, teddunt ḥafi, qnent af iquṛṛay-nnsent tiwenziwin n ilili... Tilawin-agi zdint tindi-nnsent, brant i yemzuren-nnsent, myuṭṭafent deg wefus, gant akaṛu, ceṭṭḥent. Ceṭṭḥent ɣef tfednin
Ameksa-nni yekker ad yerwel, ireggwel wakal ger iḍaṛṛen-is ; dɣa yeẓẓa tigusa . Ibedd zdat tlawin-nni..., icɛel allen-is..., yeţţmuqul.
Tamuza tamezwarut :
« Ay ameksa yeksan,
nekkwenti d Timuzatin,
yess-is n bab igenwan.
D nekkwenti i yesefruyen…
iquṛṛay imedyazen,
d nekkwenti
i yedhnen tuɣac...
tuɣac icenayen,
d nekkwenti i yeţţreyicen iḍuḍan...
iḍudan imuziggiyen,
d nekkwenti i yeţţaken amrar...
i yiles g imennayen. »
Tamuza tis-snat :
« Ay ameksa bb wulli,
ay andus n lexlawi,
ay aḥecad wer nelqim,
sel-ed ad k-nini.
D nekwenti i ţ-Timuzatin,
yessi-s Igenni.
Nezdeɣ sennig wedrar,
akkin i webḥri.
Nezdeɣ deg Iter,
dihin di leɛli...
Tamuza tis-tlata :
« Dihin di leɛli,
dihin i wsawen...
g uḍef igider,
imundeln i wallen...
ur yeţţṛuz waḍu,
ur dellen waguyen...
ur nessin ageffur,
ur nessin ideflawen...
ɣef yixef n Ulampu,
adrar ɛlayen. »
Tamuza tis 4 :
« Ay ameksa n wulli,
sel-ed ad k-nini.
In'-sen i watmaten-ik,
imdanen-nni.
In'-sen amer ad ɣilen,
nnsen, dunnit-agi.
Dunnit-agi n bab-is,
n bab igenni.
In'-sen ur sefsaden,
in'-sen ur teţţen kulci...
in'-sen yelha wḥezeb,
in'-sen telha tmusni.
Tamuza tis-5 :
« Ay imksawen n wulli,
ay at wer-tillas...
d nekkwenti i d timuzatin,
yal tagwniţ nessen-as;
d yess-is bb Webdir
bu ygider axettas;
nessen a nini tideţ,
nessen a nini tikerkas.
Tamuza tis-6 :
« Ay ameksa n wulli,
lli imẓuɣen-ik !
Lli imeẓuɣen-ik,
tura a k-id-nawi...
ad k-id-nawi taqsiṭ...
n dunnit-agi...,
amek i d-tebda...,
ansi d-tefruri.
Tamuza tis 7 :
« Di tazwara, yella Xawuṣ :
fris aberkan.
Di Xawuṣ, tefɣ-ed Gaya :
lqaɛa m yiffan...
« Gaya turw-ed Uṛanus :
igenni bu yetran,
Ṭarṭarus :
times ur neţţfakan
d Punṭus :
aweffa bb waman. »
Tamuza tis 8 :
« Uṛanus yezdi d Gaya....
urwen-d idurar,
yulin deg warya...;
urwen-d lebḥuṛ,
isafen d ţẓegwa...;
urwen-d Ittiṭaniyen,
deg-sen ṭezina :
tafekka d imdanen,
lqedd d tisufa;
urwen-d Ikuklupsen,
deg-sen tlata,
ɣur-sen yiwet n tiṭ...
tdewweṛ f twenza. »
Tamuza tis 9 :
« Uṛanus yugad...
lewḥuc-a d-yeğğa...
Dɣa yefer-iten…
g wadis n Gaya.
G wadis n yemmat-sen…
ad qimen i lebda.
Yegnew fell-asen,
am igider af tarwa. »
Tamuza tamezwarut :
« Acḥal i teṣbeṛ,
ur tezmir ara.
Terğa almi d yibbwas,
dɣa Gaya terfa.
Tekks-ed amger deg idis-is,
qeṭṭiɛ d llamca.
Tefka-t i Kṛunus,
lweqt bu tḥila :
Kṛunus attiṭani,
ur neţkwakr’ ara.
Tuzn-it ad ineɣ baba-s,
m' ara teɣdeṛ tnafa.
Kṛunus yeddem amger-nni,
dɣa yehna.
Yeğğa baba-s
almi yeɣfel,
bbwint-eţ tirga...
dɣa igzem-as
ddwaxel,
iḍegr-iten
ar uweffa. »
Tamuza tis-snat :
«G wesmen Uṛanus,
tefɣ-ed di tweffa.
Wnisa-Tafrirt,
tgenawt n cbaḥa.
Deg idammen n Uṛanus,
i tsum lqaɛa,
fɣent-ed nunfat :
tullas-nni n lexla;
fɣen-d Igagasen,
warraw n Gaya,
azgen d amdan,
azgen d ţalafsa. »
Tamuza tis-3 :
« Uṛanus isuɣ,
i mmi-ines yenna :
akkagi i yi-tgiḍ,
ara k teg tarwa ! »
Dɣa yegwmeḍ fell-asen,
iṛuḥ deg werya,
yuɣal d igenni,
s yiṭṭij yefa...
Dɣa yulli wass...
umenzu f Gaya.
Tamuza tis 4 :
« Kṛunus yesssufɣ-ed...
Ittiṭaniyen ar beṛṛa,
ma d lewḥuc-nni nniḍen,
yunfa-sen dinna,
deg wefernu n tmes,
g weɛebbuḍ n lqaɛa...
Aţţan diɣ Gaya...
f Kṛunus terfa,
teggul ar teɣḍel,
ass-a neɣ azekka. »
Tamuza tis-5 :
« Kṛunus yuɣ weltma-s,
i wumi qqaṛṛen Riya.
Urwen-d Kirez,
Blutes d Westa... ;
rnan-d Neftun
d Yunyu neɣ Hiṛa. »
Tamuza tis 6 :
«Riya asmi d-turew...
agrud wis-seţţa,
Dziyus-Ubdir,
tefka-t i Gaya.
Tbbwi-t i Tamuzat,
tidak-nni lexla... »
Tamuza tis-7 :
« Bbwint-eţ s adrar...
sdurint-eţ ɣef tiṭ...
and' akken yeṭṭeḍ...
taɣat tamalṭit,
and' akken i d-yekker
s tament n tzizwit. »
Tamuza tis-8 :
« Kṛunus mi d-yesteqsa,
akken ad yečč mmi-s,
Riya teddem adɣaɣ,
deg webeḥnuq teţţel-it,
dɣa tefka-yas-t,
yedrem...
yesnetl-it ! »
Tamuza tis 9 :
« Asmi i muqeṛ...
Webdir dayenni,
Tefka-yas Gaya yiwen yemɣi,
yerra-t i Kṛunus…
sdaxel bb wučči.
Kṛunus yečča-t,
dɣa yerra-d kulci.
Yerra-d arraw-is…
d wedɣaɣ nni. »
Tamuza tamezwarut :
«Akken kan d-fɣen...
Igurdan-nni,
ddan d Wubdir,
skern imenɣi...
mgal Kṛunus
d Ittiṭaniyen-nni. »